Үнсэлтийг дууриах хүртэх мэдрэхүйн харилцааны төхөөрөмж

Япон улсын Цахилгаан-харилцаа холбооны их сургуулийн судалгааны баг хосууд болон гэр бүлийн хүмүүст зориулан хүртэх мэдрэхүйн харилцааны төхөөрөмж бүтээж байна. Энэ нь амны хүртэх мэдрэхүйн үйлдлийг дамжуулах, өөрөөр хэлбэл үнсэлттэй адил мэдрэмжийг төрүүлэх зорилготой төхөөрөмж юм. Нэг төхөөрөмжийг амандаа байрлуулаад эргэлдэх хэсгийг хэлээрээ эргүүлбэл нөгөө төхөөрөмжид мөн адил хөдөлгөөн давтагдана. Хэрэв эсрэг тийш нь эргүүлбэл нөгөө төхөөрөмжийн эргэлдэх хэсэг мөн адил эсрэг тийш эргэж тухайн хүний өөрийн эргүүлсэн чиглэлийн хөдөлгөөн өөр нэгэн төхөөрөмжийг амандаа байрлуулсан хамтрагчид мөн адил мэдрэгдэнэ.

Төхөөрөмжийн хөдөлгүүрийн эргэлтийг компьютерээр удирдах бөгөөд bilateral буюу хоёр талын удирдлага хэмээгдэх зарчимаар эргэлтийн өнцөгийн мэдээллийг харилцан хамааралтайгаар төхөөрөмж хооронд дамжуулсанаар эргэлдэх хэсгийн нэгэн адил байрлалын нөхцөлийг бий болгодог байна. Төхөөрөмжийг одоогоор зөвхөн нэг комьютерийн тусламжтайгаар ажиллуулж байгаа боловч цаашид сүлжээгээр дамжуулан удирдах систем бий болгох тохиолдолд хол зайд байрлаж байсан ч үйлдлийг хялбархан гүйцэтгэх боломжтой болох юм. Мөн эргэлдэх хэсгийн байрлалын мэдээллийг хадгалах боломжтой бөгөөд тухайн хүний өөрийнх нь давтагдашгүй онцлогийг шингээсэн үнсэлтийг дууриалган сэргээх боломжтой болно.

"Жишээлбэл нэр алдартай хэн нэгэн хүн төхөөрөмжийг ажиллуулсан тохиолдолд түүний үнсэлтийн мэдээллийг хадгалж аваад шүтэн бишрэгчдэд нь санал болговол таашаан хүлээн авах нь гарцаагүй. Цаашид үнсэлтийн үндсэн зарчимууд болох амт, амьсгал мэдрэх, хэл бага зэрэг нойтон байх гэх мэт нөхцөлүүдийг бүрдүүлвэл жинхэнэ хүчирхэг төхөөрөмж болж чадна" хэмээн зохион бүтээгчдийн нэг ярьж байна.






эх сурвалж; diginfo

iPhone хэрэглэгчийн хөдөлгөөнийг хянах боломжтой

Apple компаний iPhone, 3G iPhad төхөөрөмжүүд хэрэглэгчдийн хөдөлгөөнийг нууцаар хянах боломжтой тухай мэргэжилтнүүд мэдэгдэж байна. Guardian сонинд нийтлэгдсэн мэдээллээр 2010 оны 6 сард гарсан iOS4 систем бүхий төхөөрөмжүүд хэрэглэгчдийн байрлалын мэдээллийг нууцаар хадгалдаг бөгөөд зориулалтын програм хангамжийн тусламжтайгаар тухайн хэрэглэгч ямар цаг үед хаана байрлаж байсныг газрын зураг дээр үзүүлэх боломжтой юм. Мөн компьютертэй холболт хийх тохиолдолд мэдээллүүд файл хэлбэрээр хадгалагдан үлдэх магадлалтай юм. Харин Apple компани одоогоор энэ талаар ямар нэгэн мэдэгдэл хийгээгүй байна.

Ийм төрлийн мэдээллүүд хадгалагдаж байгаа эсэхийг хялбархан илрүүлэх боломжгүй нь хэрэглэгчдийг түгшээж байгаа боловч мэдээллүүд үнэхээр алдагдаж бусдад дамжсан тохиолдолд гарсан эсэх тухай нотлогоо одоогоор байхгүй байна. Хамгаалалтын мэргэжилтнүүд Apple-ийн бүтээгдэхүүнүүд яагаад хэрэглэгчийн байрлалын тухай мэдээллийг хадгалж авч байгаа шалтгааныг мэдэхгүй байгаа боловч энэ нь зориудын үйлдэл байж болно гэж үзсэн байна. Эдгээр төхөөрөмжүүдийн тусламжтайгаар хэрэглэгчдийн ажил мэргэжил, хэл, зип код, байрлалын код, цагийн бүс зэрэг мэдээллүүдийг цуглуулж зар сурталчилгаа, бүтээгдэхүүн борлуулалт болон бусад үйлчилгээнд ашиглах зорилготой байж болохыг ч үгүйсгэхгүй байгаа юм.

Хэрэглэгчдийн байрлалыг хянах боломж зөвхөн Apple-ийн бүтээгдэхүүнээр хязгаарлагдахгүй бөгөөд GPS буюу байрлал заагч төхөөрөмж агуулсан андройд гар утас болон бусад зөөврийн электрон төхөөрөмжүүд ч мөн адил боломжийг агуулж байж болох юм. Нөгөө талаас өндөр боломж бүхий шинэ шинэ төхөөрөмжүүд зохион бүтээгдэж хэрэглээнд нэвтэрч байгаа боловч хэрэглэгчдийн мэдээллийн нууцлал болон аюулгүй байдалтай холбоотой эрсдэлүүдийг нэмэгдүүлж байна. Юутай ч эдгээр мэдээлэл гарсаны дараахан Untrackerd хэмээх апликэшн програм бүтээгдсэн байна. Энэ програм нь төхөөрөмжийн байрлалын тухай мэдээллийг алдагдахаас сэргийлж тухай бүрт нь устгадаг байна.


эх сурвалж; bbc, gizmodo

Шинэ үеийн цахилгаан машины эхний загвар бэлэн болжээ

Өмнө мэдээлж байсны дагуу SIM-Drive компани цахилгаан хөдөлгүүрийг дугуйн дотор байрлуулсан шинэ үеийн цахилгаан машины олон тоогоор үйлдвэрлэгдэх эхний загварыг боловсруулж дууссан байна. SIM-LEI (LEI - Leading Efficiency In-Wheel motor) хэмээн нэрлэгдэх энэхүү загварыг өнгөрөгч сарын 29-нд албан ёсоор зарлахаар төлөвлөж байсан боловч япон улсад тохиолдсон байгалийн гамшигийн улмаас түр хойшлуулаад байна.

Нэг удаагийн бүрэн цэнэглэлтээр туулах зайг япон улсын хотуудын автозамын нөхцөлд 333 км-т хүргэж чадсан бөгөөд уг машиныг бүтээх гол зорилгоо биелүүлсэн хэмээн гэж бүтээгчид үзэж байна. Мөн хөдөлгүүрийн хүчин чадлыг 24.5 kв хүртэл буюу одоогоор худалдаалагдаж байгаа бусад төрлийн цахилгаан машины хөдөлгүүрийн хэмжээнд хүртэл бууруулсан байна. Өөрөөр хэлбэл 1км зайг туулахад 77 ватт цахилгаан энерги зарцуулах бөгөөд хөдөлгүүрийн энергийн үр ашгийг шатахуунт хөдөлгүүртэй харьцуулж үзэхэд 1 л шатахуунаар 70 км зайг туулахтай дүйцэх үзүүлэлт юм.

SIM-LEI загвар нь гадна хэмжээгээр урт болон дунд хэлбэрийн седан машинтай адил боловч кабины эзэлхүүний хувьд илүү том хэмжээтэй юм. Мөн 4.8 секиндэд 100 км/ц хурд авах чадалтай бөгөөд энэ нь одоогийн спорт загварийн машинуудтай ойролцоо юм. Зарим үзүүлэлтүүдийг тодруулбал гадна хэмжээ 4.7 x 1.6 x 1.55 м, жин 1650 кг, дээд хурд 150 км/ц, 4WD юм байна. Энэхүү цахилгаан машин нь 2013 оноос их хэмжээгээр үйлдвэрлэгдэхээр төлөвлөгдөж байгаа юм.




эх сурвалж; sim-drive

Өмнө танигдаж байгаагүй байгалын шинэ хүчийг нээсэн үү

Fermi National Accelerator Laboratory-ийн физикчид өмнө нь шинжлэх ухаанд танигдаж байгаагүй шинэ төрлийн эгэл бөөмс буюу хүчний хэлбэрийг нээсэн тухай мэдээлсэн байна. Энэ нь таталцалын, соронзон, эгэл бөөмсийн сул болон хүчтэй харилцан үйлчлэлийн хүчүүдтэй адил байгалийн хүчний нэгэн шинэ хэлбэр бөгөөд эгэл бөөмсийн массын тухай, биет хэрхэн массаар хангагддаг тухай физикчдийн олон жилийн эрэл хайгуулын тайлал болох магадлалтайд тооцогдож байна. Өөрөөр хэлбэл аливаа эгэл биет масстай байх нөхцөл нь уг шинэ хүчний нөлөөлөл ажээ.

Тус лабораторийн Tevatron хэмээх хурдасгуур нь 1980 оноос ашиглагдаж эхэлсэн бөгөөд 2008 онд Швейцари улсад Европын цөмийн судалгааны байгууллагын аврага хурдасуур (LHC) ашиглалтад орох хүртэл дэлхийн хамгийн хүчирхэг төхөөрөмжид тооцогдож байсан юм. Tevatron хурдасгуурын тусламжтайгаар LHC-тай адилаар эгэл биетүүдийг гэрлийн хурданд хүртэл хурдасган мөргөлдүүлж орчлон ертөнцийн гарал үүслийн талаархи судалгааг 25 жилийн турш хийж байгаа юм.

Энэ хугацаанд протонуудыг 1 триллион электронвольт энергиэр хурдасган мөргөлдүүлж хийсэн 10 мянган удаагийн туршилтын үр дүнг судлаж үзэхэд 250 орчим удаагийн туршилтаар мөргөлдөлтөөс электрон зэрэг хөнгөн бөөмс болон W бозон хэмээгдэх харьцангуй их энерги агуулах эгэл хэсгүүдэд үүсч байсан байна. Эдгээр хуваагдлын үед 144 тэрбум электронвольт энерги ялгарч байсан нь ердийн хэмжээнээс даруй 300 дахин их буюу хүлээн зөвшөөрөгдөж буй эгэл бөөмсийн онолтой зөрчилдөж байгаа юм. Өөрөөр хэлбэл өмнө нь танигдаж байгаагүй масс-энергийн бүтцийг агуулж байгааг нотлох үзүүлэлт ажээ. Сонирхуулахад протоны жин 1 тэрбум электронвольт байдаг байна.

Шинээр нээгдсэн хүчний хэмжээ болон үйлчлэлийн хүрээ маш бага бөгөөд атомуудын цөмийн орчинд үйлчилдэг байна. Зарим физикчид энэхүү нээлтийг шинжилгээний алдаа байх магадлалтай хэмээн хүлээн зөвшөөрөхгүй байгаа боловч ойрын хэдэн сарын хугацаанд хийхээр төлөвлөж буй нарийвчилсан судалгааны эцэст үнэхээр бодитой эсэхийг баталгаажуулах юм.

Fermi лабораторын Tevatron хурдасгуур

эх сурвалж; nytimes & etc.