Видео камерийн цаашдын чиг хандлага - Флаш ба 3D?

Ганзагын наймаачдын ачаар 1990-ээд оны үеэс манайхан олон төрлийн электрон бараа хэрэглэж эхэлсний нэг нь видео камер юм. Тухайн үед видео тоглуулагч ашиглан гэртээ кино үзэхээс гадна гэр ахуйн хүрээнд дүрс бичлэг хийж хадгалах, хүссэн үедээ үзэж болдог зэрэг технологийн дэвшил олон хүнийг гайхашруулж байсан билээ. Видео камерийн түүхийг сөхөж үзвэл нийтийн хэрэгцээнд зориулагдсан Betamovie BMC-100P хэмээх анхны видео камерийг 1983 онд Сони компани бүтээж худалдаанд гаргаж байсан байна.

1985 оноос JVC, Хитачи, Панасоник зэрэг компаниуд соронзон туузтай VHS кассет бүхий аналог камерууд худалдаанд гаргаж эхэлсэн нь монголд орж ирж байсан анхны камерууд байжээ. Электроникийн салбарын хөгжлийн үр дүнд 1990-ээд оны эхэн үеэс "дижитал хувьсгал" эхэлж үр дүн нь бусад электрон төхөөрөмжүүдтэй адил дуу болон дүрс бичлэгийн төхөөрөмжүүдэд нэвтэрч эхэлсэн юм. Дижитал технологи нь бичлэгийн чанар илүүгээс гадна удаан хугацаанд хадгалах тохиолдолд муудаж чанараа алддаггүйгээрээ аналогиос давуу талтай юм.

Өнөөдөр туузан кассеттэй, DVD-тэй, хард дисктэй гэх мэт олон төрлийн дижитал видео камерууд худалдаалагдаж байгаа билээ. Хүмүүс видео камер худалдан авахад тавьдаг гол шаардлагуудын нэг нь бичлэгийн чанар боловч эдгээр камеруудын хувьд энэ үзүүлэлт бараг адилхан болжээ. Бичлэгийн нягтралын хувьд DVD формат 720x480, HD (High-Definition/Density) DVD, Bue-ray диск 1280x720 байдаг бол хамгийн сүүлийн үеийн AVCHD форматаар 1920x1080 байгаа юм. HD телевизор (HDTV)-ийн хэрэглээг дагаад гэрийн болон олон нийтийн хэрэгцээнд ашиглах камерийн хувьд HD үзүүлэлттэй камер байхад хангалттай гэж үзэх хүмүүс цөөнгүй байгаа бизээ.

Харин овор хэмжээ том, дуу чимээ ихтэй, бат бөх бус зэрэг шалтгааны улмаас туузан кассет бүхий видео камер үндсэндээ үйлдвэрлэлээс хасагдах хандлага ажиглагдаж байна. DVD, хатуу дисктэй болон эдгээрийг хослосон (hybrid) камерууд эргэлдэгч эд ангиудыг агуулах учир доргилт зэрэг механик үйлчлэлийн үед мөн адил төдийлөн бат бөх байж чадахгүй нь ойлгомжтой бөгөөд хэрэв диск болон DVD гэмтэх тохиолдолд бичлэгийг эргэж сэргээх боломжгүй юм. Мөн хард диск эвдрэх магадлал өндөрсдөг учир далайн түвшнээс дээш 3000м ээс илүү өндөрлөг газарт ийм төрлийн видео камеруудыг ашиглахгүй байхыг үйлдвэрлэгч нар зөвлөдөг байна.

Харин 2004 оноос Панасоник компани анхлан худалдаалж эхэлсэн, хамгийн сүүлийн үеийн технологи болох флашт суурилсан видео камерийн зах зээл энэ оноос эхлэн бусад төрлийн камеруудыг шахаж эхлэх тухай судлаачид өгүүлж байна. Ийм камерийн давуу тал нь овор хэмжээ бага, дуу чимээгүй, цахилгаан энергийн хэрэглээ багатай учир батерейн нэг удаагийн цэнэглэлтээр харьцангуй удаан хугацаанд ажиллуулах боломжтой бөгөөд хамгийн гол үзүүлэлт нь бичлэгийг найдвартай хадгалах боломжийг олгож байгаа явдал юм.

Одоогоор флаш санах ой бүхий камеруудын гол дутагдал нь үнэ өндөр, багтаамж харьцангуй бага байгаа явдал юм. Жишээ нь 240 Гб буюу хамгийн том багтаамж бүхий хард дисктэй камер 96 цагийн бичлэг хийх боломжтой бол 64 Гб буюу хамгийн том санах ой бүхий камер 24 цагийн бичлэг хийх боломжтой байна. Гэхдээ SD карт, SSD (цул биет диск ) дискний багтаамж цаг ирэх тусам өсөн нэмэгдэж байгаа өнөө үед флашт суурилсан бага хүчин чадалтай видео камер худалдан авсан ч алзахгүй юм. Одоогоор худалдаанд гараад байгаа хамгийн том багтаамж бүхий SD кард 256Гб байгаа бөгөөд цаашид 2 Тб хэмжээнд хүрэх тухай өмнө нь мэдээлж байсан билээ. Мөн одоогоор SD карттай болон давхар дотоод диск (SSD) бүхий флашт суурилсан 2 төрлийн камерууд худалдаалагдаж байгаа юм. Иймд флаш диск ашиглах боломжтой камер худалдаж авсан ч цаашид багтаамж томтой флаш картууд гарах үед авч хэрэглэж болох юм.

Цаашид видео камеруудад ямар шинэ технологи нэвтрэх бол. Саяхнаас 3D телевизор худалдаалагдаж эхлэн, телевизийн зарим сувгууд гурван хэмжээст нэвтрүүлэг цацаж эхлэх тухай зарласан билээ. Харин 3D технологи зөвхөн кино болон телевизийн салбараар хязгаарлагдахгүй бололтой. Саяхныг хүртэл хязгаарлагдмал хүрээнд ашиглагдаж байсан мэргэжлийн 3D видео камерууд нь олон арван кг жинтэй, хэдэн арван мянган долларын үнэтэй байсан бол өнгөрөгч CES-2010 үзэсгэлэнд Панасоник компани жижиг овор хэмжээ бүхий нэгдмэл 3D камерийн загварыг танилцуулсан байна. Энэ камер нь Full HD (1920x1080) чанартай, SD карт ашиглах боломжтой юм. Мөн 3кг жинтэй бөгөөд энэ оны сүүлчээр 21 мянган долларын үнэтэйгэээр худалдаанд гаргахаар төлөвлөж байгаа ажээ.

Мөн DGX компани халаасны 3D видео камерийг танилцуулсан байна. Гэхдээ энэ камер нь үзүүлэлтүүдийн хувьд тийм ч хангалттай бус юм. Бичлэгийн чанар VGA (640x480) бөгөөд камерийн дэлгэц болон жижиг цонхоор бичлэгийг голограмм хэлбэрээр харах боломжтой юм. Харин бусад үзүүлэлтүүдийн талаар тодорхойгүй байна. Ирэх 6 сараас эхлэн 200 орчим доллараар худалдаалж эхлэхээр төлөвлөж байгаа юм. Эдгээрээс дүгнэхэд та бид гэр болон нийтийн хэрэгцээнд зориулагдах 3D камер худалдаж авах өдөр тун ч холгүй гэдэгт найдаж байна.

дэлгэрэнгүй

Youtube шинэ үйлчилгээ нэвтрүүлнэ

YouTube сайтад 2 төрлийн шинэ нэмэлт үйлчилгээ оруулж байгаа тухай Google-ээс мэдээлсэн байна. Automatic captions буюу бичлэгийн тайлбарыг үзүүлэх нэмэлтийг өмнө нь сургалтын болон гүүглийн албан ёсны видео бичлэгүүдэд ашиглах боломжтой байсан бол одоо ихэнх видео бичлэгүүдэд оруулахаар төлөвлөж байгаа юм байна. Одоогоор зөвхөн англи хэл дээрх видеонд энэ нэмэлт хүчин төгөлдөр бөгөөд мөн зарим гадаад хэлээр орчуулан гаргах боломжтой ажээ. Эдгээрт яриаг текстэд хувиргах (speech-to-text) болон гүүглийн орчуулгын программ хангамжийг ашиглах учир тийм ч бүрэн төгс биш байгаа юм. Automatic timing нэмэлт нь бүх шинэ видео бичлэгүүдэд хамаарах юм. Энэ нь youtubed-д шинээр бичлэг оруулж буй хүнд бичлэгийн текстийг гараар оруулах боломж олгож байна.

Дашрамд дурдахад эдгээр үйлчилгээ нь англи хэл сурч байгаа болон сонсголын хөгжлийн бэрхшээлтэй хүмүүс тустай үйлчилгээ болжээ. Харин видео бичлэгийг өөр сайтад share хийсэн тохиолдолд СС товч нь идэвхждэггүй бололтой юм. Хэрэв дээрх бичлэгийг шууд youtube сайтаас үзвэл шинэ үйлчилгээ хэрхэн ажиллаж байгааг туршиж үзэх боломжтой.

дэлгэрэнгүй

Sony Party-shot

Хамт олон, найз нөхөдтэйгээ цэнгэн хөгжилдөх, ямар нэгэн баяр ёслол тэмдэглэх үед хэн нэг нь фото зурагчны үүрэг гүйцэтгэх шаардлагатай болдог билээ. Гэтэл тэр дурсгалт хормуудыг мөнхөлсөн зургууд дотор зурагчны өөрийнх нь зураг ховорхон байдаг. Эсвэл ур чадвар тааруухан нэг нь зураг авч таараад сүүлд элдэв шүүмж, гомдол сонсох тохиолдол ч цөөнгүй гардаг. Яг ийм нөхцөлд тохирох фото камерийг Сони компани өнгөрөгч оны 8-р сараас худалдаанд гаргаж эхэлсэн байна.

Party-shot хэмээх энэ камер нь суурин дээрээ 360 градус эргэлдэж, 24 градусаар гэдийх, бөхийх хөдөлгөөн хийхээс гадна хүний нүүр царайг таньж зураг авах чадвартай юм. Хамгийн гол нь зургийн фокус болон зохиомжийг камер өөрөө тохируулах бөгөөд эдгээр бүх үйлдлийг бүрэн автоматаар гүйцэтгэдэг байна. Энэ камер нь BIONZ дүрсний процессорын тусламжтайгаар хүний нүүр царай болон инээмсэглэлийг таньж хүний оролцоогүйгээр фото зураг авдаг ажээ.

Иймд тохиромжтой байрлалд тавиад орхиход л таны найз нөхөд, болон гэр бүлийнхний энгийн бөгөөд жинхэнэ амьд, эсвэл бүр фактны гэж хэлж болох зургуудыг санамсаргүй байхад нь авч чадах юм. Хоёр ширхэг АА батерей бүхий энэ камер нь 11 цаг хүртэлх хугацаагаар зураг авах хүчин чадалтай бөгөөд 150 орчим доллараар худалдаалагдаж байна.

дэлгэрэнгүй

Залгуурын зарим шинэ шийдлүүд

Техник, технологитой холбоотой блог болон сайтуудад дизайны төрөл бүрийн бүтээлүүдийн тухай цөөнгүй нийтлэгддэг. Гэвч эдгээр нь техникийн шийдэл гэхээсээ урлаг тал руу чиглэсэн байдаг учир блогийн агуулгад нийцүүлэх үүднээс ийм төрлийн мэдээлэл оруулахаас аль болох татгалздаг. Харин энэ удаад дизайнаас гадна технологи талаас зарим асуудлыг шийдвэрлэхийг оролдсон хоёр сонирхолтой бүтээлийн талаар нийтлэж байна. Эдгээр нь оюутнуудын бүтээл боловч олон улсын үзэсгэлэнгүүдэд тэргүүн байруудад шалгарч байсан шилдэг бүтээлүүд юм.

1. Цахилгааны залгуур
Олон төрлийн цахилгаан хэрэгслүүдийг нэгэн зэрэг ашиглах тохиолдолд тэдгээрийн цахилгаан тэжээлийн залгуурууд хэрэглээний хүндрэлтэй байдал үүсгэдэг. Энэ байдлыг арилгахад цахилгааны утасгүй дамжуулалт туслах боловч одоогоор бүрэн төгс шийдэгдээгүй байгаа билээ. Харин Лондоны Royal College-ын оюутан Min-Kyu Choi-гийн бүтээсэн цахилгааны эвхэгддэг залгуур дээрх хүндрэлтэй байдлыг арилгахад бага ч болов нэмэр болох ажээ. Түүнд ийм залгуур бүтээх санаа MacBook Air зөөврийн компьютер худалдаж авахад анх төрсөн байна. Учир нь дугтуйд багтах хэмжээний нимгэн компьютерт 4,5 см том хэмжээтэй цахилгаан залгуур дагалдаж иржээ. 3 сэрээ бүхий уламжлалт залгуур нь англид 1945 оноос хойш ашиглагдаж байгаа юм. Шинэ залгуур нь ердөө 10мм зузаантай бөгөөд үндсэн 2 сэрээг 90 градус эргүүлж уламжлалт хэлбэрээр ашиглах боломжтой юм. Мөн энэ залгуурыг ашиглан маш бага орон зайд олон залгуурыг зэрэг залгах боломж бүхий адаптер зохион бүтээсэн байна.

2. USB залгуур
Вэб камер, хулгана, гарнаас авахуулаад компьютерийн эргэн тойронд USB залгуур бүхий төхөөрөмжүүд цөөнгүй ашиглагддаг. Дээр нь фото болон видео камерууд, гар утас, МР3 тоглуулагчуудаа бас холбож ашигламаар байдаг. Гэтэл компьютерийн USB оролт хүрэлцэхгүй бол яах вэ, олон оролттой нэмэлт залгуур худалдаж авах уу.
Үүний хялбар шийдэж болох өвөрмөц дизайн бүхий USB залгуурыг хятадын Zhejiang их сургуулийн дизайнер оюутан Gonglue Jiang бүтээжээ. Ийм залгуурыг нэг оролтод хэдийг ч давхарлаж холбох боломжтой юм. Анхнаасаа яагаад ингээд хийчихэж болоогүй юм бол гэж санагдаж байж магад. Гэхдээ нэг дутагдалтай тал нь хэт олныг залгах тохиолдолд цахилгаан чадал хүрэлцэхгүй болох юм байна. Зохиогч энэ бүтээлдээ нэмэлт цахилгаан тэжээл холбох хувилбарыг сонгосон байна. Энэ загвар одоохондоо концепт төдий байгаа боловч цаашид сайжруулагдаж бүтээгдэхүүн болон өргөнөөр хэрэглэгдэнэ гэдэгт найдаж байна.




эх үүсвэр; physorg, jianggonglue

дэлгэрэнгүй

Минутад 200 хуудас сканнердана

Токио их сургуулийн эрдэмтэд минутад 200 хуудас буюу өндөр хурдаар сканнердах технологи боловсруулсан байна. Шинэ сканнерийн камер нь секундэд 500 кадр зураг авах чадалтай бөгөөд номны хуудсыг яаж ч хурдан эргүүлэхэд дараалсан хоёр горимын дагуу чанартай сканнердаж чаддаг байна. Эхний горимд лазер болон ердийн гэрлийн тусламжтайгаар номны үсэг болон фото зургийг гэрэлтүүлж зураг авна. Дараагийн горимд дүрсний гажилтыг засч зөв хэлбэрт оруулдаг ажээ.

Мөн уг сканнерийг ашиглах робот бүтээсэн тухай тус сургуулийн профессор Ишикава дурдсан байна. Өөрөөр хэлбэл ном хэвлэлийг дижитал хэлбэрт оруулах ажиллагааг хүний оролцоогүйгээр бүрэн автоматаар гүйцэтгэх боломжтой болжээ. Харин хэзээнээс бүтээгдэхүүн болгон хэрэглэгчдийн гарт хүргэх нь тодорхойгүй байна. Цаашид энэ технологи бүхий сканнерийг гар утсанд суурилуулж хүссэн хүн бүхэн хэрэглэх боломжтой болох ажээ.

Дашрамд дурдахад мэдээллийн технологийн хөгжлийн үр дүнд сүүлийн үед ном хэвлэлийг дижитал хэлбэрт шилжүүлэх ажил олон орны номын сан, эрдэм шинжилгээний, засгийн газрийн болон бусад байгууллагуудад эрчимтэй хийгдэж байна. Мөн төрөл бүрийн электрон уншигчууд худалдаалагдахын хэрээр хүмүүс уламжлалт цаасан ном, хэвлэлээс татгалзах хандлага бий болж байна. Үүний нэг жишээ нь хэдхэн долоо хоногийн өмнөөс Amazon сайтын электрон номын борлуулалт цаасан номоосоо илүү гарсан явдал юм. Мөн зарим сонингууд электрон уншигчид зориулсан хувилбараа гаргаж эхэллээ. Америк болон японы зарим дунд сургуулиудад электрон сурах бичгийг туршилтын журмаар ашиглаж эхлээд байна. Харин манайд ийм чиглэлд төлөвлөсөн болон эхлүүлсэн ажил хэр байдаг юм бол...?


эх үүсвэр; pcworld

дэлгэрэнгүй

Кибер гэмт хэрэг хоёр дахин нэмэгджээ

Америкийн "Интернеттэй холбоотой гомдол хүлээн авах төв (Internet Crime Complaint Center)"-ийн мэдээгээр кибер гэмт хэргийн улмаас учирсан хохирлын хэмжээ 2009 оны дүнгээр 560 сая долларт хүрч өмнөх оныхоос хоёр дахин нэмэгдсэн байна. Тус төвд өнгөрсөн онд 336,655 гомдол ирсэн бөгөөд нийт гомдлын 20% нь онлайнаар худалдан авсан бараа ирээгүй, 14.1% нь хувийн нууцад хамаарах мэдээлэл алдагдсан тухай байжээ. Онлайн хохирогчдын дундаж хохирол 575 доллар бөгөөд нийт хохирогчдын 1% нь 100 мянгаас илүү хэмжээний доллар алдсан байна. Мөн хохирогчдын 55 хувь нь 40-өөс дээш насны хүмүүс байжээ. 2009 онд интернет ашиглан хийгдсэн хамгийн түгээмэл залилан нь "Ishmael Ghost Islamic Group"-ээс илгээгдсэн имэйлүүд байсан ажээ. Уг имэйлд гэр бүлийнх нь хэн нэгэн гишүүнийг алах захиалга хөлсний алуурчид ирсэн тухай болон хэрэв хандив өгсөн тохиолдолд аллагыг болиулах талаар мэдээлдэг байна.


эх үүсвэр; BBCnews

дэлгэрэнгүй

Сони шинэ DSLR - компакт камер бүтээж байна

Бидний мэдэх SLR камерууд фото зургийг өндөр чанартайгаар авах боломжтой боловч том овор хэмжээтэй, олон төрлийн төвөгтэй функцуудыг агуулсан байдгаас компакт камер (манайхан SLR камерийг мэргэжлийн, компакт камерийг дижитал гэж тус тус нэрлэж заншсан байдаг)-ийг илүүд үзэх хүмүүс цөөнгүй байдаг. Харин компакт камерууд нь тэр болгон сайн чанартай зураг авч чаддаггүй. Тэгвэл Сони компани альфа цувралын SLR камерийн боломжуудыг агуулсан жижиг оврын дижитал фотокамерийн загварыг танилцуулсан байна.

Энэ камер нь линз (дуран) солих боломжтой бөгөөд Exmor APS HD CMOS сенсорыг агуулсан юм. Мөн камерийн удирдлагын үйлдлүүдийг хялбаршуулсан учир фото зураг авах туршлага багатай хүн ч ашиглахад хялбар байдлаар хийгдсэн байна. Уг камерын өөр нэг онцлог чадвар нь AVCHD Full HV чанар бүхий видео бичлэг хийх боломжтой ажээ. Мөн видео бичлэгийг өндөр хурдны камертай адилаар удаашруулан харах боломжтой бөгөөд дүрслэл нь ердийн видео камеруудаас дутахааргүй учир фото болон видео камеруудыг нэгтгэсэн гэж хэлж болохоор юм. Одоогоор камерийн сайжруулалтын ажил хийгдэж байгаа бөгөөд энэ ондоо багтаж худалдаанд гаргахаар төлөвлөж байгаа ажээ.

эх үүсвэр; akihabarnews

дэлгэрэнгүй

Evolute жорлон - усны хэрэглээг 90% бууруулна

Австралийн шинийг санаачлагч Tom Trainor, Mark Hutton нар уламжлалт жорлонтой харьцуулахад усны хэрэглээг 90% хүртэл хэмжээгээр бууруулсан Evolute хэмээх шинэ төрлийн эко жорлон зохион бүтээсэн байна. Энэ жорлонгийн гол цөм нь суултуурын доод хэсэгт байрлах эргэлдэгч метал бөмбөлөг хэлбэрийн сав юм. Хоол боловсруулах эрхтэний системийн ялгарлын бүтээгдэхүүн бага хэмжээний усыг агуулах уг саванд цугларах бөгөөд ус татсаны дараа бөмбөлөг-сав эргэлдэж амсар нь доош харах үед ялгадас болон усны холимгийг бохирын систем рүү юүлдэг байна.

Дараа нь бөмбөлөг буцаж эргэн анхны байрлалд орсны дараа дахин нэг эргэлт хийж мөн багахан хэмжээний усаар зайлалт хийгдэх юм. Бөмбөлгийн эргэлт болон усаар зайлах үйлдэл нь цэвэр ус хангамжийн шугамын гидравлик даралтын үйлчлэлээр хийгдэх учир ямар нэгэн цахилгаан энерги, цахилгаан хөдөлгүүр шаардлагагүй юм. www.innoglobe.com сайтад дурдсанаар нэг удаад нэг литрээс илүүгүй ус хэрэглэх бөгөөд уламжлалт жорлонтой харьцуулахад 30% бага зай талбай эзлэдэг юм байна. Цаашид сайжруулалтын ажил хийгдэх бөгөөд 2012 он хүртэл худалдаанд гарахгүй бололтой.

Бичлэгээс ажиглахад бага зэрэг тохь тух муутай байж магадгүй боловч цэвэр усны хомсдол хаа сайгүй яригдаж байгаа өнөө үед цагаа олсон, байгал экологид сайн нөлөөтэй шийдэл болох нь ойлгогдоно. Дашрамд дурдахад манай гэр хороолол, зуслангийн байр, жуулчны баазууд зэрэг төвлөрсөн усан хангамжийн системгүй газруудад тохирох жорлон биш үү гэж асуух хүн гарч магад. Уг жорлонгийн гидравлик системийг ажиллуулахад ямар хэмжээний усны даралт шаардагдах нь тодорхойгүй байгаа учир одоогоор энэ асуултад хариулахад хүндрэлтэй юм.

Хэрэв багахан хэмжээний даралт шаардлагатай бол жорлонд ашиглах усны савыг өндөрт байрлуулан өндөржилтийн зөрөөгөөр үүсэх даралтыг ашиглах хувилбар байж болох юм. Мөн усны хэрэглээ бага байх учир ус зайлуулах хоолой дахь бохирын урсгалыг чөлөөтэй байлгахын тулд хоолойн суурилуулалтын налууг ихэсгэх шаардлагатай санагдав.

дэлгэрэнгүй

Android application-ий жишээ

Сүүлийн жилүүдэд iPhone болон андройд үүрэн төхөөрөмжүүд амьдралд нэвтрэхийн хэрээр программ зохиогч болон сонирхогч нарт мөнгө олох шинэ боломж нээгдэж байгаа билээ. Манайд хүртэл эдгээр төхөөрөмжүүдэд зориулагдах хэрэглээний программ хангамж хөгжүүлэлтийн уралдаан зохиогддог болж цөөнгүй хүмүүсийг хамрах болжээ. Энэ удаад ийм хэлбэрээр мөнгө олох, бизнес явуулахыг хүсч сонирхож буй хүмүүст зарим нэг санаа төрүүлж болохуйц хоёр жишээг хүргэж байна. Хэрэв та үнэхээр энэ төрлийн бизнест амжилт ольё гэж бодож байгаа бол яах аргагүй хэрэглэгчдийн сэтгэл зүйг маш нарийн судлах хэрэгтэй болохнээ.

Өнгөрсөн жил Motion portrait компаний бүтээсэн нэг бүр нь 300 иений үнэтэй "Hour face" программ худалдаалагдаж эхлээд гуравхан сарын хугацаанд 100 мянган таталт хийгдэж тухайн үед ийм төрлийн бүтээгдэхүүний борлуулалтын жагсаалтад дээгүүр байр эзлэж байсан байна. Энэ программын амжилт олсон гол шалтгаан нь насжилттай холбоотой эмэгтэйчүүдийн сэтгэлзүйг маш сайн мэдэрч хэрэгжүүлсэн явдал юм. Ямар ч насны эмэгтэйчүүд гоо сайхнаа удаан хугацаанд хэвээр хадгалахыг хүсдэг, магадгүй зарим нэгэнд нь тулгамдсан асуудал болж байдгийг ч үгүйсгэх аргагүй. Зөвхөн эмэгтэйчүүд гэлтгүй эрчүүд ч бас нүүр царай нь хэдэн насанд ямархуу байдалтай болохыг урьдчилаад мэдчихнэ гэдэг сэтгэл санааны хувьд ч, гоо сайхандаа анхаарахад нь ч тустай зүйл билээ.

Харин дараагийн программ нь бүтээгдээд удаагүй байгаа болохоор хэр олон тоогоор татагдсан тухай мэдээлэл одоохондоо алга байна. Гэхдээ дээрх программаас дутахааргүй амжилт олно гэдэгт бичлэгийг үзээд та итгэх болно. Битбокс хэмээх урлагын төрөл байдгийг та мэдэх байх. Амаараа хөгжимдөхийн тулд багагүй авьяас болоод дасгал сургуулилт шаардагдах нь ойлгомжтой учир хүссэн хүн болгон хийгээд байж чадахгүй. Харин энэ программийг ашиглаад та хичнээн авьясгүй байлаа ч ямар ч хөгжмийн зэмсэг, фон хөгжим ашиглалгүйгээр иж бүрэн дуу, хөгжмийн найруулга бүтээх боломжтой юм. Мөн таньд яг одоо энэ программийг татаж аваад оролдоод хүсэл төрж байгаа гэдэгт итгэлтэй байна.

дэлгэрэнгүй

iPod, iPhone, iPad..., дараа нь юу вэ

Apple-ийн iPod, iPhone, iPad дараалан хэрэглэгчдийн хүртээл болсон бөгөөд шинэ төрлийн бүтээгдэхүүн бүрийн овор хэмжээ өмнөхөөсөө томорч байгааг та анзаарсан байх. Эдгээрийн нийтлэг бөгөөд онцлог чанар нь өвөрмөц дизайн, MAC OSX үйлдлийн систем, мэдээж даралтат дэлгэц гэдэгтэй хэн бүхэн санал нийлнэ. Тэгвэл эдгээрийн дараа ямар төхөөрөмж гарч ирж биднийг гайхшруулах бол. Энэ удаад Apple бус "Цахиурын хөндий"-н PQ Labs-ийн мэргэжилтнүүд G3 touchscreen технологийг жирийн сэтгүүлийн ширээтэй нэгтгэсэн "iTable" нэртэй концепт загвар боловсруулжээ.

Энэ нь хэдэн жилийн өмнө танилцуулагдаж байсан Windows table-тэй төстэй боловч илүү өргөн боломжуудыг агуулах бөгөөд USB тэжээл бүхий Multi-Touch G3 touchscreen дэлгэцийг 80-162.5см хүртэл харьцангуй том хэмжээтэйгээр бүтээх боломжтой болсон байна. Дэлгэцийн өнцөгүүдэд байрлах мэдрэгчүүд нь 32 даралтын цэгийн тусламжтайгаар хурууны даралтаар үүсэх хөдөлгөөний хэлбэрийг танихаас гадна дэлгэц дээр байрлуулсан эд зүйлсийн хэлбэрийг таних чадвартай юм байна. Мөн iPhone, Windows болон Андройд гар утаснуудтай адил контентүүдийг суулгах боломжтой байх юм. Одоогоор худалдаалагдах үнийн талаар тодорхой мэдээлэл байхгүй байгаа бөгөөд энгийн хэрэглэгчдын худалдан авах чадварт тохирсон харьцангуй хямд хувилбарыг ойрын хугацаанд боловсруулахаар зорьж байгаа ажээ.

эх үүсвэр; thecoolgadgets

дэлгэрэнгүй

Цэцэрлэгт робот багш ажиллана

Өмнөд солонгосын цэцэрлэгүүдэд робот-туслах багш ажиллуулахаар төлөвлөж байна. 2011онд 500, 2013 онд нийт 8000 цэцэрлэгт англи хэлний туслах багшийн үүргийг тус тус роботууд гүйцэтгэж эхлэх бөгөөд энэ ажилд засгийн газраас нийт 45 сая ам доллар зарцуулах ажээ. Багш роботууд нь мэдээж хүний заах, сургах чадварыг гүйцэхгүй боловч, хичээлийн сэдвийн дагуу программчилагдах бөгөөд суралцагчидтай ойр зуурын харилцан яриа хийх чадвартай байх юм.

Хэрэв цэцэрлэгүүдэд робот-багш ашиглах ажил амжилттай болвол цаашид дунд сургуулиудад мөн адил суурилуулахаар төлөвлөж байгаа ажээ. Мөн түүнчлэн эдгээр робот багш нарыг эцэг эхчүүд хүүхдүүдтэйгээ зайнаас харьцах болон хичээлийн үйл ажиллагаанд хяналт тавих зорилгоор ашиглах боломжтой байх юм байна.

эх үүсвэр; singularityhub

дэлгэрэнгүй

Интернет дэх мэдээллээс үүдэн баривчлагджээ

Японы Вакаяма мужийн цагдаагийн газар 42 настай Хироаса гэгчийг замын хөдөлгөөний дүрэм зөрчсэн хэргээр баривчилсан байна. Tүүнийг youtube сайт дахь видео бичлэгийн шинжилгээг үндэслэн гэмт хэрэг үйлдсэнийг тогтоосон бөгөөд япон улсын хэмжээнд интернет дэх мэдээллийг ашиглан баривчилсан анхны тохиолдол юм. Тэрээр 2009 оны 8 сард дээд хурд 50км/ц-аар хязгаарлагдсан улсын чанартай зам дээр том оврын мотоцикл унаж явахдаа 188 км/ц хурдалсанаа хүлээн зөвшөөрч байгаа ажээ.

Эх сурвалжид дурдсанаар мотоциклоор өндөр хурдтай явж буй хүний бичлэг интернетэд байна гэсэн мэдээлэл анх цагдаагийн газарт ирсэн байна. Үүний дагуу цагдаа нар бичлэгийг шалгаж, хугацаа болон туулсан зайн хэмжилтээр мотоциклийн хурдыг тооцоолон гаргажээ. Бичлэгийг мотоциклийн жинхэнэ эзэмшигчийн танил интернетэд оруулсан байна. Харин азгүй Хироаса тухайн мотоциклийг зээлж хэрэглэж байсан бөгөөд эзэмшигч нь далд камер суурилуулсан байсныг мэдээгүй бололтой юм.

Дашрамд дурдахад өнгөрөгч 11-р сард үүнтэй төстэй явдал гарч канад улсад гарч байсан билээ. Nathalie Blanchard хэмээх эмэгтэй ажлаасаа халагдсанаас шалтгаалан сэтгэл санааны хямралд орж удаан хугацаагаар өвчилсны тэтгэмж авах ёстой байсан байна. Гэтэл нийгмийн даатгалын ажилтан нь түүний төрсөн өдрөө бааранд тэмдэглэж буй зургуудыг Facebook дэх танилцуулгаас нь үзээд сэтгэл санааны хямралд ороогүй хэмээн дүгнэж, тэтгэмж олгохоос татгалзсан байна.


эх үүсвэр; yahoojapannews, msnbc

дэлгэрэнгүй

3D телевизор худалдаалагдаж эхэллээ

2010 оны хамгийн их хүсэн хүлээсэн бүтээгдэхүүн болох 3D телевизор 2 сарын 25-наас Солонгос улсад, онлайн худалдааны Amazon сайтаар өнөөдрөөс тус тус худалдаалагдаж эхэлсэн байна. Одоогоор 46, 55 инчийн телевизорууд худалдаалагдаж байгаа бөгөөд үнийн хувьд төсөөлж байснаас тийм ч их өндөр бус 2600, 3300 долларын үнэтэй байна. Энэ нь Самсунгийн ижил төрлийн 2D зурагтнаас 500 орчим доллараар илүү байгаа юм.

Мөн энэ сарын дундаас Америкийн цахилгаан барааны томоохон сүлжээ дэлгүүрүүдээр худалдаалж эхлэхээр төлөвлөж байгаа ажээ. Гэхдээ та 3D TV худалдаж авсан ч одоохондоо ид шидийг нь хүртэж чадахгүй бололтой. Учир нь одоогоор хиймэл дагуулын 3D сувгийн дамжуулалт хэзээ эхлэх нь тодорхойгүй байна. Мөн 3D Bluy-ray диск зэрэг гурван хэмжээст технологид суурилсан бүтээгдэхүүнүүд ирэх намраас нааш худалдаанд гарах төлөвгүй байна. Самсунгийн 3D телевизор нь уламлалт телевизтэй адил адил хоёр хэмжээст нэвтрүүлэг үзүүлэх боломжтой бөгөөд LED арын гэрэлтүүлэгчтэй, дэлгэцийн үзүүлэлт 1080 пиксел HDTV юм байна.

эх үүсвэр; physorg

дэлгэрэнгүй

Pop princes

Сүүлийн үед видео хэлбэрийн интернет мэндчилгээнүүд цөөнгүй үзэгдэх болсон билээ. Эдгээрийн дундаас өөрийн болон найз нөхдийнхөө фото зургийг бүжиглэж буй хүмүүсийн дүрсэнд оруулан илгээж болдог хөгжилтэй мэндчилгээг та санаж байгаа байх. Тэгвэл үүнтэй яг адил зарчим бүхий, хүний толгой, нүүрний хөдөлгөөнийг ашиглан богино хэмжээний видео бичэг хийх чадвартай автомат төхөөрөмжийг "DH Technologies" компани бүтээж "AOU2010 Amusement Expo" үзэсгэлэнд танилцуулсан байна.

Энэ төхөөрөмж нь sticker booth хэмээх наалддаг фото зургийн автомат машины илүү сайжруулсан хэлбэр юм. "Pop princes" хэмээх энэ төхөөрөмжөөр хөгжмийн аянд тааруулан толгойгоо хөдөлгөж бичлэг хийлгэх бөгөөд бичлэг нь урьдчилан бэлтгэсэн бүжиглэж буй дүрстэй холбогддог байна. Бичлэг 1 минутын хугацаатай бөгөөд DVD-нд хэвлэх, эсвэл гар утсанд суулгаж авч болох юм байна. Мөн бичлэг хийснийхээ дараа "sticker booth"-тэй адилаар видеон дээрээ үг, тайлбар бичиж элдэв чимэглэл, дүрслэл оруулах боломжтой юм.

дэлгэрэнгүй