Зүрхээ гар утсаараа хянана

Зүрхний өвчнөөр шаналж буй сая сая хүмүүсийн эрүүл мэндийн байдлыг тодорхойлж чадах шинэ төрлийн гар утас Англи улсад бүтээгдсэн байна. Heart Suite хэмээх программ хамгамж (application)-ийг агуулах даралтат дэлгэц бүхий энэ гар утсаар зүрхний бичлэг (Electrocardiograms) хийж, үр дүнг илгээх боломжтой ажээ. Хэрэглэгчид зүрхний бичлэг хийхийн тулд уг гар утасны дэлгэц дээр хоёр хуруугаараа 30 секунд хугацаагаар дарахад л хангалттай юм. Мөн бичлэгийг цусны даралт, глюкоз болон холестролын хэмжээ зэрэг бусад мэдээллүүдтэй хамт эмч болон эрүүл мэндийн зөвлөгөө өгдөг хүмүүст илгээх боломжтой ажээ.

Энэ арга нь зүрхний өвчлөл бүхий хүмүүст өөрсдийн эрүүл мэндийн байдлыг нүсэр тоног төхөөрөмжгүйгээр, өдөр тутам, хялбархан хянах боломж олгож байна. Мөн эмч нар гэрээр үзлэг, оношлогоо хийх үед өвчтөнүүдийн шинжилгээ авах зорилгоор ашиглах боломжтой ажээ. Medical Marketing UK компаний бүтээсэн H'andy Sana хэмээх энэ гар утсыг энэ оны эцсээс 710 орчим долларын үнэтэйгээр худалдаалж эхлэх гэж байна.

Дашрамд хэлэхэд зүрх судасны өвчлөл гамшгийн хэмжээнд хүрээд байгаа манай улсад өвчтөнүүдийн эрүүл мэндийн байдлыг хянах ийм төрлийн арга хэрэгсэл нэн яаралтай бөгөөд чухал шаардлагатай байгаа юм. Өвчлөлийн байдлаа цаг алдалгүйгээр хянаж чадаагүйгээс цус харвалт, цаашид үхэлд хүргэсэн тохиолдлуудтай блог эрхлэгч миний бие нэг бус удаа тааралдаж байсан юм. Тухайлбал цусны даралт нь харвалт өгөх хэмжээнд хүртэл нэмэгдсэн байсан нь ажиллагсадын эрүүл мэднийн үзлэгийн үед илэрч, газар дээр нь түргэн тусламж дуудан эмнэлэгт хүргэгдэж байсан тохиолдол байдаг.

Хэрэв тухайн хүн тухайн үед эрүүл мэндийн үзлэгээр ороогүй бол биеийн байдал хэрхэн өөрчлөгдөж ямархуу сөрөг үр дүнд хүрэх байсныг төсөөлөх аргагүй юм. Мөн цусны даралт, түүнээс шалтгаалан биед илрэх зовиур шаналалаа мэдэрч байсан ч хянах, илрүүлэх боломж хязгаарлагдмал байдгаас гэнэтийн үхэлд хүрсэн тохиолдлууд цөөнгүй байдаг. Энэ бүхнээс манай эрүүл мэндийн болон бизнесийн байгууллагын хүмүүс нэгийг бодож дүгнэлт хийх цаг болсоныг сануулж байна.


эх үүсвэр; mailonline

дэлгэрэнгүй

"Хар энерги" oрчлон ертөнцийн эцэс төгсгөлгүй тэлэлтийн шалтгаан

Орчлон ертөнцийн гарал үүсэл, түүнд хязгаар байдаг эсэх, мөн тэлэлтийн тухай олон тооны онол, таамаглал байдаг боловч эрдэмтэд хараахан нэгдсэн шийдэлд хүрч чадаагүй байгаа билээ. Эдгээр асуудлыг шийдэхэд нэгэн алхам болох нээлтийг НАСА-гийн эрдэмтэд хийжээ. Тэд "галактикийн дуран"-гийн тусламжтайгаар орчлон ертөнцийг эцэс төгсгөлгүй тэлэх магдлалтайг тогтоож эцэстээ "хүйтэн элсэн цөл" болон хувирна хэмээн дүгнэсэн байна. Насагийн эрдэмтэд Хабл дуран болон газарт байрлах сансарын дурангуудын тусламжтайгаар авсан 34 зургийг судлаж сансарын "хар энерги"-ийн хэмжээг тооцжээ.

Судалгааны хүрээнд оддоос ирэх гэрэл Abell 1689 хэмээх оддын бөөгнөрөл бүхий аварга галактикийн дотор болон түүний эргэн тойронд хэрхэн гажиж өөрчлөгдөж байгааг судалсан байна. Одон орончид дэлхийгээс тус галактик хүртэлх зай, түүний жин болон "хар энерги"-ийн тархалтыг хэмжсэнээр оддын бөөгнөрлийн овор хэмжээ нь галактикийн орчим дахь гэрлийн муруйлтын шалтгаан болж байгааг тогтоожээ. Үүнээс үндэслэн сансарт байрлах хар энергийн хэмжээг тооцоолсноор галактикийн жингээс хамаарсан одоогоор тодорхойгүй байгаа хүчний тархалт нь орчлон ертөнцийн тэлэлтийн шалтгаан болж, цаашид тэлэлт зогсолтгүйгээр үргэлжлэх магадлалтайг илэрхийлж байна гэсэн дүгнэлтэд хүрчээ.

Эрдэмтэдийн үзэж байгаагаар орчлон ертөнцийн геометр болон бүтэц нь түүний хувь тавилантай маш нарийн төвөгтэй хэлбэрээр холбогддог ажээ. "Хар энерги" нь орчлон ертөнцийн 3/4-ийг бүрдүүлдэг гэж үздэг байсан боловч түүнийг хараахан бүрэн илрүүлж чадаагүй байсан юм. "Бид хар энергийн асуудлыг олон талаас нь судлах ёстой. Үүний тулд олон тооны арга хэрэгсэл шаардлагатай байдаг боловч энэ удаагийн судалгааны арга илүү үр дүнтэй болсон. Энэ аргаар гравитацийн хүч болон хар энерги нь галактикийн зургийг хэрхэн муруйлгаж байгааг тодорхой харж болно" хэмээн профессор Eric Jullo хэлжээ. Тэрээр "орчлон ертөнцийн тэлэлт нь хязгааргүйгээр үргэжлэхээс гадна хурдасч байгаа" гэж нэмж хэлсэн байна.


эх үүсвэр; mailonline

дэлгэрэнгүй

Ганц дугуйтай мопед

Ryno Motors компанийн зохион бүтээгчид ганц дугуйтай цахилгаанаар ажилладаг мопед бүтээсэн байна. Энэ мопед нь хот дотор болон спорт, үйлдвэрлэл, засгийн газрын байгууламж зэрэг өргөн хүрээнд ашиглагдах боломжтой бөгөөд харьцангуй бага хурдтай явахад зориулагдсан байна. Мөн өмнө мэдээлж байсан хувийн тээвэрлэгч хэрэгслүүдтэй адил автоматаар тэнцвэрээ олох чадвартай ажээ.

эх үүсвэр; rynomotors

дэлгэрэнгүй

Цахилгаан унадаг дугуйн борлуулалт эрс нэмэгдэв

2010 оны эхний хагас жилийн байдлаар Япон улсад худалдаалагдсан цахилгаан хөдөлгүүр бүхий унадаг дугуйн борлуулалт 200 мянгад хүрч бензинээр ажилладаг мотоцикл болон мопедны борлуулалтаас анх удаа илүү гарсан байна. 2008 оноос ийм төрлийн унадаг дугуйн борлуулалт 50 сс хүртэлх хэмжээний хөдөлгүүр бүхий мопедоос давж эхэлсэн юм. Харин мотоцикл болон мопедны борлуулалт 194 мянга болж 5 жил дараалан буурсан үзүүлэлттэй байна. Цахилгаан хөдөлгүүрт унадаг дугуй нь өгсүүр замыг туулахад хүндрэлтэй байдаг энгийн дугуйн дутагдалтай талыг арилгаж чадсанаас гадна үнэ хямд, ашиглахад хялбар байдгаас өндөр настан, эмэгтэйчүүд болон оюутнууд голлон худалдаж авдаг байна.

Хэрэглэгчдийн эрүүл мэнд болон хүрээлэн байгаа орчны нөлөөллийг ухамсарлах явдал нэмэгдэж байгаатай холбоотойгоор цахилгаан хөдөлгүүрт унадаг дугуйн борлуулалт өсч ийм төрлийн зах зээл их хэмжээгээр тэлэх төлөвтэй байна. Дэлхийд хамгийн анхны цахилгаан унадаг дугуй үйлдвэрлэсэн Ямаха компаний борлуулалт гэхэд л өнгөрсөн оны эхний хагас жилтэй харьцуулахад 18 хувь нэмэгджээ. Үүнд хоёр хүүхэд суулгаж явах боломжтой загвар хэрэглэгчдийн таашаалд нийцсэн, мөн сурталчилгааг амжилттай явуулсан нь нөлөөлсөн байна. Панасоник компани эмэгтэйчүүдэд зориулсан спорт загварын дугуйг 5-р сараас худалдаанд гаргасан байна. Мөн тоормозлох үед ашиггүй зарцуулагдах энергийг батерейг цэнэглэхэд ашиглах технологийг нэвтрүүлэн нэг удаагийн цэнэглэлтээр 97 км хүртэлх зай туулах чадвартай шинэ загварын унадаг дугуйг өнгөрөгч сард танилцуулсан юм.

Тэгвэл Санёо компанийн 2009 оны борлуулалт өмнөх оны мөн үеийнхтэй харьцуулахад 50 хувь нэмэгдсэн байна. Тус компани 4 сард худалдаанд гаргасан шинэ загварын унадаг дугуйн дахин цэнэглэх төхөөрөмжийг сайжруулснаар энерги үүсгэгчийн эргэлтийн хурдны өөрчлөлт болон дөрөө жийх хүчийг хамтад нь мэдэрч, цэнэглэх хэмжээг тохируулснаар тэгш гадаргаар явах үед ч үр ашигтайгаар цэнэглэх боломжтой болсон байна. Харин Хонда компани шинэ загварын дугуй үйлдвэрлэн өдөр ирэх тусам өргөжин тэлж буй хятадын зах зээлд ирэх оноос нийлүүлэхээр төлөвлөж байгаа ажээ.



эх үүсвэр; robonable

дэлгэрэнгүй

Сурталчилгааны самбар таныг нэрээр чинь дуудна

Бидний амьдарч буй мэдээллийн эрин зуунд аливаа бараа үйлчилгээг хэрэглэгчдэд таниулахад зар сурталчилгаа голлох үүргийг гүйцэтгэж байгаа боловч хэт олон сувгаар олон нийтийг хамруулан түгээгддэгээс өөр өөр хүсэл сонирхол бүхий дийлэнх хэрэглэгчидийн анхааралд тэр болгонд хүрч чаддаггүй. Үүнийг зар сурталчилгааны байгууллагууд мэдэрч аль болох тухайн хэрэглэгчийн хүсэлд нийцсэн бүтээгдэхүүнийг сурталчилахыг эрмэлзэх болсон. Интернэтээс хайлт хийх үед таны өмнөх хайлтын үр дүнтэй ойролцоо мэдээллүүд түлхүү гарч ирдэг, онлайн худалдаа хийх тохиолдолд мөн адил өмнө худалдан авсантай адил төрлийн бүтээгдэхүүний сурталчилгаа харуулдаг, үйлчилгээний зарим байгууллагууд хэрэглэгчдийг бүртгэлд хамруулан нас, хүйс, хэрэглээний онцлогт тохирсон сурталчилгааг шуудангаар явуулдаг болсон зэрэг нь үүний жишээ юм.

Харин тун удахгүй таны ойролцоох сурталчилгааны самбар Том Крусын тоглосон Minority Report кинонд гардаг шиг нэрээр тань дуудаж өглөөний мэнд дэвшүүлбэл гайхаад байхааргүй болохнээ. Ийм төрлийн сүүлийн үеийн дэвшилтэт нэгэн технологийг IBM компанид боловсруулж байна. Энэ технологи нь зар сурталчилгааны самбарт байрлуулсан радио долгион хүлээн авах (RFID) чипний тусламжтайгаар ойролцоо явж буй хүний кредит карт болон гар утаснаас нас, хүйс, худалдаа наймааны зуршил зэрэг мэдээллийг хүлээн авдаг байна. Эдгээр мэдээлэлд үндэслэн зөвхөн тухайн хүнд зориулагдсан зар сурталчилгааг сурталчилгааны самбарт үзүүлэх зорилготой ажээ. Энэ технологи нь хэрэглэгчдэд хамааралтай, илүү үр ашигтай, уян хатан сурталчилгааны хэлбэр болж чадна гэдэгт судлаачид итгэлтэй байна.

эх үүсвэр; telegraph

дэлгэрэнгүй

Өмнөд солонгосчууд хойд хилээ роботоор хамгаална

Сүүлийн үед Хойд болон Өмнөд солонгосын харилцаа хүндэрч дайны байдалд ойрхон байгаа билээ. Өмнөдүүд цэргийн болон байлдааны техникийн хүчин чадлаараа хойдуудаасаа хол дутуу байгаа боловч техник, технологийн хөгжлөөр илүү байдлаа давуу тал болгон ашиглахаар зорьж байгаа бололтой. Өмнөд солонгосчууд хилийн шугам дахь харуулын хяналтын болон байлдааны үйл ажиллагаа явуулах чадвартай алсын удирдлагатай роботыг туршиж эхэлсэн байна. Армийн төлөөлөгчийн мэдэгдсэнээр эхний ийм роботыг Gangwon муж дахь хилийн цэрэггүй бүсийн ойролцоо туршилтын журмаар байрлуулсан байна.

Мөн энэ оны эцэс гэхэд цэрэггүй бүсийн хяналтын бүх постууд болон япон тэнгис дэх усан хилийн ойролцоох 5 аралд тус тус байрлуулахаар төлөвлөж байгаа тухай мэдэгджээ. Уг роботыг бүтээх төслийг Korea их сургууль болон Samsung Techwin компани хамтран 2004 оноос 3 үе шаттайгаар хэрэгжүүлж байна. SGR-A1 загварын уг робот нь камер болон К-4 өндөр хурдтай автомат буугаар тоноглогдсон бөгөөд төвлөрсөн удирдлагын системтээр хангагддаг байна. Ажиглалтын камер нь дүрслэлийг тухайн эгшинд нь хяналтын өрөөрүү дамжуулах бөгөөд буу нь зөвхөн хүний удирдлагын дагуу ажиллагаанд ордог байна. Уг роботууд хилийн хяналтыг бүрэн орлож чадахгүй боловч хяналтын түвшинг эрс нэмэгдүүлэх бөгөөд нэг бүр нь 400 сая воны үнэтэй байх ажээ.

эх үүсвэр; chosun.com

дэлгэрэнгүй

Цахилгаан автомашины тухай-1

Aвтомашины энерги зарцуулалтын тухай
Цахилгаан машины тухай өгүүлэхийн өмнө автомашины энерги зарцуулалтын үр ашгийн тухай товч сонирхоцгооё. 20-р зуунд хүн төрөлхтөний амьдралыг өөрчлөхөд голлон нөлөөлсөн зүйлүүдийн нэг гэдэгтэй олон хүн санал нийлэх техник бол яах аргагүй автомашин билээ. Гэтэл өнөөдрийг хүртэл хүний гараар бүтээгдсэн машин техникүүд дундаас хамгийн үр ашиг муутай нь мөн л энэ автомашин гэдгийг мэдэх хүн цөөхөн байдаг байх. Анхлан зохион бүтээгдсэнээсээ хойш бүхэл зуун дамжин хүний төлөө хүчин зүтгэж байгаа боловч шатахуун буюу нефтийн бүтээгдэхүүнээр ажилладаг автомашины энерги зарцуулалтын ашигт үйлийн коэффициент дөнгөж 15 орчим хувьтай байна.

Шатахуунт хөдөлгүүрт автомашины энерги зарцуулалтын хувь хэмжээг задлаж үзэхэд (зураг) хөдөлгүүр дээрх энергийн алдагдал хамгийн их буюу 62.4% байна. Зурагт үзүүлсэнээр гэрэл дохио болон замын бөглөрөлөөс шалтгаалан түр зогсолт хийх, хөдөлгүүрээ асаалттай орхих тохиолдолд нийт шатахууны 17.2 хувь нь ямар ч ашиггүйгээр зарцуулагддаг байна. Автомашины хөдөлгүүрийн эргэлтийн хүчийг дугуйнуудад дамжуулахад нийт энергийн 5.6 хувь нь алдагддаг. Харин агаарын эсэргүүцэл, инерцийн хүч, дугуйны үрэлтийн хүчийг давах буюу автомашиныг хөдөлгөхийн тулд нийт энергийн 12.6 хувь, айркон зэрэг төхөөрөмжүүдэд 2.2 % тус тус зарцуулагдаж нийт энергийн 15 орчим хувь нь ашигтай зарцуулагддаг байна.


Эдгээрээс түлшний шаталтын энергийг аль болох их хэмжээгээр ашиглаж автомашины ашигт үйлийн коэффициентийг нэмэгдүүлэхийн тулд үр ашиггүй зарцуулалтын хувь хэмжээ (85%)-г багасгах шаардлагатай нь ойлгогдоно. Харин үүнийг хэрхэн багасгах вэ. Эхлээд энергийн алдагдал хамгийн өндөр үзүүлэлттэй хөдөлгүүр буюу энерги үүсгэгчийн тухай авч үзье. Дотоод шаталтын хөдөлгүүр нь автомашин болон бусад техникт өргөнөөр ашиглагддаг хамгийн түгээмэл энерги үүсгэгчүүдийн нэг боловч түүнд ашиглагддаг шаталтын технологи нь халалт болон дуу чимээний хэлбэрээр их хэмжээний энергийн алдагдал үүсгэдэг, мөн хөдөлгүүрийн материалын онцлогоос хамааран дулааны хүчин чадал хязгаарлагдмал байдаг үндсэн сөрөг талтай юм. Үүнээс шалтгаалан өнөөдрийг хүртэл дотоод шаталтын хөдөлгүүрийн үр ашгийг хангалттай нэмэгдүүлж чадаагүй байгаа бөгөөд хөдөлгүүрийг хичнээн сайжруулсан ч үр ашгийг нэмэгдүүлэх боломж хязгаарлагдмал байдаг. Харин автомашинд цахилгаан хөдөлгүүр ашигласнаар дотоод шаталтын хөдөлгүүр буюу энерги үүсгэгч дээрх алдагдлыг их хэмжээгээр бууруулах боломж бүрддэг.

Сүүлийн жилүүдэд автомашинд цахилгаан, хосломол хөдөлгүүрт болон бусад хэлбэрийн энергийн эх үүсвэрүүдийг ашиглах болсон нь нефтийн бүтээгдэхүүний үнийн өсөлт, нөөцийн төсөөлөгдөж буй хомсдол, байгал орчны бохирдлын нөлөөлөл зэрэг хүчин зүйлүүдээс гадна үр ашиг муутай шаталтын технологиос татгалзаж, энергийг аль болох өндөр үр ашигтайгаар хэрэглэхийг эрмэлзэх болсонтой холбоотой ажээ. Дараах хүснэгтэд автомашины олон төрлийн энерги үүсгэгчүүдийн ашигт үйлийн коэффициентийг харьцуулан үзүүлэв. Эдгээр тоон үзүүлэлтүүдийн тухайд тусгайлан хийгдсэн судалгааны үр дүн хараахан олдоогүй учир олон төрлийн эх үүсвэрүүдээс дундажлан тооцсон болно.

хөдөлгүүрийн төрөл	АҮК1, %	АҮК2, %
шахсан агаар		12
бензин	7	15
дизел	12	20
хосломол хөдөлгүүр	25	30
метанол		38
устөрөгч	30	50
цахилгаан	30	60

АҮК1 нь тухайн энергийн анхдагч эх үүсвэрээс эхлэн дамжуулах, тээвэрлэх, хувиргах бүх процессийг хамруулан тооцсон үзүүлэлт юм. Жишээ нь цахилгаан энергийн хувьд цахилгаан станц дээрх үйлдвэрлэлийн, тээвэрлэлтийн үр ашгийг давхар тооцсон үзүүлэлт болно. АҮК2 нь зөвхөн тухайн автомашины үр ашгийг харуулсан үзүүлэлт юм. Хүснэгтээс олон төрлийн энерги үүсгэгчүүд дундаас хамгийн өндөр үзүүлэлттэй нь цахилгаан хөдөлгүүр бүхий автомашин болохыг харж болно.

дэлгэрэнгүй

Хүний оюун санаагаар хиймэл гарыг удирдана

Сармагчингийн тархинд суулгасан чипний тусламжтайгаар робот гарыг түүний бодол санаагаар удирдаж сургасан тухай өмнө нь мэдээлж байсан билээ. Тэгвэл ийм төрлийн туршилтыг дэлхийд анх удаа хүн дээр хийхэд бэлэн болсон байна. АНУ-ын Батлан хамгаалах яам болон Johns Hopkins Хэрэглээний физикийн лаборатори (Applied Physics Laboratory) хамтран хүний тархинд суурилуулах мэдрэгчүүдийн тусламжтайгаар хиймэл гарыг хүний оюун санаагаар бүрэн удирдаж, үе мөчнөөс тархины мэдрэлийн систем рүү цахилгаан дохиолол илгээх замаар хиймэл гарын хуруунуудын хүртэх мэдрэхүйг сэргээхээр төлөвлөж байна.

Уг төсөл нь ирэх 2 жилийн хугацаанд хэрэгжих бөгөөд таван хүний төв мэдрэлийн системд тулгуурлан хийх туршилтын ажилд нийт 34.5 сая долларын төсөв батлагдсан байна. Modular Prosthetic Limb хэмээгдэх хиймэл гар нь 5 хурууны хоорондоо үл хамаарах хөдөлгөөнийг хамруулан нийт 22 хөдөлгөөнт үе мөчийг агуулахаас гадна хүний гартай ойролцоо жинтэй байх ажээ. Өвчтөнүүдийн тархинд мэс заслын аргаар суулгасан микрочипийн тусламжтайгаар тархины гадаргын хөдөлгөөн удирдах хэсгээс дохиоллуудыг хүлээн авч хиймэл гарыг удирдах юм.

Эрдэмтэд эхний ээлжинд нугасны мэдрэлийн системийн гэмтлээс шалтгаалан дөрвөн мөч нь саажсан өвчтөнүүдийг туршилтад оролцуулах ажээ. Уг төсөл нь хамгийн сүүлийн үеийн дэвшилтэт технологийг бодит байдалд хэрэгжүүлэх томоохон хэмжээний төсөл бөгөөд зорилго нь дайн тулааны үед гар, хөлөө алдсан ахмад дайчдыг бүрэн ажиллагаатай хиймэл үе мөчтэй болгоход чиглэж байгаа ажээ. Хиймэл гарыг туршилтын хүрээнд компьютер ашиглан зайнаас хэрхэн удирдаж байгааг дараах бичлэгээс харж болно.

эх үүсвэр; singularityhub

дэлгэрэнгүй