Хятадын хурдан галт тэрэгний шинэ шугам нээгдэв

Өнөөдөр буюу Хятадын коммунист намын 90 жилийн ойн өмнөх өдөр хурдан галт тэрэгний Бээжин Шанхай хотуудыг холбосон шугам ашиглалтад орж нийт 1318 км зайг 300км/ц хүртэлх хурдтайгаар 5 цаг хүрэхгүй хугацаанд туулах боломжтой болж байна. 2 жилийн өмнө Бээжин Тэнжин хотуудын хооронд анхны шугамыг ашиглалтад оруулж байсан бол 2020 он гэхэд хурдан галт тэрэгний замын нийт уртыг 15000 км-т хүргэхээр төлөвлөж байна. Эрх баригчдын мэдэгдэж байгаагаар хятад улс өөрийн бие даан хөгжүүлсэн хурдан галт тэрэгний технологи тус улсын хот хөдөөгийн ялгааг арилгаж эдийн засгийн өсөлтийг хангахаас гадна техник технологийн хөгжлийн түвшин хэр байгааг дэлхий нийтэд харуулсан үйл явдал болж байна. Мөн хурдан галт тэрэгний аюулгүй байдал шаардлагатай хэмжээнд хангагдсан хэмээн мэдээлж байгаа юм.

Гэвч энэ бүх мэдээллийн ар талд бодит байдал зарим талаар өөр байгаа бололтой. Хятадын дотоодын нэгэн сонинд тус улсын төмөр замын мэргэжилтний яриаг үндэслэн мэдээлснээр Бээжин Шанхайг холбох CRH380B загвар нь японы хурдан галт тэрэгний хуулбар юм байна. Үнэн чанартаа Хятад улс хурдан галт тэрэгний технологийн туслалцааг анх япон болон герман улсуудаас авч байжээ. CRH380B загварыг хэдийгээр японы технологид суурилан өөрсдөө хөгжүүлсэн байж болох ч уг галт тэрэгний зүтгүүрийн хэсэг Япон улсын Хаятэ хурдан галт тэрэг (шинкансэн)-тэй туйлын төстэй байгаа тухай мэргэжилтнүүд онцолж байна. Хаятэ хурдан галт тэрэг 2002 оноос хойш Токио болон тус улсын зүүн хойд мужуудын хооронд явж байгаа юм. Тус хурдан галт тэрэгний дээд хурд хятадын CRH380B загвартай адил 300 км/ц боловч замын нөхцөл болон аюулгүйн үүднээс 270 км/ц-аас хэтрүүлдэггүй байна.

Хаятэ загвар нь японы Kawasaki heavy industries компанид үйлдвэрлэгдсэн бөгөөд тус компани өмнө нь хятдуудад хурдан галт тэрэгний технологийн туслалцаа үзүүлж байжээ. Хятадууд шинэ галт тэрэгний технологийн патентийг америкт бүртгүүлэхээр төлөвлөж байгаа нь ч хардлага төрүүлж байна. Харин Kawasaki heavy industries компани патентийн асуудал тодорхой болоогүй цагт ямар нэгэн мэдэгдэл хийхгүй гэжээ. Мөн CRH380B загварын хурдан галт тэрэгний дээд хурдыг 350 км/ц хүргэхээр төлөвлөж байсан боловч энэ тохиолдолд аюулгүй шаардлага бүрэн хангагдахгүй гэж үзсэн япон мэргэжилтнүүдийн анхааруулгых хүлээн авч 300 км/ц байлгахаар тогтсон байна.

Харин Тайваний хэвлэлд мэдээлж байгаагаар уг хурдан галт тэрэгний аюулгүй байдал шаардлагат хэмжээнд хүртэл хангагдаагүй байна. Үүнд төмөр замын аюулгүй байдлын төлөвлөлт болон түүнийг хэрэгжүүлэх үйл ажиллагаа хангалттай хийгдээгүй, зам дагуух хөрсний суултыг дутуу тооцсоноос үүдэн хөдөлгөөнд саад учрах зэргээр инженерийн байгууламжийн дутагдалтай асуудлууд цөөнгүй байгаа бололтой. Мөн захиалагч талын эрх бүхий хүмүүс авилгад автагдсан, гүйцэтгэгч байгууллага намын их хурлын өмнө дуусгахын тулд цаг хугацаанд хэтэрхий шахагдаж зарим шаардлагатай ажлыг ор нэрийн төдий хийсэн тухай гонконгийн сонин мэдээлж байна. Энэ оны эхээр хятадын төмөр замын сайд Лиу Зижин 123 сая долларын авилга авсан хэргээр албан тушаалаасаа бууж байсан билээ. Энэ хэрэгт хурдан галт тэрэгний ажил гүйцэтгэгч компаниуд ч мөн адил холбогдож байсан байна.




эх сурвалж; new-maskedrider

Хагас автомат жолоодлогын систем

Автомашин үйлдвэрлэгч Волксваген компани хагас автомат жолоодлогын системийг танилцуулсан байна. Түр зуурын автомат жолоодлого (Temporary Auto Pilot -TAP) хэмээн нэрлэгдэх энэхүү систем нь уламжлалт жолоодлогыг дэмжих систем болон бүрэн автомат системийн завсрын технологи юм. ТАР систем бүхий автомашиныг жолоодох үед жолоодлогын үеийн хяналтыг жолооч тасралтгүй гүйцэтгэх боловч жолоо залах, хурд тохируулах зэрэг үйлдлүүдийг хийх шаардлагагүй юм. Систем нь хөдөлгөөнд оролцож буй машин хоорондын аюулгүйн зайнаас хамааруулан машины хурдыг тохируулах, замын хязгаарын тэмдэглэгээгээр баримжаалан машиныг замын эгнээний голоор явуулах үйлдлийг тус тус автоматаар гүйцэтгэдэг байна.

Мөн замын түгжрэлийн үед машиныг автоматаар зогсоох, маневр хийх боломжтойгоос гадна хурдны замд 130 км/ц хүртэлх хурдтай давхих үед ч хагас автомат жолоодлогоор хангах чадвартай юм. ТАР систем радар, камер, лазерийн сканнер бүхий хэт авианы мэдрэгчээр тоноглогдсон байна. Гэхдээ ийм төрлийн системийг богино хугацаанд хэрэглээнд нэвтрүүлэх боломгүй учир бодит байдалд уймраа жолооч нар жолоодлогын алдаа гаргах үед ослоос сэргийлэх зорилгоор, мөн жолоодлогын нэгэн хэвийн нөхцөл байдал болон түгжрэл зэрэг хязгаарлагдмал хурдтай явах тохиолдолд хэрэглэхэд тохиромжтой ажээ.


эх сурвалж; gizmag

Хийсвэр теннис тоглоом

Happinet компани үл үзэгдэгч өрсөлдөгчтэй тоглох хийсвэр теннис тоглоомыг Tokyo Toy Show 2011 үзэсгэлэнд танилцуулсан байна. Хийсвэр теннис нь зөвхөн цохиураас бүрдэх боловч түүний тусламжтайгаар бөмбөг цохих мэт хөдөлгөөн хийх төдийд өөрөө өөртэйгээ теннис тоглох боломжтой юм. Цохиур (ракет) нь чанга яригч болон хөдөлгөөний мэдрэгчийг агуулж, тоглогч хийсвэр бөмбөгний цохилтын чимээг сонсож түүний хэмнэлийг мэдэрч тоглодог. Мөн цохиурын бариулд байрлах товчлуурыг дарангаа цохих хөдөлгөөн хийвэл илүү хүчтэй цохилт хийнэ. Харин цохилтын дууны хэмнэлийг хамгийн сайн мэдэрч тоглож чадсан хүн ялагч болдог байна.

Тоглоом нь эхлэн суралцагчдад зориулсан "хэмнэл", дунд болон дээд шатныханд зориулсан "тэмцээн" хэмээх 2 хувилбартай юм. Уг тоглоомын үндсэн зарчим нь тасралтгүй тоглож байгаа мэт боловч тоглоомыг үргэлжлүүлэх тусам хийсвэр өрсөлдөгчөө ялах хүсэлд автдаг байна. Мөн гэртээ ганцаараа тоглох боломжтой ч баяр ёслолын үед олон хүн цугласан газарт элдэв хөгжилтэй хөдөлгөөн хийж тоглох замаар баярын уур амьсгалыг өндөрсгөх боломжтой. Кибер теннисийг энэ оны 10-р сараас эхлэн 25 долларын үнэтэйгээр худалдаалахаар төлөвлөж байна.



Дашрамд дурдахад ихэнх дижитал тоглоомуудыг дэлгэц дээрх дүрслэлийг харж, өөрөөр хэлбэл нүдээр харж тоглодог бол энэ тоглоом чихээр сонсож тоглодгоороо онцлог юм. Магадгүй ийм төрлийн анхны тоглоом байж ч болох юм. Иймд харааны бэрхшээлтэй хүмүүс тоглонгоо хөгжилтэйгээр хөдөлгөөний дутагдлаас сэргийлэхэд тун ч тохиромжтой тоглоом болжээ.

эх сурвалж; diginfo

"Лусын дагина" хоол боловсруулах эрхтний бичил дуран

Хоол боловсруулах замын эрхтнүүдийн оношилгоонд ашиглагдаж буй үрэл хэлбэрийн дуранг дурын чиглэлд удирдан хөдөлгөх боломжгүй байгаа тухай өмнө нь мэдээлж байсан билээ. Тэгвэл Казүхидэ Кагүчи тэргүүтэй Осака хотын анагаахын коллежийн судалгааны багийнхны бүтээсэн үрэл хэлбэрийн бичил дуран энэ асуудлыг бүрэн шийдвэрлэж чаджээ. Эндоскоп буюу үрэл хэлбэрийн дурангийн хойд хэсэгт загасны сүүлтэй төстэй хөдлөх хэсэг байрлуулснаар дуранг хүссэн чиглэлд удирдан хөдөлгөх боломж бүрдсэн байна.

Өмнө нь бүтээгдсэн адил төрлийн дурангууд дотоод эрхтнүүдийн булчингийн агшилтын хүчээр зөвхөн нэг чиглэлд, хоол боловсруулах замын дагуу хөдөлдөгөөс ходоод, бүдүүн гэдэсний ханын зургийг бүрэн авах боломжгүй байсан юм. Мөн Рёококу их сургуулийн эрдэмтдийн хамтарсан судалгааны үр дүнд бичил дуранг соронзон орны тусламжтайгаар зайнаас удирдаж чаддаг болжээ. Бичил дурангийн диаметр 1см, урт нь 4.5 см юм.

"Лусын дагина" хэмээн нэрлэгдэх энэхүү бичил дуранг цаашид илүү сайжруулах шаардлагатай байгаа бөгөөд хэрэглээнд нэвтрэх хүртэл дахин хэдэн жилийн хугацаа зарцуулах ажээ. Энэхүү дуран нь ходоод болон бүдүүн гэдэсний гуурс бүхий уламжлалт дуран ашиглах үед өвчтөнд үүсэх зовиурыг бүрэн арилгаж чадах юм.



эх сурвалж; mailonline

Гар утсыг "галаар" цэнэглэнэ

Япон улсын TES NewEnergy компани дулааны энергиэс цахилгаан үүсгэх чадвартай костроль бүтээж худалдаалж эхэлсэн байна. Уг бүтээгдэхүүний тусламжтайгаар ухаалаг гар утас, MP3 тоглуулагч, GPS зэрэг зөөврийн төхөөрөмжүүдийг USB холболтоор цэнэглэх боломжтой юм. TES NewEnergy компанийн захирлын хэлсэнээр 3-р сард байгалийн гамшиг тохиолдож олон хүн орон гэргүй болсны дараа уг бүтээгдэхүүнийг үйлдвэрлэх санаа төрсөн байна. Костролийн ёроолд байрлах термоэлектрик шинж чанар бүхий материал буцалсан усны дулааны энергийг цахилгаан энергид хувиргадаг байна.

Мөн хоногийн аль ч цагт хэрэглэж болохоос гадна овор хэмжээ багатай учир зөөвөрлөн авч явахад тохиромжтойгоороо нарны цахилгаан үүсгүүрээс давуу талтай юм. Нэг удаагийн өдрийн хоол бэлтгэх үед үүссэн дулааныг ашиглан айфон утсыг 3-5 цагийн турш цэнэглэх боломжтой байдаг байна. Уг бүтээгдэхүүнийг байгалийн гамшиг тохиолдсон үед, аялал жуулчлалын зорилгоор, мөн цахилгаан хангамжийн хүртээмж муутай хөгжиж буй орнуудад хэрэглэхэд тохиромжтой бөгөөд энэ сараас эхлэн 300 долларын үнэтэйгээр худалдаалж эхэлсэн байна.



Дашрамд хэлэхэд манай хөдөө орон нутгийн нөхцөл байдалд тохирсон болон аялал жуулчлалын зэрэг бусад зорилгоор иймэрхүү төхөөрөмжүүдийг бүтээх боломж, зах зээл байгааг сонирхож буй хүмүүс анзаарахад илүүдэхгүй бизээ. Хөдөөд цахилгаан хангамж болон үүсгүүрийн хүрэлцээгүйгээс гар утас хэрэглэх боломжгүй хүмүүс цөөнгүй байдаг. Мөн манай зохион бүтээгчид хөдөө хээрийн нөхцөлд зууханд шатааж буй түлшний дулааны энергийг цахилгаан энергид хувирган батерэйг цэнэглэх, улмаар чийдэн, телевизор зэрэг төхөөрөмжүүдийг 6 цаг хүртэлх хугацаанд цахилгаанаар тасралтгүй тэжээх чадвартай төхөөрөмж бүтээсэн тухай саяхан мэдээлэгдэж байсан билээ.

эх сурвалж; physorg

Ирээдүйн хүнсний голлох 10 нөөц

Цаг агаарын өөрчлөлт, хүн амын өсөлт, дэлхийн эдийн засгийн хямрал, бүс нутгийн чанартай тогтворгүй байдлаас үүдэн хүнсний бүтээгдэхүүний үнэ өдөр ирэх тусам өсч, олон улс орон зарим төрлийн нөөцийн хомсдолд орж эхлээд байна. Мөн хүнсний бүтээгдэхүүний хомсдолоос үүдэлтэй дэлхийн дайн (3-р) ч гарч болох тухай зарим судлаачид өгүүлж байгаа билээ. Эдгээр болон бусад нөхцөл байдлаас шалтгаалан хүнсний бүтээгдэхүүний голлох нөөцүүд, тэдгээрийг үйлдвэрлэх арга хэлбэрийн хувьд зарим өөрчлөлтүүд гарч эхлээд байна. Ойрын ирээдүйд ямар төрлийн хүнсний нөөцүүд голлох тухай одоо хийгдэж байгаа судалгаанууд болон эрдэмтэдийн үзэл бодолд үндэслэсэн нэгэн таамаглалыг сонирхоцгооё.

Үрэл
Хүмүүс тэр болгон таашаахгүй байж болох ч үрэл хэлбэрийн хоол хүнс бий болно. Ихэвчлэн уран зөгнөлт кино зохиолд өгүүлсэнээр бидний мэддэг хүнсний үрлэн бүтээгдэхүүн та бидний төсөөлөөчгүй байхад амьдралд нэвтэрч эхэлжээ. Одоогоор витаминыг үрэл хэлбэртэйгээр үйлдвэрлэж байгаа боловч ийм төрлийн хүнс тэжээлийн бүтээгдэхүүн зохион бүтээгдэж эхлээд байна. Их британийн эрдэмтэд эрүүл хооллолтын шаардлагуудыг хангасан үрлэн хүнс бүтээжээ. Зохион бүтээгчдийн мэдэгдэж байгаагаар 2.5 кг төмсөнд агуулагдах витамин болон эрдэс бодисыг ширхэг үрэл болгон агуулдаг байна. Бодит байдалд нэг удаагийн хооллолтоор 2.5 кг төмс идэхийг хэн ч хүсэхгүй боловч энэ нь үрлэн хүнс бүтээх боломж хангалттай байгаагийн илэрхийлэл болохоос гадна хүнсний ногоо, шарсан тахиа болон десертийг үрэл хэлбэрээр хэрэглэх нь зөвхөн цаг хугацааны л асуудал болоод байгаа гэдгийг харуулж байна.


Лабораторт ургуулсан мах
Шилэн хоргонд ургуулсан мах үрлэн хүнсний адилаар хүмүүсийн таашаалыг тэр болгон хүлээхгүй боловч уламжлалт мах, махан бүтээгдэхүүний үйлдвэрлэлийг ийм хэлбэрээр орлуулах бүрэн боломжтой юм. Мал, мах бэлтгэлийн уламжлалт арга нь амьд малыг өсгөж үржүүлэхийн тулд их хэмжээний буудайн төрлийн тэжээл болон зай талбай шаарддаг тул туйлын үр ашиггүй хэлбэр юм. Харин лабораторт мах ургуулахын тулд тэжээл шаардлагагүй бөгөөд бэлчээрийн хэрэгцээ мөн адил байхгүй. Одоогийн байдлаар мах ургуулахын тулд гахайн булчингийн эд эсийг үхрийн цусны ийлдэсийн тусламжтайгаар өсгөж байна. Хэдийгээр хиймэл мах бүтээх ажил 100% амжилттай хэрэгжиж чадаагүй байгаа боловч эрдэмтэд уламжлалт махтай адил амт, чанартай болгохын төлөө ажилласаар байна.


Босоо ферм
2050 он гэхэд дэлхийн хүн амын тал хувь нь томоохон хотуудад амьдарч, хот суурингийн газар нутгийн хэмжээ ихээхэн томорсоноор тэдгээрийн хүн амыг хангах хэмжээний хөдөө аж ахуйн талбайн дутагдалд орж эхлэнэ. Харин тэнгэр баганадсан өндөр барилгуудад байгуулагдах босоо фермүүд жилийн турш хүнсний бүтээгдэхүүн үйлдвэрлэх боломж олгож дээрх хүндрэлээс зайлсхийхэд туслах юм. Ийм хэлбэрийн фермүүд нь хүнсний бүтээгдэхүүний тээвэрлэлтийн болон хог хаягдал, орчны бохирдолтой холбоотой зардалыг эрс багасгана. Мөн харьцангуй хязгаарлагдмал, тусгаарлагдсан орчинг бий болгох учир хортон шавьж устгах бодисын хэрэглээг эрс багасгах зэргээр уламжлалт хөдөө аж ахуйн үйлдвэрлэлд тохиолддог олон хүндрэлийг шийдвэрлэх юм. Энэ технологи одоогоор дөнгөж төслийн шатанд байгаа боловч 2070 оноос ийм төрлийн фермүүд түгээмэл болж дэлхийн аль ч хотоос харж болно гэдэгт мөрийцөхөд ч бэлэн байна.


Акуапоник (Aquaponics)
Загас үржүүлгийн үйл ажиллагаанд тохиолдож буй хүндрэлтэй асуудал нь хэдхэн тооны загас үржүүлэхийн тулд том хэмжээний ферм байгуулах шаардлагатай болдог явдал юм. Тэгвэл акуапоник нь загас үржүүлэг, хөдөө аж ахуй эрхлэгчдэд усны хэмжээ болон ургамал тариалах зай талбайг эрс багасгах боломж олгохоос гадна хүмүүст уураг болон ургамлын төрлийн хэрэгцээг нэгэн зэрэг хангах боломж олгоно. Акуапоник нь загас, далайн амьтан үржүүлэх (aquaculture), хөрс шороогүйгээр усан орчинд хүнсний ургамал тариалах (hydroponics) аж ахуйнуудын нэгдэл юм. Ус болон загаснаас ялгарах хаягдал нь аквариумын доод хэсэгт тунана. Тухайн хэсэг хаягдлаас үүсэх шим тэжээлт бодисоор баялаг болох үед усыг шугам хоолойгоор дамжуулан ургамал ургах хэсэгт шилжүүлнэ. Энэ нь ургамлыг тэжээх нөхцөлийг бүрдүүлэх бөгөөд ургамлууд усыг цэвэршүүлэн хүчилтөрөгчөөр баяжуулсаны дараа загас байрлах аквариум руу буцаж шилждэг. Ийм маягаар систем өөрийн шаардлагат хэрэгцээг өөрөө бүрэн хангадаг байна.


Хөвөгч ферм
Акуапоник систем нь уламжлалт үржүүлгийн арга (aquaculture)-тай харьцуулахад илүү жижиг төрлийн загас үржүүлэхэд тохиромжтой юм. Харин том оврын загас үржүүлэхийн тулд эрдэмтэд далайд хөвөгч том хэмжээний тор хэлбэрийн байгууламжийг санал болгож байна. Энэ арга нь бусад аргатай харьцуулахад загасанд хал балгүйгээр бохирдлыг зайлуулах боломжтойгоороо давуу талтай юм. Мөн далайн ёроолд амьдардаг хавч, сам хорхой хэлбэрийн амьтадыг ч бас агуулах боломжтой учир тэдгээр нь загаснаас ялгарах хаягдлыг идэж боловруулан байгаль орчинд учрах сөрөг нөлөөллийг багасгадаг байна. Уг арга одоогоор судалгаа шинжилгээний түвшинд байгаа боловч ирээдүйн загас үржүүлгийн үндсэн хэлбэр болно гэж эрдэмтэд үзэж байна.


Шавьж
Хүний өдөр тутмын хоол хүнсэнд чухал шаардлагатай уургийг бэлтгэхийн тулд байгал орчинд сөрөг нөлөө бүхий мал аж ахуйг эрхэлж, их хэмжээний бэлчээр шаардагдаж, загасны нөөцийг хомсдоход хүргэж байгаа нь амьтнаас өөр төрлийн уургийн эх үүсвэрийг хайхаас өөр аргагүй болгож байна. Уургийн өөр төрлийн эх үүсвэрт тохирох нөөц бол шавьж юм. НҮБ-ийн Хүнс Хөдөө Аж Ахуйн байгууллагын мэдээгээр дэлхий дээр хүнсэнд хэрэглэж болох 1462 зүйлийн шавьж байдаг байна. Элдэв гаж хоол хэрэглэх уралдаан тэмцээнээс бусад нөхцөлд шавьж идэж зүрхлэх хүн цөөхөн байж болох ч дэлхийн 90 гаруй улсад хүмүүс 1000 жилийн өмнөөс шавьжийг хоол хүнсэндээ хэрэглэсээр иржээ. Хэрэв багахан хүчин чармайлт гаргавал уураг үйлдвэрлэхийн тулд гахай, үхэр үржүүлэхээс илүү бага зай талбайд шавьж үржүүлэх боломжтой хэмээн зарим эрдэмтэд үзэж байна. Мөн 500 грам голио, царцаанаас мөн адил хэмжээний үхрийн маханд агуулагдах шим тэжээлийн бодисыг гаргаж авах боломжтой байдаг байна.


Усны бичил биетүүд (Phytoplankton)
Хэрэв та далай болон нуурын уснаас залгисан тохиолдол байгаа бол бичил биетнүүдийг ямар нэг хэмжээгээр идэж хэрэглэсэн гэсэн үг. Усанд хөвөгч ногоон ургамлын нэг төрөл болох замгийг микроскопоор томруулан харвал тэрбумаар тоологдох бичил биетүүд, олон төрлийн витамин болон шим тэжээлт бодисуудыг агуулж байгааг мэдэж болно. Нэг эст бичил биетүүд хуваагдлын замаар үрждэг учир эх газрын амьтадтай харьцуулахад өсөж үржих хурд 100 дахин илүү байдаг байна. Одоогоор бичил биетүүдийг эрүүл мэндийн нэмэлт бүтээгдэхүүн болгон хэрэглэж байгаа боловч цаашид эрдэмтэдийн хүчээр ирээдүйн хүсний голлох нөөцийн нэгэнд тооцогдох магадлалтай юм.


Шаардлагатай эрдэс бодисын агууламжийг нэмэгдүүлсэн бүтээгдэхүүн
Өнөөдөр дэлхийд буудай зэрэг хүнсэнд хэрэглэгддэг ургамлын тариалан түгээмэл байгаа боловч хүн амьд явахад шаардагдах эрдэс бодисын багахан хэсгийг л хангаж байна. Тухайлбал маниока хэмээх ургамал хямд өртөгтэй, ямар ч нөхцөлд ургадаг ч хэдхэн хоногийн дотор муудаж хүнсний шаардлага хангахгүй болдог. Энэ ургамалд төмөр, цайр, витамнин А зэрэг бодисууд маш бага хэмжээгээр агуулагддаг боловч 250 сая хүн хоол тэжээлийн үндсэн бүтээгдэхүүн болгон хэрэглэсээр байна. Иймд эрдэмтэд энэ ургамлын витамин болон эрдэс бодисын агууламжийг нэмэгдүүлэхээр шийдэж 4 дахин их уураг, 10 дахин их витамин Е, 8 дахин их цайр тус тус агуулах сортыг гаргаж авчээ. Энэ жишээнээс бүх төрлийн шим тэжээлт бодисыг ганцхан төрлийн ургамалд цуглуулах нь зөвхөн цаг хугацааны л асуудал гэдэг нь ойлгогдоно.


Ургамлын төрөл бүрийн сортууд
Цаг агаарын өөрчлөлт нь тариалангийн зарим бүс нутагт агаарын температурыг нэмэгдүүлэх сайн нөлөөтэй боловч бусад газруудад эсрэгээрээ хүндрэл учруулдаг. Ийм хүндрэлээс гарах үндсэн арга зам нь янз бүрийн нөхцөлд тохирох олон төрлийн сорт бий болгох явдал юм. 10-аад жилийн өмнөөс ургац нэмэгдүүлэх зорилгоор улаан буудай, эрдэнэ шиш болон хүнсний бусад ургамлуудын генетикийн хувьд төстэй удамшсан сортуудыг гарган авсаар ирсэн билээ. Энэ аргаар мөн адил цаг агаарын янз бүрийн нөхцөлд ургах чадвартай сортуудыг бий болгох боломжтой юм. Эдгээр сортууд нь хэлбэр дүрс болон амт чанарын хувьд үндсэн сортоос бараг ялгагдахгүй. Хэрэв бид ийм шинэ сортуудыг гаргалгүйгээр газар тариаланг одоогийн хэлбэрээр үргэлжлүүлэн эрхэлбэл цаашид хөгжингүй орнуудад хүнсний бүтээгдэхүүний үнэ эрчимтэй өсч, хөгжиж буй ихэнх улсуудад хүнсний хомсдол үүсгэх нь зайлшгүй болоод байна.


Жимс болон хүнсий ногооны эрлийз
Киви, плумкот, помэло, алим зэрэг жимс болон хүнсний ногооны эрлийз бүтээгдэхүүнүүд барууны орнуудын худалдан авагчдад аль хэдийн танил болжээ. Эдгээр нь шинэ зүйл биш бөгөөд 18-р зууны үед Ямайка зэрэг улсад ургуулж байсан жүржийн төрлийн ургамлууд энэ төрөлд хамаарагдана. Гэхдээ бид одоо илүү үр ашигтай, илүү сонирхолтой холимогуудыг бий болгох чадвартай болсон. Ирээдүйд ч мөн адил тоо томшгүй олон төрлийн холимог, эрлийз бүтээгдэхүүн бий болж бидэнд шаардлагатай шим тэжээлийг хангахад туслах нь мэдээжийн хэрэг юм.


эх сурвалж; Technewsdaily

Бие засах газарт суурилуулах дижитал тоглоом

Цаг хугацаатай уралдаж хурдтай амьдрахыг шаардаж байгаа өнөө үед бие засах хугацааг илүү сонирхолтой зүйлд зарцуулж яагаад болохгүй гэж. 90-ээд оныхны сайн мэдэх тоглоом үйлдвэрлэгч Сега компани "Тоглоцгооё" хэмээх шинэ тоглоомоо Digital Signage Japan 2011 үзэсгэлэнд танилцуулсан байна. Энэ удаад үзэсгэлэнгийн танхимын 00-ын өрөөнд уг тоглоомыг бодитоор байрлуулсанаар үзэгчдийн талархлыг илүүтэй хүлээжээ. Эрчүүд 00-д орох үедээ ямар нэгэн байг онилох тохиолдол цөөнгүй гардаг. Шинэ тоглоомыг мөн адил байг онилох замаар, гэхдээ гар, хуруугаа оролцуулалгүйгээр шинэ, сонирхолтой хэлбэрээр тоглох боломжтойгоороо онцлог юм.

Тоглоомын систем нь шингэн кристталл дэлгэцээр тоноглогдсон бөгөөд хурдны мэдрэгчийн тусламжтайгаар шээсний урсгалын хурдыг хэмжиж тоглоомыг удирдах хэмжигдэхүүн болгодог байна. Эхлээд хүн ойртож байгааг хэт ягаан туяны мэдрэгчийн тусламжтайгаар мэдэрч дэлгэц тоглоомын эхлэлийн байрлалд шилжинэ. Дараа нь шээх үед богино долгионы хэлбэлзлийн тусламжтайгаар шээсний урсгалын хурдыг хэмжинэ. Уг хурднаас шээсний хэмжээг тодорхойлохын тулд япон хүний шээсний сүвний дундаж хэмжээг үндэслэдэг байна.

Энэ удаагийн үзэсгэлэнд шээсний жинг хэмжиж жагсаалт гаргах тоглоомыг танилцуулсан боловч өмнө нь шээсэн хүнтэй тэмцэлдэх илүү сонирхолтой хувилбарыг зохион бүтээхээр төлөвлөж байна. Тоглоомыг эхний ээлжинд баар, ресторан зэрэг үйлчилгээний газруудад худалдаалах ажээ. Мөн тоглоомын дэлгэц дээр JPEG формат бүхий мэдээллийг үзүүлэх боломжтой бөгөөд тухайлбал хуримын ёслол болж буй газрын 00-д гэрлэж буй хүмүүсийн зургийг байрлуулах зэргээр худалдан авагчдын хүссэн хэлбэрээр ашиглахад тохиромжтой юм. Тоглоомыг энэ оны 11-р сараас худалдаанд гаргах бөгөөд тоглоом нь 140 мянган иен, программ нь 10 мянган иений үнэтэй байхаар төлөвлөгдөж байна.






эх сурвалж; diginfo

Гамшигаас хойш 3 сарын дараа (фото)

Япон улсад байгалийн гамшиг тохиолдсоноос хойш 3 сарын хугацаа өнгөрч байна. Одоогоор газар хөдлөлтөд орон гэрээ алдсан хүмүүсийн тэн хагас нь сургуулийн биеийн тамирын заал зэрэг хоргодох газарт амьдарч байна. 5 сарын сүүлчээр 25 мянга орчим угсармал сууцууд баригдаад байгаа бөгөөд 8-р сар гэхэд нийт 52500 айлын сууц барьж байгалын гамшигт хэлмэгдэсдийг бүгдийг орон гэртэй болгохоор төлөвлөж байна. Энэ хугацаанд зам харилцаа, хий, ус, цахилгаан хангамжийг сэргээх, барилгын нуранга, хогийг зайлуулах ажил үргэжилж байгаа бөгөөд өнөөдрийн байдлаар гамшигт нэрвэгдсэн бүс нутгын дүр төрх ямархуу байдалтай болсон байгааг 3 сарын өмнөхтэй харьцуулан харцгаая. Зураг дээр дарж томруулан үзэх боломжтой

Иватэ мужын Оцүчи хот, 4 сарын 6 болон 6 сарын 3. Барилгын дээвэрт тогтсон усан онгоцыг цунамигийн гамшигийн дурсгал болгон үлдээх санал олон хүнээс гарч байсан боловч аюулгүйн үүднээс буулгасан юм. 200 тон жинтэй уг онгоцыг 2 км зайд байрлах далай хүртэл шилжүүлэн зөөх боломжгүй учир хэсэгчлэн задлаж ашиглалтаас бүрэн гаргажээ.
Иватэ мужийн Рикүзэнтакада хот, 3 сарын 19 болон 6 сарын 3. Газар хөдлөлт цунамигийн үед хоргодох аюулгүй газар болж байсан дунд сургуулийн биеийн тамирын талбайд угсармал сууцууд баригджээ.
Мияги мужийн Ишиномаки хот. 3 сарын 15 болон 6 сарын 3. Нурангын ихэнхийг зайлуулжээ.
Мияги мужын Онагава хот, 3 сарын 18 болон 6 сарын 3. Барилга дээрх автомашиныг буулгаагүй байна.
Иватэ мужын Мияко хот, 3 сарын 23 болон 6 сарын 3. Харьцангуй бага гэмтэл бүхий төмөр бетон барилгаас бусад барилгууд, нурангыг үндсэндээ зайлуулж дуусчээ.
Мияги мужын Кэсэннума хот, 3 сарын 11 болон 6 сарын 3. Шатсан ачааны машин байсан газарт цагаан цэцгүүд дэлбээлжээ.
Мияги мужын Кэсэннума хот, 3 сарын 20 болон 6 сарын 3. Нурсан барилгын үлдэгдэл болон нурангын ихэнх хэсгийг зайлуулжээ.
Мияги мужын Кэсэннума хот, 3 сарын 12 болон 6 сарын 3. Авто замыг чөлөөлж, эвдэрсэн машины сэгүүдийг зайлуулсан боловч нуранга цэвэрлэх ажил үргэлжилсээр.
Мияги мужын Кэсэннума хот, 3 сарын 14 болон 6 сарын 3. Гудамжинд эвдэрч гэмтсэн ганцхан барилга үлджээ.
Иватэ мужын Мияко хот, 3 сарын 12 болон 6 сарын 4. Бүрэн цэвэрлэсэн гудамжаар ахмад насны нэгэн хүн унадаг дугуй жийж явна.
Мияги мужын Ишиномаки хот, 3 сарын 24 болон 6 сарын 4. Гэрлийн шон, телевизийн антень болон бусад хогийг зайлуулж чулуун хөшөөнд шинэ улаан малгай өмсгөжээ.
Мияги мужын Кэсэннума хот, 3 сарын 13 болон 6 сарын 3. Нуранга зайлуулах ажил үргэлжилж байна.
Мияги мужын Ишиномаки хот, 3 сарын 12 болон 6 сарын 3. Далайн усанд хөвж байсан нуранга хогийг зайлуулж дуусчээ.
Иватэ мужын Оцүчи хот, 3 сарын 14 болон 6 сарын 3. Шинто шашины бэлгэдэл болох хаалганы ойролцоох нурангыг зайлуулж дуусчээ.
Иватэ мужын Рикүзэнтакада хот, 3 сарын 18 болон 6 сарын 6. Галын унтраах машинууд зогсож, сураггүй бослон хүмүүсийг хайж байсан газрын нуранга хогийг үндсэндээ зайлуулж дуусчээ.
Иватэ мужын Очүчи хот, 3 сарын 12 болон 6 сарын 3. Дэлгүүрийн ойролцоох барилгын үлдэгдэл, нуранга хогийг зайлуулж дуусчээ.
Иватэ мужын Офүнато хот, 3 сарын 13 болон 6 сарын 3. Нуранга зайлуулах ажил үргэлжилсээр.
Мияги мужын Онагава хот, 3 сарын 16 болон 6 сарын 3. Нурангын ихэнхийг зайлуулжээ.
Иватэ мужын Рикүзэнтакада хот, 3 сарын 12 болон 6 сарын 3. Аврагчдыг хүлээх оршин суугчид дээвэр дээр нь хоргодож байсан барилгын ойролцоох хогны ихэнхийг зайлуулжээ.
Мияги мужын Кэсэннума хот, 3 сарын 15 болон 6 сарын 3. Нурангын ихэнх хэсгийг зайлуулжээ.
Мияги мужын Кэсэннума хот, 3 сарын 12 болон 6 сарын 3. Нурангын ихэнх хэсгийг зайлуулжээ.
эх сурвалж; buzzfeed

Гамшигийн нөлөөгөөр япончууд гэрбүлсэг болж байна

Газар хөдлөлт, цунамигийн гамшигийн дараа Япон улсад олон төрлийн бүтээгдэхүүн үйлчилгээний үйлдвэрлэлт, борлуулалт буурч байна. Автомашины үйлдвэрлэл гэхэд л ердийн үеийнхээс 50 хувь бага үзүүлэлттэй байгаа билээ. Харин гэр бүл болох, хуримлахтай холбоотой үйлчилгээний эрэлт буураагүйгээр барахгүй нэлээд хэмжээгээр нэмэгдэж байна. Тухайлбал зочид буудлуудад зохион байгуулахаар төлөвлөгдсөн элдэв баяр ёслолын ажиллагааны дийлэнх нь цуцлагдаж байхад зөвхөн гэрлэх ёслол хийх захиалгын тоо нэмэгдсээр байна.

Онлайн худалдааны Ракүтэн сайтаар 4-р сард худалдаалагдсан сүйн болон хуримын бөгжний борлуулалтын үзүүлэлт өмнөх оны мөн үеийнхээс 40% илүү байгаа бол сарын сүүлийн хагаст 2 дахин ихэсчээ. Мөн сард улс даяар гэрлэх ёслолтой холбоотой бүтээгдэхүүний борлуулалт өмнөх оны мөн үеийнхээс 15 хувь нэмэгдсэн байна. 3-р сард гэр бүл болж, өрх тусгаарласан хүний тоо 20% нэмэгдсэн бол Токио хот болон түүний ойр орчимд амьдардаг эмэгтэйчүүдийн хувьд энэ үзүүлэлт 63%, эрэгтэйчүүдэд 44% тус тус нэмэгджээ.

Үйлчилгээний байгууллагын мэргэжилтнүүдийн үзэж байгаагаар газар хөдлөлтийн үед ихэнх тээврийн хэрэгслүүд зогсож хүмүүс гэртээ харих боломжгүй болсон, мөн цахилгааны хязгаарлалтын үед ганц бие хүмүүс харанхуй гэртээ айдаст автаж байснаас бусдын өмөг түшгийг эрхэмлэх болсон нь гэрлэх, хуримлахтай холбоотой бүтээгдэхүүн, үйлчилгээний борлуулалтыг нэмэгдүүлэхэд нөлөөлжээ. Харин зарим эрдэмтэд үүнийг аюул осол тохиолдсон үед нэгдэн нийлж, олны хүчээр гарз хохирол бага амсахыг эрмэлзэн тэмцэж ирсэн бидний адгуусан өвөг дээдсийн "сүргийн инстинкт"-ийн илрэл хэмээн тайлбарлаж байна. Юутай ч олон жилийн өмнөөс алдагсаар ирсэн гэр бүлийн үнэ цэнэ, түүнийг ойлгож ухаарах сэтгэлгээ гамшигийн нөлөөгөөр япончуудын дунд эргэн ирж байгаа бололтой.


эх сурвалж; sankei

Төрсөн өдрийн цуцлагдсан баярт 1500 зочин "оролцов"

Германы Thessa хэмээх 16 настай охин төрсөн өдрийн баяраа хийх гэж байгаа тухай мэдээллийг Фэйсбүүкт байрлуулахдаа зөвхөн ойр дотны болон найз нөхдийн хүрээнд харагдах тохируулгыг санамсаргүйгээр хийлгүй орхижээ. Төрсөн өдрийн тухай мэдээллийг уншсан 15000 хүн оролцоно гэсэн тэмдэглэгээг чагталсаны дараа охины эцэг эх баярыг цуцласан боловч асуудал үүгээр дууссангүй. Цуцлагдсан төрсөн өдрийн баяр эхлэх цаг болоход охины эцэг эхийн шийдвэрийг үл тоогч 1500 зочин баярт оролцохоор гэрийнх нь гадаа цугласан байна. Тэдний зарим нь төрсөн өдрийн бэлэг, бялуу авч ирсэн байхад зарим нь "Thessa хаана байна" гэсэн бичиг бүхий самбар барьсан байжээ.

Эмх замбараагүй байдал үүсэхээс сэргийлэн 100 цагдаа зохицуулалт хийхэд хүрч, сэтгэл хөөрсөн зарим оролцогчид цагдаагийн тавьсан шаардлагад, "бид төрсөн өдөр тэмдэглэж байна, тэгээд ч энэ бол гэмт хэрэг биш" гэж хариулж байжээ. Харин гол баатар Thessa өөрийн төрсөн өдрийг өвөө эмээгийнхээ гэрт чимээгүйхэн өнгөрөөсөн боловч энэ нь фэйсбүүкийн мэдээлэлтэй холбоотой анхны тохиолдол биш юм байна. Өнгөрсөн жил 14 настай нэгэн охины төрсөн өдрийн тухай мэдээлэлд оролцох сонголтыг 21000 хүн хийж байжээ. Өнгөрөгч 2-р сард гэхэд л 15 настай охин 50 хүн оролцсон баяр тэмдэглэж гэр орноо бусниулж орхисон тохиолдол гарч байсан байна.





эх сурвалж; dailynews

Програмын тусламжтайгаар хулгайчыг илрүүлжээ

Калифорни мужын Оакланд хотын иргэн Joshua Kaufman хулгайд алдсан зөөврийн компьютерээ технологийн тусламжтайгаар эргүүлэн авсан байна. Энэ оны 3 сард түүний гэрт хулгайч орж зөөврийн компьютерийг нь авч оджээ. Тухайн үед цагдаагийн газарт гомдол гаргасан боловч хэрэг бүртгэгч нарын хайхрамжгүй байдлаас үүдэн хэргийн материал хав дарагдаж мөрдлөгийн ажил хийгдээгүй байна.

Харин Kaufman компьютертээ Hidden хэмээх хулгайчыг илрүүлэх программ суулгасан байсан нь тус болж удалгүй түүнд сахалтай, үслэг залуугийн буйдан дээр сууж байгаа, машин жолоодож яваа, цээж нүцгэн зургуудыг илгээж эхэлсэн байна. Мөн хулгайч өөрийн имэйл хаягт нэвтрэх үеийн компьютерийн дэлгэцийн зургуудыг ч илгээжээ. Hidden програм нь макинтош компьютерийн веб камерийн тусламжтайгаар фото болон дэлгэцийн зургийг авч, компьютерийн байрлалын хамт үндсэн эзэмшигчид илгээдэг байна. 

Kaufman тэдгээр материалуудыг цагдаагийн газарт илгээн, хэд хэдэн удаа имэйл явуулсан боловч нэгэнд нь ч хариу ирээгүй учир This guy has my macbook веб хуудас нээж фото зургуудыг байрлуулж эхэлжээ. Веб хуудасны тухай мэдээлэл блогууд болон хүмүүсийн жиргээгээр түгээгдэж сүүлдээ сайтууд, мэдээллийн хэрэгслүүдийн анхааралд өртөж эхэлсэн байна.

Энэ бүхний дараа буюу өнгөрсөн мягмар гаригт сая л цагдаагийхан хөдлөж таксины жолооч мэргэжилтэй, 27 настай  Muthanna Aldebashi гэгчийг бусдын эд хөрөнгийг хулгайлсан хэргээр баривчилжээ. Түүнийг баривчлахад хулгайчыг илрүүлэх програмын илгээсэн мэдээлэл голлох нотлох баримт болсон бөгөөд дэлгэцийн зураг дахь имэйл хаягаар таксины жолооч гэдгийг илрүүлсэн байна. Хэрэв эдгээр нотлогоо байгаагүй бол компьютерийг гудамжинд хэн нэгэн үл таних хүнээс худалдан авсан хэмээн мэдүүлсэн тохиолдолд хулгайчыг гэмт хэрэгт сэжиглэх үндэслэлгүй болох байжээ.





Эх сурвалж; bbc