Дөрвөлжин араа эргэлдэх боломжтой юу

Энгийн бугуйн цагнаас авхуулаад уул уурхайн аварга механизмүүд хүртэлх ихэнх техникт хэрэглэгддэг механик хүч дамжуулах үндсэн хэрэгслүүдийн нэг нь араат дамжуулга билээ. Бидний олонхын төсөөллөөр том жижиг ямар ч араа дугуй хэлбэртэй байдаг, түүнийг чөлөөтэй эргэлдүүлэх цорын ганц нөхцөл нь мөн л энэ дугуй хэлбэр гэж ойлгодог. Тэгвэл модон цагны элдэв гайхамшигтай дизайнаараа нэрд гарсан Clayton Boyer гэгч нөхөр дөрвөлжин, зуйван, бүр загас, амьтны зэрэг төрөл бүрийн хэлбэртэй араанууд зохион бүтээсэн байна. Ийм араанууд эргэлдэнэ гэдэгт итгэмээргүй боловч үнэхээр эргэлдэх боломжтойг дараах бичлэгээс харж болно. Арааны ховилын гүн болон шүдний өндөр, өргөнийг гайхалтай зохицуулан урласнаар элдэв "гаж" хэлбэрийн араануудыг харилцан уялдаатайгаар чөлөөтэй эргэх боломжтой болгожээ.



эх үүсвэр; gizmodo

Цаасан цаг бүтээгджээ

Ган болон алтаар тансаг ангиллын бугуйн цаг үйлдвэрлэдгээрээ нэрд гарсан Швеицарийн Altanus компани дөрвөн жилийн судалгааны үр дүнд Patch хэмээх цаасан цаг бүтээж худалдаалж эхэлсэн байна. Энэхүү шинэ цаг нь байгаль орчинд ямар нэгэн сөрөг нөлөөгүй бөгөөд байгалийн нөхцөлд хялбар задрах цаасан материалаар хийгджээ. Patch цаг нь хэрэглэгчдийн сонирхлыг татахуйц онцлог дизайнтай бөгөөд үндсэн 10 өнгөтэй юм. Үүнээс гадна ямар ч нөхцөлд зүүж хэрэглэхэд хөлрөх зэргээр тааламжгүй сэтгэгдэл төрүүлэхгүй бөгөөд арьсанд харшил өгөх өнгөлгөөний материал хэрэглээгүй, ус, доргилт болон урагдахаас хамгаалагдсан байна. Мөн 11-хэн грамм жинтэй учир бугуйнд зүүхэд тааламжтай байх энэхүү цаасан цагийг 34 доллараар худалдаалж эхлээд байна.





эх үүсвэр; globalGrind

Роботын дуулж бүжиглэх чадвар эрс сайжирчээ

Япон улсын Үйлдвэрлэлийн технологийн үндэсний хүрээлэнгийн бүтээсэн HRP-4C роботын шинэ ур чадварыг Digital content EXPO үзэсгэлэнд толилуулжээ. HRP-4C нь 158 см өндөртэй, 43 кг жинтэй бөгөөд биеийн галбир болон нүүрний хэлбэрийг япон эмэгтэй хүний дундаж үзүүлэлтийг дууриалган бүтээсэн хүн хэлбэрийн робот юм. Өнгөрсөн жил уг роботын дуулах чадварыг танилцуулж байсан бол энэ удаад дуулахаас гадна хүнтэй илүү төстэйгээр бүжиглэх хөдөлгөөн хийж чаддаг болсоныг харуулжээ. Шар өнгийн хувцас өмссөн робот эмэгтэй бусад бүжигчидтэй хамт урьд хожид байгаагүй чадварлагаар бүжиглэж үзэгчидийн гайхширлыг төрүүлсэн байна.

Роботод бүжиглэх дуулах чадвар эзэмшүүлэхийн тулд үндсэн 2 төрлийн шинэ технологи ашиглажээ. Эхнийх нь Vocawatcher хэмээх технологи бөгөөд японы орчин үеийн поп дуу дуулж буй дуучны нүүрний хувирал болон биеийн хөдөлгөөний онцлогийг видео бичлэгээс таньж дууриалган гүйцэтгэснээр илүү амьд хөдөлгөөнүүдийг бий болгодог байна. Мөн программ хангамжийн болон робот техникийн тусгай боловсрол эзэмшээгүй энгийн хүнд ч компьютерийн маус ашиглан роботоор бүжгийн элдэв хөдөлгөөн хийлгэх боломж олгохыг зорьжээ.

Хоёр дахь шинэ технологи нь VocalListener хэмээн нэрлэгдэх бөгөөд компьютерийн тусламжтайгаар дуу хоолойг хүнтэй илүү төстэй болгон хувиргадаг. Үүний тулд жирийн хүн дуулах үед амьсгалаа авах болон гаргах чимээг хүртэл дууриалган хийдэг байна. Уг робот нь автоматаар тэнцвэрээ олох чадвартай боловч бүжгийн зарим төвөгтэй хөдөлгөөний үед тэнцвэр алдаж магадгүй хэмээн зохион бүтээгчид сэтгэл түгшиж байжээ. Юутай ч хүн хэлбэрийн роботууд бидэнтэй зэрэгцэн оршиход нэг алхам ойтлоо хэмээн судлаачид дүгнэж байна. Өөлвөл гар нь жаахан томдсон гэмээр HRP-4C роботын бүжиглэх чадварыг дараах бичлэгээс үзнэ үү.



Дашрамд дурдахад энэхүү мэдээг дуулаад "Terminator: The Sarah Connor Chronicles" цувралын Cameron гинойд робот шиг мэргэжлийн бүжигчинээс ялгарахааргүй чадварлаг бүжиглэдэг робот бүжигчин тун удахгүй төрөх боломжтой мэт олон хүнд төсөөлөгдөх бизээ.




эх үүсвэр; yahoo japan news

Санамсаргүй төрсөн 10 шилдэг бүтээл

Манай эриний өмнөх суут сэтгэгчдийн нэг Архимед ваннтай усанд орж байхдаа зөв бус хэлбэртэй биетийн эзлэхүүнийг хэмжих аргыг нээгээд Эврика хэмээн орилон гудамжаар нүцгэн гүйж явсан түүхийг бид бүгд мэднэ. 17-р зуунд Ньютоны толгой дээр алим унаагүй байсан бол ертөнц дахины таталцлын хуулийн томьёлол нээгдэх хүртэл хэдий хугацаа зарцуулагдах байсныг төсөөлөх боломжгүй билээ. Хүн төрөлхтөний түүхэнд эрдэмтдийн алдаа эндэгдэлээс, эсвэл огт санамсаргүй байдлаар иймэрхүү шинэ нээлт, шинэ бүтээлүүд төрсөн тохиолдол цөөнгүй байдаг. Энэ удаад нэлээд сүүлийн үед хамаарагдах санамсаргүй нээгдсэн шинэ бүтээлүүдийг сонирхоцгооё.

10. Богино долгионы зуух
Америкийн шинийг санаачлагч инженер Percy Spencer радиолакацийн антений туршилтад хэрэглэж байсан богино долгион ялгаруулагч үүсгүүрийг гартаа эргэлдүүлэн тоглож суужээ. Гэнэт түүний өмд шажигнан дуугарч сонин мэдрэмж төрөхийг мэдэрсэн байна. Тэр хийж байгаа зүйлээ түр орхиод шалгаж үзэхэд халаасанд нь байсан хэсэг шоколад хайлж эхэлж байсныг мэджээ. Spencer энэ бүхний шалтгаан нь үүсгүүрээс ялгарах богино долгион гэдгийг анзаарч хүнсний бүтээгдэхүүний халаагч зохион бүтээх санаагаа олсоноор богино хугацаанд хөнгөн хэлбэрээр хооллохыг хүсэгчид болон ганц бие хүмүүсийн аврал болсон богино долгионы зуух бий болжээ.


9. Сахарин
1879 оны нэгэн өдөр нүүрсний давирхай ашиглан туршилт хийж байсан Ira Remsen, Constantin Fahlber нар хооллохоор лабораторийн ажилаа түр завсарласан байна. Харин Fahlberg хоолны өмнө гараа угаасангүй. Иймэрхүү хайнга байдал нь олон химичийг түргэн зуур үхэлд хүргэх шалтгаан болдог боловч Fahlberg-ийн хувьд ямар нэгэн муу зүйл тохиолдсонгүй, харин өдрийн хоол нь онцгой чихэрлэг амтай болсоныг анзаарчээ. Шалтгаан нь түүний гарт наалдсан химийн бодисийн нөлөө болохыг ойлгосноор хамгийн анхны хоол амтлагч хиймэл бүтээгдэхүүн төрсөн байна. Энэхүү нээлтийн тухай өгүүлэл дээрх хоёр эрдэмтний нэрээр хэвлэгдсэн боловч өнөөдөр дэлхийн хаанаас ч олж болох ягаан уут бүхий амтлагч зөвхөн Fahlber-ийн нэрээр патентлагджээ. Үүнээс улбаалан Remsen хамтрагчаа нэлээд тааламжгүй үгээр тодоройлон хэлдэг байжээ.


8. Залхуу пүрш (Slinky)
1943 онд усан цэргийн инженер Richard James усан онгоцны мэдрэмтгий төхөөрөмжүүдийг механик гэмтлээс хамгаалахын тулд пүрш ашиглан туршилт хийж байжээ. Тэрээр өөрийн нэгэн туршилтын загварыг санамсаргүй шүргэж унагаахад тэр нь шалан дээр онцгой хэлбэр үүсгэн цовхрон ойж, хурдан хугацаанд анхны хэвэндээ орохыг харсан байна. Үүнээс үндэслэн зохион бүтээгч хүүхдийн тоглоом бүтээх санаагаа олсон нь дэлхий даяар 300 сая ширхэгээр худалдаалагдан, орчин үеийн хамгийн түгээмэл тоглоомуудын нэг болж чаджээ.

7. Баримлын шавар
Баримлын шавар нь анх бохирдсон ханын цаасыг цэвэрлэх зориулалттай бүтээгдэхүүн байжээ. Гэхдээ энэ бүтээгдэхүүн бизнесийн үйл ажиллагаа нь өдөр ирэх тусам уруудан доройтож байсан Kutol Products компанийг санамсаргүй байдлаар дампуурлаас аварсан юм. Нэгэн дунд сургуулийн хүүхдүүд цэвэрлэгээний зориулалттай баримлын шаврыг элдэв хэлбэрт оруулан зул сарын баярын чимэглэл хийж байсан нь үйлдвэрлэгчийг бүтээгдэхүүнийхээ зориулалтыг өөрчлөх санаа өгсөн байна. Тэд бүтээгдэхүүнийхээ найрлагаас цэвэрлэгч бодисийг хасч, өнгө үнэр оруулагч нэмж өгсөнөөр бүх цаг үеийн нэгэн нэр хүндтэй тоглоом төрсөн түүхтэй ажээ.


6. Супер цавуу
1942 онд доктор Harry Coover нэгэн төрлийн наалдамхай бодисын судалгаа хийж байх явцдаа наалдамхай чанарыг хэт ихэсгэснээс цианоакрилат хэмээх бодисийг санамсаргүй гарган авчээ. Уг бодис нь хүрсэн болгондоо наалдаж докторын уур цухлыг хүргэж байсан боловч тэгсгээд мартаж орхисон байна. 6 жилийн дараа онгоцны нисгэгчийн шинэ загварын бүхээгийн туршилт хийж байх үед мөн л нэгэн төрлийн бодис хаа сайгүй наалдаж бүхээгний тунгалаг хуванцар гадаргыг бохирдуулсан байгааг анзаарчээ. Уг бодис нь халаалгүйгээр маш гайхалтай наалдуулж байгааг доктор тухайн үед л анх ажигласан байна. Тэрээр санамсаргүй нээсэн супер цавуундаа 1958 онд патент авсан нь тухайн бодистой анх учирсанаас хойш бүхэл бүтэн 16 жилийн дараах үйл явдал болжээ.


5. Теплон, тос шаардлагагүй хайруулын таваг
Химич Roy Plunket 1932 онд шинэ төрлийн хийн найрлага бий болгохоор туршилт хийж байжээ. Тэрээр хөргөлтийн тасалгаанд орж ирээд туршилтын үр дүнд үүссэн хийгээр дүүрэх ёстой савыг шалгахад хий бус цагаан өнгийн хэдхэн нимгэн ялтас байхыг олж харжээ. Туршилтын үр дүн эрдэмтнийг санаагаар унахад хүргэсэн боловч ялтасууд түүний сонирхолыг татаж химийн шинж чанарыг нь судлаж үзэхэд гайхмаар тослог шинж чанартай бөгөөд хайлах температур өндөртэй бодис болохыг илрүүлжээ. Уг бодисыг анх цэргийн зориулалттай машин механизмын эд ангиудад ашиглаж байсан бол өнөөдөр тос хэрэглээгүй ч хоол хүнсийг түлэгдэлт үүсгэлгүйгээр боловсруулах боломжтой хайруулын таваг үйлдвэрлэхэд ашиглаж байна.


4. Хуванцар
1907 онд шеллак хэмээх резиний төрлийн бодис нь радио телефон аппарат зэрэг эрт үеийн электрон төхөөрөмжүүдийн цахилгаан утасны тусгаарлагч материал хэлбэрээр ашиглагддаг байжээ. Гэхдээ энэ материал нь зүүн өмнөд азийн цох хорхойноос гаргаж авдаг, хэт өндөр өртөгтэй байсан учир Белгийн химич Leo Baekeland илүү хямд материал гарган авахаар шийдсэн байна. Тэрээр туршилтын үр дүнд өндөр температурт ч хэлбэрээ хадгалах чадвартай, хэвлэх аргаар хэлбэржүүлж болохуйц материал гарган авсан нь дэлхийн анхны нийлэг хуванцар байсан бөгөөд Bakelite хэмээн нэрлэгдэх болжээ. Онцлог нь зохион бүтээгч өөрийн бүтээсэн материалын хэрэглээг зөвхөн дуу авиа бичигч төхөөрөмжөөр хязгаарлагдана гэж төсөөлж байсан боловч өнөөдөр гоёл чимэглэл, гэр ахуй, үйлдвэрлэлийн зэрэг маш олон салбарт төрөл бүрийн бүтээгдэхүүн болон өргөнөөр хэрэглэгдэх болжээ.


3. Зүрхний цохилолтыг дэмжих жижиг оврын төхөөрөмж
Америкийн инженер Wilson Greatbatch зүрхний хэвийн бус цохилолтыг хэмжих зориулалттай багаж бүтээхээр ажиллаж байх үедээ төхөөрөмжинд ашиглахаар төлөвлөж байснаас 100 дахин их үзүүлэлт бүхий эсэргүүцэлийг андууран залгаж орхижээ. Гэтэл багажны цахилгаан хэлхээнээс хэдхэн миллисекунд хугацааны давтамж бүхий лугших долгион ялгарч эхэлсэн байна. Greatbatch лугшилтыг тохируулах гүйдлийн тохируулагч нэмж залгаснаар өвчний улмаас доголдсон зүрхний үйл ажиллагааг дэмжих чадвартай жижиг оврын зөөврийн анхны төхөөрөмж бий болсон байна. Тухайн үеийн адил үүрэг зориулалт бүхий төхөөрөмжүүд нь телевизортой адил нүсэр том хэмжээтэйгээс зөөвөрлөн авч явахад туйлын хүндрэлтэй байсан ажээ.


2. Наалддаг тууз
Швейцарын инженер George de Mestral нохойгоо дагуулан анд явах үедээ түүний хувцас, оймс болон нохойных нь үсэнд өвсний ширхэгтүүд наалдаж шигдсэн байхыг анзаарчээ. Тэрээр гэртээ эргэж ирээд өвсийг микроскопоор ажиглахад даавуу болон үс ноосонд жижиг дэгээ хэлбэрийн үзүүрээр гогцоолдон наалдсан байгааг хараад түүнийг дууриасан бүтэцтэй материал гарган авахаар шийдсэн байна. Mestral жилийн турш төрөл бүрийн материалуудаар туршиж үзсэн боловч амжилтад хүрсэнгүй. Харин тухайн үед шинээр нээгдсэн нейлоныг туршсанаар өвсний дэгээтэй адил барьцалдах чадвар бүхий туузыг бий болгож чадсан байна. Хачирхалтай нь тухайн бүтээгдэхүүн НАСА-гийн зохион бүтээгчид сансарын нисгэгчийн хувцасанд ашиглах хүртэл 20 жилийн хугацаанд хэний ч сонирхолыг татсангүй, тэр хэмжээгээр нийтэд түгэн дэлгэрч чадаагүй байжээ.


1. Рентген туяа
1895 онд Германы физикч Wilhelm Roentgen шилэн хоолойноос ялгарах катодын цацрагийг хараар будсан хатуу цаасан дэлгэц дээр тусган ердийн нэгэн туршилт хийж байжээ. Туршилтын явцад цаасан дэлгэцийн өмнө төрөл бүрийн материалыг байрлуулан цацрагийн нэвтрэлтийг ажиглаж байхдаа түүний гарын ясны дүрслэл ханан дээр тусч байхыг анзаарчээ. Тэрээр тухайн цацраг хатуу биетийг төвөггүй нэвтрэн гарч байгааг ойлгосноор орчин үеийн эмнэлгийн практикт өргөнөөр хэрэглэгдэх болсон рентген туяаг нээжээ.



эх үүсвэр; gizmodo

Интернетийн хурдыг 1 Гигабитэд хүргэнэ

Өмнөд солонгосчууд 2013 он гэхэд өөрийн орны кабелийн болон утасгүй интернетийн хурдыг одоогийн хэмжээнээс 10 дахин нэмэгдүүлэхээр төлөвлөж байна. Энэхүү төлөвлөгөөгөөр интернетийн хурдыг хэдэн зуун мегабит бус гигабайтаар тоологдох хэмжээнд хүргэх ажээ. Интернетийн хурд гигабит хэмжээнд хүрсэнээр одоогоор сураг нь ч дуулдаагүй байгаа хэт өндөр нягтрал (UDTV) бүхий телевизийн нэвтрүүлэг үзэх боломж бүрдэнэ. Мөн гар утсаараа HD ангиллын видео үзэх боломжтой болох юм.

Төлөвлөгөөний хүрээнд нийт 34 тэрбум вон зарцуулахаар төлөвлөж байгаа бөгөөд зардалын дийлэнх хэсгийг хувийн секторын хөрөнгө оруулалтаар бүрдүүлэх ажээ. Энэхүү зардалын хэмжээ нь тус улсын боловсролын салбарын нэг жилийн төсөвтэй тэнцэж байна. Өнөөгийн байдлаар Өмнөд солонгос интернетийн бодит хурдаар дэлхийд тэргүүлж байгаа бөгөөд дунджаар 12Мб байгаа юм. Төлөвлөж буй Ultra Broadband convergence Network (UBcN) ашиглалтад орсоноор телефон яриа, телевизийн нэвтрүүлэг, онлайн худалдаа, өргөн боломжит интернет телевиз зэрэг олон төрлийн үйлчилгээг нэг сувгаар хүлээн авах боломж бүрдэх юм.

Үүнээс гадна гэрийн сургалт, эрүүл мэндийн, засаг захиргааны болон зар сурталчилгааны үйлчилгээг өндөр чанартайгаар хүлээж авахаас гадна зөвхөн гэртээ ч бус гадуур явахдаа гар утас болон зөөврийн бусад төөхөрөмжүүдийн тусламжтайгаар интернет холболт, телефон ярианы үйлчилгээ, телевизийн нэвтрүүлгийг одоогийнхоос 10 дахин өндөр хурдаар хэрэглэх боломжтой болох ажээ.


эх үүсвэр; ITTtimes

Mongolnews.mn сайтын Шинжлэх ухаан, технологийн мэдээний тухай

Шинжлэх ухаан, технологитой холбоотой мэдээллийн чанарт мэдээлэл бэлтгэгчийн орчуулга, хэл найруулгын ур чадвараас гадна тухайн салбарын тухай ойлголт болон шинжлэх ухааны ерөнхий мэдлэг голлох нөлөө үзүүлдэг. Манайд шинжлэх ухаан технологийн чиглэлээр төрөлжсөн сонин, хэвлэл, сайт бараг байхгүй (компьютер таймс сэтгүүл зэрэг 1 салбараар дагнасан хэвлэлийг эс тооцвол) гэж хэлж болно. Ихэвчлэн томоохон сонин, хэвлэлийн булан хэлбэрээр багахан хэсгийг эзлэдэг, мөн ихэнх хүмүүсийн сонирхолыг тэр болгон татдаггүйгээс ийм төрлийн мэдээллийн чанарт хангалттай анхаардаггүй байдал ажиглагддаг.

Энэ удаад "үндэсний шилдэг сонин", "үндэсний брэнд", "сэтгүүлчдийн 98% нь дээд боловсролтой" Өнөөдөр сонины, "2001 оноос эхлэн тvгээсэн мэдээллийн гарц, өдгөө дэлхийн монголчуудын байнгын хэрэгцээ болсoн", "Монголын вэбvvдийн дунд зохион байгуулсан олон шалгаруулалтад тэргvvн байр эзэлсэн", "мэдээллийн багтаамж, чансаа, уншигчидтайгаа тогтоосон эргэх холбоо, хэрэглэгч хvлээн авахад хялбар" веб хувилбарын шинжлэх ухаан технологитой холбоотой мэдээллүүдийн чанарын талаар хэдэн үг хэлмээр санагдан хуруу, товчлуур нийлүүлж сууна.

Миний хувьд мэдээлүүдийг голчлон гадаад эх үүсвэрүүдээс авахыг хичээдэг учир монгол хэвлэл, сайтуудын мэдээллийг тэр болгон тогтож уншдаггүй. Хэд хоногийн өмнө Mongolnews сайтын нэгэн мэдээллийн талаар нэгэн блогт бичигдэж, мөн өөр нэгэн ташаарсан мэдээллийг залруулсан талаар уншиж байсан юм. Харин өнөөдөр Mongolnews сайтад гарсан "Хэвлийдээ 20 жил амьдарчээ" мэдээг уншаад эргэлзэх сэтгэл төрж сүүлийн хэд хоногийн цөөхөн мэдээлүүдийг гүйлгэж харав. Эдгээр мэдээнд дурдагдсан хүн болон газар орны нэрээр хайлт хийж гадаад эх үүсвэртэй нь тулгаж үзээд (арай ч дээ гэж бодов) сонгож авсан дөрөвхөн жишээг дэлгэрүүлж харцгаая. Mongolnews, Гадаад эх үүсвэр гэсэн үгнүүд дээр дарж тухайн мэдээлэлтэй дэлгэрэнгүй танилцах боломжтой.

Жишээ нэг
Mongolnews; ... Америкийн иргэн, 42 настай эмэгтэй 1990 онд үр хөврөл суулгуулжээ. Үүнээс өмнө тэр бээр дөрвөн удаа хуруу шилний хүүхэдтэй болох оролдлого хийсэн байна. Гэвч аль нь ч эмэгтэйн биед таарахгүй байж. Харин тав дахь оролдлого амжилттай болж, тэрбээр хүүхэдтэй боллоо. Хачирхалтай нь түүнд хамгийн сүүлд суулгасан үр хөврөл бүтэн 20 жилийн турш бүрэлдэж, өнгөрсөн тавдугаар сард хорвоод мэндэлсэн байна. Урьд нь үр хөврөл ийм удаан бүрэлдсэн тохиолдол гарч байгаагүй юм. 20 жил эхийнхээ хэвлийд амьдарсан хүүхэд төрөхдөө гурван кг жин татаж байжээ. ...

Гадаад эх үүсвэр; ... Америкийн Jones Institute for Reproductive Medicine-ийн эмч нарын тусламжтайгаар 20 жилийн настай хөлдөөсөн үр хөврөл суулгуулсан эмэгтэй жирэмсэлж хүүхдээ амжилттай төрүүлсэн байна. Нэрийг нь зарлаагүй 42 настай эмэгтэй энэ оны 5 сард эрүүл хүүхэд төрүүлжээ. Харин түүний үр хөврөлийг 1990 онд донор хосоос авч зохиомлоор үр тогтоож хадгалсан байсан юм. Ийм төрлийн өмнөх дээд амжилт 13 жилийн хугацаатай байсан байна. Хөлдөөсөн үр хөврөлийг зөвхөн нэг хоёр ширхэгээр бус, хэд хэдийг авч жирэмслүүлэхэд ашигладаг. Энэ удаад 5 ширхэг үр хөврөл сонгон авсанаас 2 нь гэмтэж, үлдэх 3-аас 1 нь л амжилттай жирэмслүүлж чадсан байна...
Мэдээллийн утга агуулга ямар байгаад ямар болж хувирсаныг харж байгаа биз. Энд цэвэр орчуулагчийн гадаад хэлний мэдлэгийн түвшин нөлөөлсөн гэж дүгнэж болмоор. "1990 онд хөлдөөж 20 жил хадгалсан үр хөврөл"-ийг эмэгтэй "1990 онд жирэмсэлсэнээс хойш 20 жил гэдсэндээ тээж төрүүлсэн" болгож том "андуурчээ". Мөн 5 үр хөврөл ашигласныг 5 удаа жирэмслүүлэхээр оролдсон болгож "ойлгосон" бололтой юм.

Жишээ хоёр

Mongolnews; ...Нобелын шагнал гардуулах хорооноос энэ жилийн шагналтнуудыг өчигдрөөс эхлэн олон нийтэд зарлалаа. Хамгийн түрүүнд анагаах ухааны салбарын эзнийг тодруулжээ. Тэр хүн бол Японы Киотогийн их сургуулийн профессор Шинья Яманака юм. Тэрбээр 2007 онд арьсны эдээс үр хөврөлийн эс гарган авах аргыг нээжээ. Үүний ачаар элэг, зүрх, мэдрэлийн гээд бүх л төрлийн эсийг ургуулж, эрхтэн шилжүүлэн суулгах, зарим хүнд өвчнийг анагаах болсон юм. ...Шинья Яманака энэхүү шагналыг авах нь гарцаагүй хэрэг” хэмээн Нобелын шагналын хорооноос мэдээлжээ...

Гадаад эх үүсвэр; Арьсны эсээс суурь эс гарган авах аргыг нээсэн Японы Киотогийн их сургуулийн профессор Шинья Яманака нобелийн шагнал авах уу? Энэ асуултын хариуг бид ирэх даваа гаригт хийх Нобелийн хорооны мэдэгдлээс мэдэх болно...
Энэ мэдээнд Нобелийн шагнал огт аваагүй хүнийг авсан болгож мэдээлжээ. Эх мэдээллийн агуулга нь шагнал авах өндөр магадлалтай хэмээсэн байтал аль хэдийн авчихсан байгаа хэмээн "андуурсан" байх юм. "...Авах нь гарцаагүй" гэж Нобелийн хороо мэдэгддэг нь ч бас юу билээ. Мөн суурь эсийг үр хөврөлийн эс гэж буруу орчуулсан байна. Дашрамд хэлэхэд Mongolnews-ийн мэдээ тухайн салбарт Нобелийн шагнал хүртэгчийг зарласнаас 1 хоногийн дараа нийтлэгдсэн байх юм, бусад эх үүсвэрээс шалгачихаж болоогүй юм байх даа.

Жишээ гурав

Mongolnews; ... Дэлхийн хамгийн өндөр цэгт байрлуулсан цаг ердийн үеийнхээс илүү хурдан явдаг гэж Эйнштейн өгүүлсэн. Тэгвэл түүний зөв болохыг эрдэмтэд баталжээ. Хүний амьдралын дундаж нас 79 гэдэг бол амьдрах газрын өндөр дээшлэх тусам энэ хугацаа богиносох аж. Чухамдаа амьдралын хугацаа богиносох бус цагийн эргэлт хурдассантай холбоотойгоор нас богиносдог байна. ...Энэхүү сонирхолтой үзэгдлийн нууц нь дэлхийн татах хүчтэй шууд холбоотой. Татах хүчнээс холдох тусам цаг илүү хурдан явдаг. Эл шалтгааны улмаас онгоц, агаарын хөлгүүд маш хурдтай хөөрөн нисдэг аж.

Гадаад эх үүсвэр; Шат буюу уулан дээр байгаа хүн автомашинаар хурдалж яваа хүнээс илүү хурдан хөгширдөг хэмээх Эйнштэйний 1907 онд нээсэн харьцангуйн ерөнхий онолын хялбар томъёоллыг бид мэднэ....
... Колорода мужийн "National Institute of Standards and Technology (NIST)"-ийн физикчид Эйнштэйний харьцангуйн онолыг бодит амьдралын хүрээнд хэр зэрэг нөлөөлдөг болохыг туршилтаар тогтоожээ. Туршилтад мөн адил атомын цаг ашигласан бөгөөд уг цаг нь 3.7 тэрбум жилд 1-хэн секундийн алдаа үзүүлэх өндөр нарийвчлалтай юм. Туршилтаар шатны хэдэн алхамын дээр болон доор зогсож байгаа хүний насны зөрөөг тооцож гаргаснаар шатны дээд талд зогсож байгаа хүн илүү хурдан хөгширнө гэдгийг тогтоожээ. Гэхдээ энэ зөрүү нь маш өчүүхэн бөгөөд хүмүүс шатан дээр 79 жил амьдарсан гэж тооцвол хөгшрөлтийн зөрүү нь секундийг 90 тэрбум хуваасны нэг хугацаагаар хэмжигдэх ажээ.
Эйнштэйний харьцангуйн онол, хурд болон таталцлын хүчний үйлчлэлээс хамаарч цаг хугацаа хурдасч удааширдаг гэх мэтийн хэллэгүүдийг дунд сургууль төгссөн хэн ч мэдмээр юм, үүнд ямар ч тусгай мэдлэг мэргэшил шаардлагагүй. Нас богиносдог гэсэн нь хэллэг ч бас хэр зохистой юм бол. Хамгийн гол мэдээлэл болох атомын цаг, түүний нарийвчлал, цаг хугацааны удаашралын хэмжээний тухай огт дурдсангүй. Онгоц, агаарын хөлгийн тухай хаанаас юу олж уншаад энд нэмээд оруулчихав гэж гайхмаар...

Жишээ дөрөв
Mongolnews; Америкийн Луизанагийн их сургуулийн эрдэмтэн Лон Чю хэрэглэсэн эрчим хүчнээсээ цахилгаан ургуулах технологи боловсруулснаа мэдээлжээ. Тэрбээр алдагдсан эрчим хүчийг хувирган, шинээр сэргээх консоль системийг ашиглан уг аргыг боловсруулсан гэнэ. Хэрэглэсэн цахилгааныг боловсруулахдаа гэрэл, дулаан дахин шингээж, шинээр хэрэглэх боломжтой болгох юм байна. “Цахилгаан, эрчим хүч дахин боловсруулах олон арга байдаг. Харин хамгийн хямд төсөр, хэрэглэхэд амар нь бидний бүтээсэн шинэ технологийн онцлог юм” хэмээн Лон Чю хэлсэн байна. Эрчим хүч ургуулах эл арга ирээдүйд нано технологи, микро системийн салбарт чухал байр суурь эзэлнэ гэж шинжээчид үзэж байгаа юм.

Гадаад эх үүсвэр
; Лузианагийн их сургуулийн доктор Long Que электрон хэрэгсэлүүд, нарны энерги зэрэг дулааны эргэлт бүхий цахилгаан дулааны хэрэгсэлүүдээс дулааны энерги хэлбэрээр ялгардаг хаягдал дулааныг шингээж авах төхөөрөмж зохион бүтээсэн байна. Энэ төхөөрөмж нь бидний хэрэглэдэг бүхий л төрлийн цахилгаан хэрэгсэлүүдэд ямар нэгэн өөрчлөлт хийлгүйгээр үр ашгийг нэмэгдүүлэх боломж олгож байна. Шинэ төхөөөрөмж нь нүүрстөрөгчийн нано хоолойн ялтас суурилуулсан пьезоэлектик шинж чанар бүхий материалаар хийгдсэн гол төмрийг агуулдаг байна. Халалтын, гэрлийн зэрэг дулааны энергийг нүүртөрөгчийн нано хоолойн ялтас хүлээн авсанаар гол төмөрт тахийлгах үйлчлэл үзүүлдэг. Тахийх хөдөлгөөн олон дахин давтагдсанаар пьезоэлектрик материалд цахилгаан гүйдэл үүсэх нөхцөл болдог байна. Өмнө нь алхах, бүжиглэх зэрэг хүний хөдөлгөөний үед пьезоэлектрик материалийг ашиглан энерги гаргаж авах адил төстэй судалгаа хийгдэж байсан юм.
Өвс мод ургуулдаг болохоос цахилгаан ургуулдаг гэж огт дуулаагүй байх юм. Үнэндээ орчуулагч этгээд мэдээнийхээ утга учрыг огт ойлгосонгүй. Пьезоэлектрик зэрэг хэллэгүүдийг хэрхэн орчуулахаа мэдэхгүйгээс хасч, нээлтийн гол утга санааг орхигдуулжээ. Үүнээс шалтгаалаад мэдээг бүхэлд нь холион бантан болгож орхиж. Осолтгүй ганц эрдэмтний нэрийг л зөв бичжээ. Гэснээс энэ мэдээ news.mn дээр яг хэвээрээ тууж явна лээ.

Гэх мэтчилэн хэлээд өөлөөд байвал зөндөө л алдаа дутагдал байх юм. Мэдээний дорхи бичсэн хүний нэрийг анзаарвал ганцхан хүн бүх мэдээг бичээд алдаад байгаа биш бололтой. Цаасан сонинг унших боломж үгүй учир ямархуу мэдээллүүд нийтлэгдэж байгаа талаар шалгах боломж байсангүй. Эцэст нь энэ бүхний талаар яаран ямар нэгэн дүгнэлт хийхийг хүссэнгүй. Юутай ч монгол өдөр тутмын томоохон сонинуудын нэг иймэрхүү мэдээллүүд нийтлэж байна гэхэд итгэмээргүй бөгөөд харамсалтай санагдав. Сонины холбогдох хүмүүст энэхүү мэдээлэл хүрэх болтугай, алдаа дутагдлаа арилгаж уншигч хэрэглэгч биднээ үнэн зөв бодит мэдээллээр хангадаг болох болтугай хэмээн залбирч сууяа.


Animator vs Animation III

Alan Becker хэмээх америк залуугийн бүтээсэн Animator vs animation хэмээх хөдөлгөөнт флаш хүүхэлдэйн киноны шинэ анги гарсан байна. Хөдөлгөөнт дүрс болон түүнийг бүтээгч хоёрын хооронд компьютерийн дэлгэц дээр өрнөх үхлийн тулааныг харуулсан энэ богино хэмжээний хөгжилтэй хөдөлгөөнт дүрсийг тэрээр анх 2006 онд 17 настай байхдаа Macromedia flash программ ашиглан 3 сарын сарын хугацаанд бүтээж байсан юм. Өмнөх хоёр ангийн үргэлжлэл болох шинэ Animatior vs animation III ангийг эндээс үзнэ үү.

Animatior vs animation I


Animatior vs animation II

1Тб багтаамжтай оптик диск бүтээгджээ

TDK компани өөрсдийн бүтээж буй 1Тб багтаамжтай оптик дискний туршилтын загварыг Ceatec Japan 2010 үзэсгэлэнд танилцуулжээ. Уг диск нь хоёр талдаа 32 Гб багтаамж бүхий бичлэгийн 16 давхаргыг агуулдаг (нийлбэр багтаамж 1024 Гб) байна. Харин Blu-ray диск 4 бичлэгийн давхаргыг агуулдаг. Гэрлийн өндөр дамжуулалт бүхий онцлог материалыг ашигласнаар шинэ дискний багтаамжийг ихэсгэх боломж бүрдсэн байна. Зөвхөн нэг давхарга нь гэрлийн 95.1 хувийг дамжуулдаг бол нийт 16 давхаргад гэрлийн дамжуулалт 72.6 хувь байдаг байна.

Энэ материал нь Blu-ray дискний бүтцэд мөн агуулагддаг бөгөөд бат бөх зэрэг үзүүлэлтүүдийн хувьд ямар нэгэн асуудалгүй хэмээн TDK компаний төлөөлөгч хэлжээ. Дискний нэг давхаргаас бичлэг унших хурд нь Blu-ray дисктэй адил байх юм. Харин одоогоор бүрэн шийдэгдээгүй байгаа хүндрэлтэй асуудал нь дискний зузааныг хангалттай багасгаж чадаагүй байгаа явдал юм. Blu-ray дискний бичлэгийн давхаргын зузаан 100 микрон болон түүнээс бага байхыг шаарддаг бол шинэ дискнийх 260 микрон байгаа нь оптик линзийг гажилтад оруулах нөлөөтэй ажээ. Уг диск хэрэглэгчдийн гарт хэр зэрэг хурдан хүрэх нь үйлдвэрлэгчдээс хамаарах төлөвтэй байна.


Зурагт шинэ оптик дискийг (голд нь) адил хэмжээний багтаамж бүхий Blu-ray диск болон DVD-тэй харьцуулан харуулжээ. Дашрамж дурдахад өмнө нь DVD-ээс 1000 дахин их багтаамжтай оптик диск, терабит хэмжээтэй флаш диск бүтээгдэж байгаа тухай тус блогт мэдээлж байсан билээ. Эдгээр нь мэдээлэл хадгалах зөөврийн төхөөрөмжүүдийн багтаамж терабитээр хэмжигдэх цаг ойртож байгааг харуулж байна. Тун удахгүй бид мэдээллийн хэмжээнээс үл хамааран түүнийг хадгалах асуудалд санаа зовохгүй болохнээ.


эх үүсвэр; phileweb

Хулганы тархиар робот машиныг удирдана

Токио их сургуулийн эрдэмтэд сүүлийн хэдэн жилийн хугацаанд гүйцэтгэж буй киборг хулганы "бодол санаа"-гаар жижиг оврын робот машины хөдөлгөөнийг удирдаx судалгааны ажлын үр дүнг танилцуулсан байна. Энэхүү судалгааны ажлын зорилго нь саажилттай болон хөгжлийн бэрхшээлтэй хүмүүст тэргэнцэрийг өөрсдийн бодол санаагаар төвөггүй удирдах боломжийг олгоход чиглэгдэж байгаа юм. Урьд нь ийм төрлийн судалгаанууд цөөнгүй хийгдсээр ирсэн боловч тархины дохиолол хүлээн авах мэдрэгчүүдийг толгойн гадна байрлуулах арга голчлон ашиглагдаж байсан юм.

Харин энэ удаад мэдрэгч электродуудыг хулганы тархины гадаргад нь шууд суурилуулснаараа онцлог юм. Судалгааны хүрээнд эхний ээлжинд хулганыг хязгаарлагдмал орчинд жижиг оврын робот машиныг чирүүлж сургасан байна. Энэ үед видео камер ашиглан хулгана болон робот машины хөдөлгөөний төлөв байдлын бичлэг хийж, тархинаас гарах дохиоллын хамт загварчлалын программ хангамжийн өгөгдөл болгон бичиж авчээ. Дараа нь хулганыг хөлийг нь шаланд хүргэхгүйгээр робот машинд бэхлэж байрлуулсан байна.

Эцэст нь хулганы тархины дохиоллуудыг шууд хүлээн авч программ хангамжийн тусламжтайгаар робот машиныг хөдөлгөх туршилтыг хийсэн байна. Туршилтад 8 хулгана оруулсны 6 нь робот машиныг амжилттай удирдаж чаджээ. Төслийн удирдагч Фүкүямагийн хэлсэнээр хулганы тархины дохиоллууд болон робот машины хөдөлгөөний хоорондын зүй тогтол бүрэн тодорхой болоогүй байгаа бөгөөд цаашид тодорхой хугацаанд туршилтыг үргэлжлүүлэн гүйцэтгэх шаардлагатай байгаа юм.


эх үүсвэр; popsci, ulemj.com

Виртуал үнсэлт

Японы NeuroSky, Double Crane компаниуд хамтран iPad-ийн нэгэн шинэ хэрэглээний програм бүтээснээ өнгөрөгч Tokyo Game Show-д танилцуулсан байна. Энэ програм нь өмнө мэдээлж байсан Mindflex тоглоомтой адил зарчимаар ажиллах бөгөөд толгойд байрлуулах мэдрэгчийн тусламжтайгаар тоглогч анхаарлаа хэр сайн төвлөрүүлж байгаагаас хамааран удирдагддаг юм. Буруу харж зогссон виртуал бүсгүйчүүдээс сонголт хийснээр тоглоом эхлэх бөгөөд 20 секундын хугацаанд анхаарлаа 80%-иас дээш хэмжээгээр төвлөрүүлж чадвал сонгосон бүсгүй эргэж харна.

Үүний дараа хэсэг хугацаанд анхаарлаа суллан тайван байдалд шилжихэд виртуал бүсгүйн үнсэлтийг хүлээн авдаг байна. Хамгийн сүүлийн үеийн шинэ техник технологийн тухай танилцуулдаг японы Фүжи телевизийн Сэрүүлэг нэвтрүүлгийн нэгэн дугаарт виртуал үнсэлт программыг ажиллуулж туршиж байгааг дараах бичлэгээс үзнэ үү. Нэвтрүүлэгт оролцон тоглогч анхаарлаа хангалттай төвлөрүүлж чадаагүй учир тоглоом амжилтгүй болсон бөгөөд төгсгөлд нь хэрэв амжилттай тоглосон бол ямархуу үр дүнд хүргэдгийг харуулж байна.

"Google street view" өргөжин тэлсээр

2007 онд Google street view технологи бий болсноос хойш дэлхийн 30 гаруй улсын томоохон хотын гудамжууд болон хурдны зам дагуух зургийг 360 градусын панорама дүрслэл хэлбэрээр үзэх боломжтой болсон билээ. Энэ технологи нь зөвхөн тухайн газар орны дүрслэлийг харуулаад зогсохгүй зар сурталчилгаа, аялал жуулчлалаас авхуулаад олон салбарт шинэ боломжуудыг бий болгож байгаа билээ. Сүүлийн нэг жишээг дурдвал google street view-д суурилсан андройд гар утасны навигацийн программ хангамжууд бүтээгдэж нийтийн хүртээл болж эхлээд байна.

Google street view нь зөвхөн хүн ам төвлөрсөн томоохон хотуудын дүрслэлийг харуулдаг байсан бол саяхнаас түүхийн зарим дурсгалт газрууд болон хүссэн бүхэн очиж үзэх боломжгүй байгалын олон өнгө төрх бүхий газруудын дүрслэлээр өргөжиж эхэлсэн байна. Энэ удаад алдарт Stonehenge, Помпей хот, Антарктид тивийн цас мөсөн гадарга, Бразилийн ширэнгэ ой, Альпийн нуруу зэрэг үзэсгэлэнт газруудаар аялах боломжтой болжээ.






Дашрамд дурдахад манайхан ч бас гүүглийнхнийг хүлээлгүйгээр Ulaanbaatar street view хийхийг оролдож эхлэн, Улаанбаатар хотын авто замын томоохон уулзваруудын 360 градус панорама дүрслэлийг гүүглэтэй адил зарчимаар газрын зурагт харуулж байсан боловч харамсалтай нь хэсэг хугацааны өмнөөс тодорхойгүй шалтгаанаар дүрслэлүүд хасагдсан байсан.


эх үүсвэр; MailOnline

Компьютерийг асаахад хэдхэн секунд зарцуулна

"The Unified Extensible Firmware Interface (UEFI) Forum" ашгийн бус судалгааны байгууллага өөрсдийн хөгжүүлж буй UEFI интерфейсийг 2011 оны эхнээс үйлдвэрлэгдэх компьютерүүдэд суурилуулж эхлэх тухай зарлалаа. UEFI нь 2005 оноос Интел компанид зохион бүтээгдсэн бөгөөд сүүлийн 30-аад жилийн туршид бүх төрлийн компьютерүүдэд дангаар суурилуулагдаж ирсэн BOIS (Basic Input/Output System)-ийг орлох юм. UEFI-ийн үндсэн давуу тал нь хэдхэн секундын дотор компьютерийг асааж, үйлдлийн системийг ачаалах чадвартай ажээ. BIOS бүхий уламжлалт компьютерүүдийг асаахад хамгийн багадаа 30 секунд, зарим тохиолдолд хэдэн минутаар тоологдох хугацаа зарцуулдагийг бид мэднэ.

Үйлдлийн системийн ачаалах хугацааг богиносгох асуудал нь программ хангамж үйлдвэрлэгчдийн анхаарлын гадна орхигдож байгаагүй юм. Vista үйлдлийн системийн нэг дутагдалтай тал нь ачаалах хугацаа харьцангуй урт байдаг бөгөөд Windows 7 системд ч мөн адил үүнээс зайлсхийж чадаагүй. Майкрософт компани Windows 8 системдээ дээрх дутагдлыг арилгахаар зорьж байна.Google, стандарт үйлдлийн системийн зарим элементүүдийг хасч богино хугацаанд ачаалж болох Chrome OS үйлдлийн системийг боловсуулж байна. Гэхдээ энэ нь зарим төрлийн программ хангамжийн боломжуудыг хязгаарлах юм. Hewlet packard мөн адил богино хугацаанд ачаалах боломжтой HyperSpace үйлдлийн системийг өнгөрөгч 6-р сараас худалдаалж эхэлсэн.

Гэхдээ үйлдлийн системийн ачаалах хугацаа нь зөвхөн программ хангамжийн хөгжүүлэлтээр бүрэн шийдэгдэх асуудал биш бөгөөд BIOS-ын хүчин зүйлээс голчлон хамаардаг. Тэгвэл компютерийн техник хангамжуудыг танихад харьцангуй урт хугацаа зарцуулдаг BIOS-ийг UEFI-ээр сольсоноор дээрх дутагдлыг бүрэн арилгаж чадах юм. Мөн өмнө нь SSD, MRAM, хослосон хард диск зэрэг ачаалах хугацааг богиносгох зарим оролдлогууд гарч байсан боловч өртөг өндөртэйгээс гадна тэр болгон амжилттай хэрэгжиж чадаагүй юм. UEFI нь системийг ачаалах хугацаа богиноос гадна өртөгийн хувьд хямд байх юм.


эх үүсвэр; TechEYE

Нэвт харагдах, даралтат дэлгэц бүтээгджээ

Панасоник компани дэлхийд хамгийн анхны нэвт харагдах, даралтат дэлгэцийн туршилтын загварыг бүтээж өнгөрөгч SID 2010 үзэсгэлэнд танилцуулсан байна. Ийм төрлийн дэлгэцийг OLED-оос өөр төрлийн материалаар бүтээх боломжгүй мэт санагдаж байсан боловч энэ дэлгэцийг LCD буюу шингэн кристтал материалаар бүтээжээ. LCD дэлгэцийг нэвт харагдуулахын тулд дэлгэцийн арын гэрлийг хэрхэн нуусан нь хэн бүхний сонирхолыг татаж байгаа боловч энэ талаар тодорхой мэдээлэл алга байна.

Шингэн талст материал дээр арын гэрэлтүүлэгчээс үүссэн гэрлийг тусгаж дүрслэл үүсгэдэг учир тэдгээрийг үл үзэгдэгч болгон нууна гэдгийг энгийн хүн төсөөлөхөд бэрх юм. Юутай ч туршилтын загварын дараах видео бичлэгийг үзээд үнэхээр ийм дэлгэц бүтээгдсэн гэдгийг үнэмшихээс өөр аргагүй юм. Энэ дэлгэцийн талаархи илүү тодорхой мэдээлэл гарах үед тус блогт дахин дэлгэрэнгүй мэдээлэх болно.



эх үүсвэр; techi