iPed буюу APad худалдаалагдаж эхлэв

Хоёр хоногийн өмнөөс зарим орнуудад Apple-ийн iPad-ын худалдаа эхлээд байгаа боловч хятадад хараахан эхлээгүй байгаа билээ. Гэтэл өмнөд хятадын Shenzhen хотын электрон барааны нэгэн томоохон их дэлгүүрт iPad-тай төстэй бүтээгдэхүүн худалдаалагдаж эхэлсэн байна. Хайрцаглалт болон бүтээгдэхүүний гадна байдал iPad-тай андуурмаар адилхан бөгөөд бүтээгдэхүүний нэрийг iPed гэж бичсэн байгаа боловч ашиглалтын заавар дээр APad гэсэн байгаа ажээ.

Ажиллуулж үзэхэд дүрснүүд болон дэлгэц дээр хуруугаар дарж удирдах арга, эргүүлэхэд дэлгэц нь дагаж эргэдэг байдал зэрэг нь iPad-тай адилхан бөгөөд гүүглийн андройд үйлдлийн системтэй юм байна. Бүтээгдэхүүний үйлдвэрлэгчийн нэр бичигдээгүй ба үнийн хувьд японд зарагдаж байгаа iPad-аас 4 дахин хямд юм. Мөн борлуулалт сайтай байгаа, зарим хэрэглэгчид нэг дор хэдэн зуугаар нь худалдан авч байгаа тухай худалдагч нар ярьжээ.

Үүнээс гадна хятадын зарим онлайн худалдааны сайтуудаар APad хэмээх мөн адил бүтээгдэхүүн худалдаалагдаж байгаа юм байна. Сайт дахь мэдээллээс үзвэл энэ бүтээгдэхүүн багтаамжын хувьд 2-16 Гб, мөн USB холболттой, мөн адил гүүглийн андройд үйлдлийн системтэй ажээ. Эх үүсвэрүүдийн нийтлэж байгаа фото зураг болон дүрс бичлэгийг ажиглавал iPed болон APad нь нэг л бүтээгдэхүүнийг хоёр өөрөөр нэрлэсэн мэт сэтгэгдэл төрнө. iPad-тай адил төрлийн бүтээгдэхүүн үйлдвэрлэн гаргахаар хэд хэдэн компаниуд зарлаж өөрсдийн загваруудаа танилцуулаад байгаа боловч хятадын компаний ийм төрлийн бүтээгдэхүүний талаар албан ёсоор нийтэд хараахан мэдээлэгдээгүй байгаа юм. Хятадууд аа гэж...



эх үүсвэр; 画像&動画ニュースぶろぐ

DVD-ээс 1000 дахин их багтаамжтай диск бүтээжээ

Японы Токио их сургуулийн эрдэмтэд DVD-ээс 1000 дахин, Blu-ray дискнээс 200 дахин их багтаамж бүхий оптик диск бүтээсэн байна. Энэ шинэ дискэнд олон төрлийн цахилгаан бүтээгдэхүүнүүдэд өргөн ашиглагддаг түгээмэл материал болох титанийн давхар исэлийг ашиглажээ. Профессор Окоши Шиничигийн удирдсан судалгааны багийнхны хийсэн туршилтаар ердийн нөхцөлд хар өнгөтэй байдаг уг материалийг лазерийн гэрлийн үйлчлэлд оруулахад хүрэн өнгөтэй болж хувирсан байна.

Ингэснээр титанийн давхар исэлийн цахилгаан дамжуулагч чадвар нь алдагдаж хагас дамжуулагч болон хувирсан бөгөөд оптик диск хэлбэрээр ашиглах боломж бүрджээ. Шинэ дискний туршилтын хувилбарыг 5 нанометр хэмжээтэй талст хэлбэрээр бүтээсэн байна. Энэ дискэнд ашиглагдах материалын онцлог давуу тал нь үнийн хувьд хямд бөгөөд одоогоор хэрэглэгдэж байгаа DVD болон Blu-ray дискнээс илүү хямд өртөгөөр үйлдвэрлэх боломжтой ажээ. Судалгаа хийсэн эрдэмтэд аль хэдийн үйлдвэрлэгч нартай ярилцаж эхэлсэн бөгөөд ойрын хугацаанд нийтийн хүртээл болгохоор төлөвлөж байгаа юм байна.


эх үүсвэр; 毎日jp

Гарчиггүй

Хэдэн долоо хоногийн өмнө бага зэргийн үл ойлголцол болгож орхисон бичлэг маань Монгол телевизийн Залуус хөтөлбөрийн өчигдөрийн дугаарт хэсэг оршил үгний дараагаар нэвтрүүлэгджээ. Блог бичлэгүүд маань цэвэр хувийн сонирхолын хүрээнд, өөрийн монгол хэлбичгийн болон орчуулгын дадлага туршлагаа нэмэгдүүлэх, мөн дуулж сонссон шинэ сонин мэдээллүүд зарим хэрэгтэй хүндээ хүрээсэй гэсний үүднээс хийгдэж байгаа учир цаг зав, мэдлэг чадвараас шалтгаалан чанарын хувьд шаардлага хангахуйц зүйл болж чаддаггүй. Уг нэвтрүүлгийг үзээд хэрэв үнэхээр нийтлэгдэж, нэвтрүүлэгдэх байсан бол ... гэсэн бодол төрөв...


Та өдөрт хэдэн калори энерги шатаадаг вэ

Сүүлийн жилүүдэд манай дундаас дээш давхаргынхны дунд таргалалт, илүүдэл жин хэвийн үзэгдэл болоод байна. Хүмүүс ихэвчлэн 30 наснаас жин нэмж эхэлдэг бол сүүлийн үед 25 хүрээгүй шахуу байж гүзээ суусан залуус цөөнгүй харагдах боллоо. 10-20 жилийн дараагаас эхлэн өнөөгийн тарган залуу үеийнхэн зүрх судас, хоол боловсруулах эрхтэн системийн өвчлөлд нийтээрээ нэрвэгдэж магадгүй нийгмийн нэгэн тулгамдсан асуудал болохыг үгүйсгэх аргагүй юм. Таргалалтаас сэргийлэхийн тулд хоолны дэглэм барих, зөв зохистой хооллох, спортоор хичээллэх зэрэг шалгарсан аргуудыг хүмүүс тэр болгон хэрэгжүүлж чаддаггүй.

Тарган хүмүүс жин хасахаа байг гэхэд ядаж л дахиж нэммээргүй байдаг байх. Тэгвэл таньд бага ч болов тус болох үүднээс энэхүү мэдээллийг цуглуулав. Хүний бие өдөр тутмын бүхий л үйл ажиллагаанд энерги зарцуулж байдаг. Яг юу хийхэд хэдэн калори энерги зарцуулдагийг мэдэж мөрдөж чадвал жингээ барихад бага ч болов нэмэр болно. Насанд хүрсэн хүн өдөрт дунджаар 2500 калори энерги шатаадаг бөгөөд үүний 30 хувийг өдөр тутмын үйл хөдлөлийн үед зарцуулдаг байна. Аль болох өндөр калори шатаадаг үйлдлүүдийг ухамсартайгаар сонгож сурцгаая. Дараах үзүүлэлтүүд 70 кг жинтэй хүн 1 цаг тутамд хэдэн калори энерги шатаадгийг харуулжээ. Үүнээс илүү жинтэй хүн харьцангуй их хэмжээний энерги, бага жинтэй хүн бол арай бага хэмжээний энерги шатаана гэсэн үг.

  • Унтах - 45
  • Телевиз үзэх - 72
  • Зүгээр суух - 81
  • Ном унших - 91
  • Секс хийх - 105
  • Машин жолоодох - 120
  • Шээх - 141
  • Тоос соруулах - 150
  • Хоол хийх - 176
  • Биллиард тоглох - 176
  • Машин засах - 200
  • Боулинг тоглох - 210
  • Хүүхэдтэй тоглох - 216
  • Нарийн бичгийн ажил - 240
  • Хөнгөн цэвэрлэгээ - 246
  • Гольф тоглох - 270
  • Шатаар өгсөх - 300
  • Будаг, шавар шохойн ажил - 317
  • Зүлэг хадах - 324
  • Иогоор хичээллэх - 360
  • Бүжиглэх - 370
  • Тавилга зөөх, цас ухах - 422
  • Унадаг дугуй унах - 441
  • Сагсан бөмбөг тоглох - 450
  • Хөлбөмбөг тоглох - 468
  • Аэробекээр хичээллэх - 480
  • Теннис тоглох - 549
  • Алхаx - 675
  • Усанд сэлэх - 720
  • Цанаар гулгах - 740
  • Дээс тоглох - 750
  • Гүйлтээр хичээллэх (10км/ц ) - 1118

Twitter-ийн ач тус

Токио хотын Акихабара дүүрэгт байрлах электрон барааны Ёдобаши дэлгүүрийн 00-д энэ сарын 5-ны орой нэгэн залуу оржээ. Япон улсад дэлгүүр, үйлчилгээний байгууллагуудын бие засах өрөөнд 00-ын цаасгүй байх нь маш ховор үзэгдэл боловч залуугийн аз дутаж 00-ын цаас дууссан байж. Наашаа ч гүй цаашаа ч гүй гацсан залуу гагцхүү сэргэлэн хүн л сэтгэж болох арга сэдсэн байна. Тэрээр өөрийн гар утсаар "туслаарай, 00-ын цаас, Ёдобаши дэлгүүрийн 3 давхар эрэгтэй жорлонд" гэж Twittert-т бичиж үлдээжээ.

Гэтэл энэ мэдээлэл нь twitter-ээр дамжиж явсаар 20 орчим минутын дараа хэн нэгэн хүн 00-ын цаас шидэж өгсөн байна. Энэ үйл явдлын тухай уншсан хүмүүс түүний twitter-t гадаадаас хүртэл олноор хандаж "ашгүй дээ", "энэ тухайгаа видео зохиомж хийгээч" гэх мэтчилэн сэтгэгдэл үлдээсэн байна. Мөн түүний тухай нэр хүндтэй сайтуудад мэдээлэгдэн залуу ч өөрөө дэлхий даяар алдаршиж байгаадаа нэг талаас итгэж ядан нөгөө талаас баяртай байгаа гэнэ.


эх үүсвэр; R25, SE's Weblog

Дэлхийн хамгийн жижиг их буу

Дундад зууны үеийн бөмбөлгөн сум бүхий үхэр бууг дууриалган хийсэн энэ жижиг их буу магадгүй дэлхийд хамгийн жижигд тооцогдож магадгүй юм. Youtube-ийн "43287633" хэрэглэгчийн бүтээсэн их буу "бие нь бага ч бэлчээр нь том" гэгчээр багагүй сүйтгэх чадалтай гэдгийг бичлэгээс харж болно. Хэсэг цул төмрийн хоёр хэсэгт жижиг нүх өрөмдөөд хийчихэд амархан мэт санагдаж магадгүй ч сониуч хүмүүст туршиж үзэх гэж оролдоод хэрэггүй гэдгийг зөвлөх байна. Бичлэгийн сэтгэгдэлд "компьютер лүү гээ, нүүр лүүгээ буудаад үзээч" гэх мэтчилэн бичигдсэн байгааг хэрэгжүүлэх гэж оролдвол ямархуу үр дүнд хүрэх нь ойлгомжтой юм. Иймд зөвхөн сонирхоцгооё...


Энэ их бууны сайжруулсан хувилбар гарсан байна. "Энэ бичлэг бол жинхэнэ, ямар нэгэн илбэ жатга хэрэглээгүй" гэнэ шүү.


Сони NEX-3, NEX-5 камерууд худалдаалагдаж эхлэнэ

Сони компани шинэ загварын компакт SLR камер бүтээж байгаа тухай өмнө мэдээлж байсан билээ. Тэгвэл энэ камерийн дэлгэрэнгүй үзүүлэлтүүд болон худалдаанд гарах хугацаа өнгөрсөн долоо хоногт зарлагдлаа. NEX-5, NEX-3 загварын камерууд ирэх сарын 3, 10-наас худалдаалагдаж эхлэх бөгөөд Сонигийн альфа загварын SLR камеруудад ашиглагддаг Exmor APS CMOS датчик, дүрс боловсруулах BIONZ системийг агуулахаас гадна их бие нь ердийн жижиг оврын компакт камераас ялгагдахгүй байх юм. NEX-5 загвар л гэхэд их биеийн зузаан 24.2мм, жин нь 229гр байх ажээ. Эдгээр үзүүлэлтээрээ дэлхийн хамгийн жижиг, хамгийн хөнгөн SLR камер хэмээн нэрлэгдэж байна.

Энэ камер нь мэдээж фото зургийн чанар маш сайн байхаас гадна дүрсний хамгийн сайн үзүүлэлт бүхий видео бичлэг хийх чадвартай байх юм. NEX-5 загварын хувьд дижитал телевиз, blu-ray тоглуулагч зэрэгт тохиромжтой AVCHD (1920x1080), компьютерт ажиллуулахад тохиромжтой MPG-4 (1440x1080, 640x480) формат бүхий дүрс бичлэгийг тус тус хийх боломжтой бөгөөд бичлэг нь memory stick-т файл хэлбэрээр хадгалагдах ажээ. 8 гигабайтын memory stick ашиглах тохиолдолд NEX-5 загварын хувьд дүрсний хэмжээнээс хамааран 1-5 цаг, NEX-3 загвар 2-5 цаг хүртэлх хугацаагаар бичлэг хийх боломжтой байх юм. NEX-3 загварын хувьд зөвхөн MPG-4 форматаар бичлэг хийнэ.

Шинэ камерийн зарим онцлогоос дурдвал 14.2 мегапикселтэй, ISO үзүүлэлт 12800, чичирхийлэл болон дүрсний сарнилтаас хамгаалах функцтэй учир шөнийн болон гэрэл багатай орчинд, трипод (тулгуур хөл) хэрэглэлгүйгээр чанартай фото зураг авах боломжтой юм. Мөн секундэд 7 кадр бүхий үргэлжилсэн фото зураг авах, 226 градусын панорама зураг бүтээх боломжтой. Үүнээс гадна автоматаар HDR зураг авах функц агуулсан байх ажээ. Өнөөдрийг хүртэл үйлдвэрлэгдэж буй нэг ч камер ийм төрлийн зураг авах чадваргүй байсан бөгөөд зориулалтын программ хангамжын тусламжтайгаар цайвар, дундаж, бараан гэрэл бүхий 3 дижитал фото зургийг нийлүүлэн бүтээдэг байсан. HDR зураг нь гэрлийн үзүүлэлтийн хувьд хүний нүдээр хардагтай хамгийн ойролцоо байдаг. Панорама зургийг ч мөн адил хэд хэдэн фото зургаас программ хангамж ашигласан бүтээдэг байсан юм.

Шинэ камертай хамт E16мм (F2.8), E18-55мм (F3.5-5.6), E18-200мм (F3.5-6.3)-ийн болон бусад төрлийн линз (дуран)-үүд, флаш гэрэл, микрофон зэрэг нэмэлт төхөөрөмжүүдээс сонгон худалдаж авах боломжтой бөгөөд нэмэлт холбогч адаптер худалдан авсан тохиолдолд урьд нь хэрэглэгдэж байсан альфа загварын бусад линзүүдийг ч мөн адил холбож ашиглаж боломжтой ажээ. Мөн ажиллуулахад маш хялбар, ойлгомжтой шинэ хэлбэрийн удирдах товчлуур болон функцүүдийг агуулсан бөгөөд 3 инчийн LCD дэлгэцийг дээшээ 80 градус, доошоо 45 градусаар эргүүлэн байрлуулж болох учир янз бүрийн төвөгтэй байрлалаас хялбар зураг авах боломжийг олгож байна.

NEX-3 загварын камерийг 16мм линзтэй бол 550 доллар, 18-55мм линзтэй бол 600 долларын үнэтэйгээр худалдаалах ажээ. NEX-5 загварын хувьд 16мм линзтэй бол 650 доллар, 18-55 линзтэй нь 700 долараар тус тус үнэлэгдэж байна. Харин 18-200мм-ийн линз нь дангаараа 900 долларын үнэтэй байх бөгөөд энэ оны намраас худалдаанд гарах төлөвтэй байгаа ажээ.

Мөн Сони компани Exmor APS HD CMOS датчикийг агуулахаас гадна NEX загварын дээрх камеруудад зориулагдсан линзүүдийг холбох боломжтой бичлэгийн AVCHD чанар бүхий видео камер бүтээж байгаа тухай мэдээлэгдэж байна. Одоогоор туршилт сайжруулалтын шатанд байгаа бөгөөд худалдаанд гарах тохиолдолд энэ чиглэлийн зах зээлд мөн л анхдагч болох юм. Фото камерт хэрэглэгддэг олон төрлийн линзийг видео камертай холбосноор бичлэгийн чанарын хувьд мэргэжлийн дүрс бичлэгийн камераас бараг ялгагдахгүй болох ба бичлэг хийх явцад зарим төрлийн дүрсний эффектүүдийг үүсгэх боломжтой болох юм.





Дашрамд дурдахад хэрэв та фото зураг сонирхдог, "мэргэжлийн" гэмээр өндөр чанартай зураг авч сурахыг хүсч байвал NEX загварын камер худалдаж авахыг хувийн зүгээс зөвлөж байна. Мэргэжлийн камерууд нь өндөр үнэтэй, овор хэмжээ том учир авч явахад төвөгтэй, учир нь үл олдох олон төрлийн товчлуур, функцүүдтэй байдаг бол шинэ камер илүү авсаархан, энгийн, хялбар болж чаджээ. Үнийн хувьд Nikon D3000, D5000 зэрэг сүүлийн үеийн хямд SLR камеруудтай ойролцоо боловч хэрэглэж байсан линз ашиглах тохиолдолд илүү хямд байж чадах юм. Ихэнх фото зураг сонирхогчид Nikon болон Canon төрлийн камеруудыг хамгийн сайн гэдэгтэй санал нийлдэг. Сонигийн SLR камерууд харьцангуй нэр хүнд багатай боловч нэгэнт SLR камер, дээр нь бусад камеруудад байхгүй онцлог чадваруудыг агуулсан учир фото зураг эхлэн сонирхогч хэн ч худалдан авахад буруудахгүй юм. Мөн ийм энэ камертай бол тусдаа видео камер худалдаж авах шаардлагагүй гэдгийг ч бас анзаарсан бизээ.


эх үүсвэр; sony.co.jp

Цахилгаан автомашиныг гар аргаар бүтээж болох уу?

Цахилгаан тээвэр компанийн инженерүүд Honda маркийн ердийн автомашиныг цахилгаанаар ажилладаг болгон хувиргасан тухай хэд хоногийн өмнөөс мэдээлэгдэх болсон билээ. Уг машиныг 220 вольтийн цахилгаанаар 6-8 цагын хугацаанд бүрэн цэнэглэх бөгөөд нийт 120 километр зайг 600 төгрөгийн цахилгаан зарцуулан туулах хүчин чадалтай гэжээ. Тус компани урьд нь доубус болон троллейбус угсарч үйлчилгээнд гаргаж байсан туршлагатай боловч үнэхээр цахилгаан машин бүтээсэн тухай дээрх товч мэдээнээс өөр илүү тодорхой мэдээлэл одоохондоо байхгүй байна. Иймдээ ч зарим нэг мэдээллийн сайтуудад л гэхэд уг мэдээнд эргэлзсэн, үл итгэсэн сэтгэгдлүүд цөөнгүй бичигдсэн байгаа юм. Үнэхээр шатахуунт хөдөлгүүрт машиныг гар аргаар цахилгаан машин болгон хувиргаж болох болов уу? Энэ талаархи хүмүүсийн эргэлзээг тайлах зорилгоор японы телевизийн сувгуудаар мэдээлэгдсэн дараах хоёр мэдээллийг хүргэж байна.

Гар аргаар бүтээсэн цахилгаан машин
Японы Сага муж, Аги хотын иргэн, автомашин худалдааны компаны засварчин 39 настай Наказава гар аргаар цахилгаан машин бүтээсэн байна. Тэрээр 1991 онд үйлдвэрлэгдсэн шатахуунт хөдөлгүүрт бага оврын суудлын хуучин тэргээ цахилгаан машин болгон өөрчилжээ. Наказава 2008 оны 11 сараас эхлэн сэлбэг цуглуулж эхэлсэн бөгөөд машинаа өөрчлөхөд жил гаруй хугацаа зарцуулсан байна. Батерей болон түүнтэй холбогдох эд ангиудыг олж угсрахад хамгийн хүндрэлтэй байсан бөгөөд бүх эд ангиудыг өөрөө худалдан авч цахилгаан машинд нийцүүлэн угсарчээ. Цэнэглэх хэсгийг мөн өөрийн гараар бүтээж гэр ахуйн цахилгаан сүлжээнээс цэнэглэх боломжтой болгосон байна. Түүний өөрчилсөн цахилгаан машин автомашины үзлэгт ямар нэгэн саадгүй тэнцэж одоо өдөр тутам унаж ашиглаж байна гэнэ.



1 сая иен зарцуулан гар аргаар цахилгаан машин бүтээж болно
Японы Хирошима муж, Ономичи хотын ШТС-ын ажилчин Такаги 20 мянган иенээр худалдан авсан шатахуунт хөдөлгүүрт хуучин машиныг цахилгаан машин болгосон байна. Тэрээр өнгөрсөн оны 11 сард цахилгаан машинд зориулагдсан эд ангиуд Нийгата мужийн нэгэн компанид худалдаалагдаж байгааг дуулаад өөрийн гараар цахилгаан машин бүтээхээр шийджээ. Үндсэн эд ангиуд нь бага оврын суудлын тэргэнд зориулагдсан бөгөөд тухайн үед 850 мянган иений үнэтэй байсан байна. Такаги хуучин машиныхаа шатахуунт хөдөлгүүр, радиатор, яндан зэргийг салгаж оронд нь шинээр худалдан авсан 6кв-ийн цахилгаан хөдөлгүүр, хурд тохируулагч, 12 в-ийн 8 ш батерей, цэнэглэгч зэрэг үндсэн эд ангиудыг угсарсан байна. Түүнийг машинаа хувиргахад засварчны мэргэжил эзэмшсэн нь тус болсон бөгөөд ажлынхаа зав зайгаар оролдож 1 сарын дотор дуусгасан байна.

Такаги; "Үнэнийг хэлэхэд тийм ч их хүндрэлтэй зүйл байгаагүй гэж хэлж болно. Угсралтын зураг төсөл огт байхгүй учир хаана яаж байрлуулж, хэрхэн угсрахаа бүгдийг өөрөө бодож олсон. Зарим тохиолдолд техникийн мэдлэг бага зэрэг шаардагдсан" хэмээн сурвалжлагчид ярьжээ. Дээрх үндсэн эд ангиудаас бусад шаардлагатай зүйлсийг орон нутгийн гэр ахуйн барааны дэлгүүрээс худалдаж авсан байна. Түүний цахилгаан машин гэр ахуйн цахилгаан сүлжээнээс 10 цагийн хугацаанд бүрэн цэнэглэгдэж 50 км/ц орчим хурдтайгаар 40 км зайг туулах чадалтай болжээ. Машин унах үеийн зардал шатахуунтай харьцуулахад 10 дахин багассан бөгөөд, батерэйг удаан хэрэглэх үүднээс айркон зэргийг ашигладаггүй боловч ойр зуур дэлгүүр явах зэрэгт тохиромжтой, эко унаатай болсон байна. Мөн автомашины үзлэгт ямар нэгэн асуудалгүй тэнцжээ. Машинаа цахилгаан болгон өөрчлөхөд нийтдээ 1 сая иений зардал гаргасан байна.



Эдгээр мэдээг дуулсны эцэст манай монгол инженерүүдийн мэдлэг боловсрол, ур чадвар японы жирийн нэг засварчдаас дутна гэж та бодож байна уу? Дашрамд дурдахад бодит амьдралд иймэрхүү жишээ олон байгаа бөгөөд автомашин болон техник сонирхогч таньд үзээд алдах сэтгэл төрж байж магадгүй, надад ч мөн адил...

Apple-ийн дараагийн бүтээгдэхүүн ... iWatch?

Apple цаашид биднийг гайхшруулсаар байх уу. i нэртэй бүтээгдэхүүнүүдийн дараагийнх нь том овор хэмжээ бүхий iTable биш, iWall бол бүр ч биш, эсрэгээрээ жижгэрч магадгүй бололтой. Энэ удаад өмнө мэдээлж байсан цаг-гар утастай төстэй iWatch хэмээх концепт загвар бүтээгджээ. Одоогоор энэ бүтээгдэхүүн нийтэд худалдаалагдах эсэх нь тодорхойгүй байна. Дизайн, урлагийн чиглэлийн сайтад анх мэдээлэгдсэнээс үзвэл албан ёсоор бүтээгдэхүүн болон гарах эсэхэд эргэлзээ төрж болох ч, зарим үзүүлэлтүүд нь тодорхой болжээ. Үүнд;
- Хөнгөн цагаан их бие,
- WiFi болон Bluetooth,
- RSS уншигч,
- 16GB санах ой,
- Цаг агаарын мэдээ үзүүлэх боломж;
- Bluetooth болон WiFi ашиглан iPhone, iPad-тай холбогдох боломж,
- LCD проектор,
- Олон төрлийн өнгөтэй байхнээ.





эх үүсвэр; ADR studio

LED гэрэл бүхий шүршүүр

Японы Sugihara engineering компани LED гэрэл бүхий шүршүүр зохион бүтээж одоогоор европын орнуудад нийт 60 мянган ширхэгийг худалдаалаад байна. LED гэрэл нь усны даралтын хүчээр үүсэх цахилгаанаар гэрэлтэх учир батерей болон нэмэлт цахилгаан тэжээл шаардлагагүй юм. Мөн гэрэлтэлтийн горимоос хамаарах 2 төрлийн шүршүүр худалдаалагдаж байгаа ажээ. Мulticolor төрлийн шүршүүрийн гэрлийн өнгө 3 секунд тутамд 6 өнгөөр ээлжлэн солигдох бөгөөд орчны гэрэл багатай үед романтик орчин бүрдүүлэх, мөн зочид буудал зэрэг газруудад ашиглахад тохиромжтой ажээ.

RGB color төрөл нь усны температураас хамааран гэрлийн өнгө өөрчлөгддөг байна. Усны температур 32 хэмээс бага тохиолдолд хөх, 33-41 хэм үед ногоон, 42-45 үед улаан гэрэл асна. 46 хэмээс илүү нэмэгдэх тохиолдолд улаан гэрэл анивчдаг. Үүгээрээ усны температурыг нүдээр харж тохируулах боломж бүрдүүлэх учир бага насны хүүхэд болон өндөр настангууд ашиглахад тохиромжтой ажээ. Мөн шүршүүр дотор байрлах шүүлтүүрийн тусламжтайгаар усны даралтыг харьцангуй нэмэгдүүлж уламжлалт шүршүүртэй харьцуулахад усны зарцуулалтыг 40% бууруулах боломж бүрдүүлсэн эко бүтээгдэхүүн юм. Энэ шүүлтүүр 6000 - 8000 иений үнэтэйгээр худалдаалагдаж байна.




эх үүсвэр; led-eco

Сайтын хандалт сард 1 тэрбум болжээ

myYearbook хэмээх олон нийтийн сүлжээ сайтын тухай сонсоогүй хүн олон байгаа байх. Энэ сайтыг өсвөр насны хүүхдүүдэд зориулан 2005 оны 4 сард 14, 15 настай хоёр хүүхэд хамтран нээж байжээ. myYearbook сайт нээгдсэнээс хойш нийт хандалтын тоо 55.7 саяд хүрч, нэг сарын хугацаанд дунджаар 4.3 сая удаа хандалт хийгддэг байсан байна. Гэтэл өнгөрөгч 11 сараас үндсэн хэрэглэгчийн тоо 23 хувь өссөн бол хуудас нээгдэлтийн тоо 83 хувь өсч 998 саяд хүрч огцом нэмэгджээ.

Учир нь 11 сард шинээр нээсэн Chatter хэмээх шинэ нэмэлттэй холбоотой ажээ. Энэ нэмэлт нь бусад CNC сайтуудтай адил гишүүдийн бичсэн шинэ тэмдэглэлүүдийг сайтын бусад хэрэглэгчдэд харуулдаг боловч зөвхөн өөрийн найзуудын хүрээнд бус ямар нэг байдлаар дам холбогдох бусад үл таних хүмүүст ч бас харуулдагаараа хэрэглэгчдийн таашаалд нийцжээ. Мөн тэмдэглэл, бичлэг хийсэн хүн нь зөвхөн хүссэн хүмүүстээ сонгон харуулахаар (жишээ нь зөвхөн 20-30 насны эмэгтэй хүмүүст) тохируулах боломжтойгоороо онцлог юм.

Одоогийн байдлаар уг сайт 34.1 сая доллараар үнэлэгдэж байгаа бөгөөд Chatter-т өдөрт 1 сая шинэ тэмдэглэл нийтлэгдэж байна. Мөн бусад сайтуудад байдаг асуулт хариулт зэрэг үйлчилгээнүүдийг Chatter-тай нэгтгэж "намайг үнэл" зэрэг нэмэлтүүд оруулснаар өөрийн бичлэг болон фото зураг зэргийг үзсэн үл таних хүмүүсээс үнэлгээ авах боломжтой болжээ. Эдгээр нэмэлтүүдээс гадна Chatter-ийн шинэ мэдээллүүдийг Twitter-тэй холбож өгсөн нь сайтыг хэрэглэгчдын тоо эрс нэмэгдэхэд эерэгээр нөлөөлж Америкт л гэхэд хуудас нээгдсэн тоогоор сүүлийн 3 сарын хугацаанд Twitter-ээс илүү гардаг болсон байна.

Дашрамд дурдахад манайд дээрхтэй адил өсвөр насны хэрэглэгчдэд зориулагдсан Веб 2 орон зай хоосон байгаа билээ. Хэдийгээр интернетэд холбогдох боломжтой хүүхдүүд харьцангуй цөөхөн, монгол хэлээр харилцдаг хэрэглэгчдийн тоо хязгаарлагдмал байдаг боловч олон нийтийн сайт болон энэ чиглэлийн бизнес сонирхогч залуус одооноос нэгийг бодож байхад илүүдэхгүй бизээ. Нөгөө талаас олон нийтэд зориулагдсан болон вебд суурилсан үйлчилгээний хэрэглээ болон хэрэглэгчдийн тоог нэмэгдүүлэхэд дээрх жишээ бага ч болов санаа өгөх буйзаа.


эх үүсвэр; TechcCrunch

Үл таних царайлаг эмэгтэй эрчүүдийг 5 минутад л үхүүлж чадна

Эрчүүд үл таних царайлаг эмэгтэйн хажууд 5 минут хугацаагаар байхад л зүрхэнд сөрөгөөр нөлөөлөхүйц хэмжээний стресст ордогийг Испанийн Valencia их сургуулийн эрдэмтдийн хийсэн судалгааны үр дүн харуулсан байна. Ялангуяа өөрийгөө тухайн эмэгтэйгээс зиндаа доогуур хэмээн бодож байсан ч сонирхолыг нь татах гэж оролдох нь илүү муу нөлөө үзүүлдэг байна. Мөн ийм байдалд орсон эрчүүдэд төрж буй айдас түгшүүрийг онгоцноос үсрэхтэй зүйрлэж болохоор байдаг гэнэ.

Учир нь энэ тохиолдолд стрессийн гэгдэх cortisol гормоны ялгарлын хэмжээ эрс нэмэгдэж зүрхний импракт болох магадлалд ойртдог байна. Бие махбодын болон сэтгэл санааны стресс удаан хугацаанд үргэлжлэх нь уг гормоны ялгарлын түвшинг нэмэгдүүлэх нөхцөл болдог. Туршилтаар 84 эрэгтэй оюутныг үл таних царайлаг эмэгтэйтэй хамт тусгаарлан cortisol гормоны ялгарлыг хэмжсэнээр дээрх дүгнэлтэд хүрчээ. Уг гормоны ялгарал бага хэмжээгээр нэмэгдэх нь эрсдэлтэй нөхцөл байдалд амьд үлдэх болон өвчнийг тэсвэрлэх чадварыг нэмэгдүүлэх нөлөө үзүүлдэг боловч их хэмжээгээр нэмэгдэх нь аюултай ажээ.


эх үүсвэр; dailytelegraph

Донорын зүрхийг 10 хоног амьдруулж чаджээ

Донор эрхтэн шилжүүлэн суулгах эмчилгээнд эргэлт хийх нээлтийг Харвардын их сургуулийн эрдэмтэд хийсэн байна. Тус сургуулийн профессор Hemant Thattle 21 төрлийн химийн бодисоос бүрдэх Somah хэмээх уусмал гарган авч, түүний тусламжтайгаар гахайн зүрхийг биеэс нь салангид байдалд 10 хоногийн турш амьд хадгалж чадсан байна. Уг уусмал нь эд эрхтэний бодисын солилцоог хангаж үхжихээс сэргийлэх чадвартай ажээ.

Түүгээр ч зогсохгүй задлан шинжилгээгээр биенээс салган бага температурт хадгалж байсан гахайн зүрхийг цусны эргэлтийн хиймэл систем ашиглан 24 цагийн дараа дахин цохилуулж чадсан байна. Өнөөг хүртэл анагаах ухааны практикт шилжүүлэн суулгах зорилгоор донорын зүрхийг 4 цаг хүртэлх хугацаанд л хадгалж чаддаг байсан юм. Тухайн өвчтөнд тохирсон донор эрхтэн суулгах эмчилгээ цаг хугацаа болон орон зайн хүчин зүйлээр хязгаарлагдаж байдаг. Өөрөөр хэлбэл 4 цагаас илүү хугацаагаар зүрхний эд эсийг муутгалгүйгээр хадгалах боломжгүй учир донорын зүрхийг өвчтөнд хүргэхийн тулд өртөг өндөртэй тусгай зориулалтын нисэх онгоц зэргийг ашигладаг байжээ.

Somah уусмалыг ашигласнаар донор эрхтэнг дунджаар 7 хоног хугацаагаар хадгалах боломж бүрдэж хадгалалт тээвэрлэлтийн зардал үлэмж хямдрах юм. Хамгийн гол нь яаралтай эрхтэн шилжүүлэн суулгах шаардлагатай олон өвчтөний амь насыг аврах боломж бүрдэж байна. Зөвхөн америкт л гэхэд жил бүр 1000 өвчтөнд донор эрхтэн суулгах шаардлагатай байдаг бөгөөд донорууд ихэвчлэн тархи нь үхэжсэн өвчтөнүүд байдаг байна. Энэ нээлтийг хүний бие эрхтэнд ашиглахад одоогоор эрт байгаа бөгөөд хэдэн жилийн судалгааны ажил шаардлагатай юм байна.




эх үүсвэр; Harvard university