ШУТИС-ийн багш нар усны хөдөлгүүр бүтээжээ

ШУТИС-ийн Механик Инженерийн Сургуулийн багш нар усны механик хөдөлгүүр зохион бүтээсэн тухай мэдээлсэн МҮОНТВ-ийн Шинжлэх ухаан танин мэдэхүйн теле сэтгүүл нэвтрүүлгийн нэгэн дугаарыг хүргэж байна. Энэхүү мэдээллийг онцлох болсон нь тодорхой учир шалтгаантай юм. Өнөөдрийг хүртэл монголчууд өөрсдийн оюун ухаан, хүч хөдөлмөрийн үр шимээр шинэ шинэ техник, тоног төхөөрөмжүүдийг зохион бүтээж үйлдвэрлэн, амьдралд хэрэгжүүлсээр ирсэн билээ. Гэхдээ эдгээр бүтээлүүд нь ихэвчлэн гадаадад үйлдвэрлэгдсэн бэлэн эд ангиудын зориулалтыг өөрчилөх зэргээр угсарсан зүйлс байдаг. Мөн нөөц бололцоондоо тулгуурлан өөрсдөө үйлдвэрлэсэн байлаа ч орчин үеийн шаардлагыг тэр бүр хангаж чаддаггүй байсан.

Харин энэ удаа мэдээлэгдэж буй усны моторын хувьд бүх эд ангиудыг программийн удирдлагатай (NC буюу numerical control) машин (ПУМ) ашиглан өөрсдөө үйлдвэрлэснээрээ онцлог юм. Япон болон бусад өндөр хөгжилтэй улс орнуудад үйлдвэрлэгдсэн автомашин болон бусад тоног төхөөрөмжүүд өндөр чанартай, найдвартай ажиллагаатай байдгийн нэг нууц нь эд ангиудыг ПУМ-аар үйлдвэрлэж бүтээгдэхүүний чанарын шаардлагыг дээд зэргээр хангадаг явдал юм. Жишээлбэл автомашины эд ангиудыг 0.01 мм-ийн нарийвчлалтай үйлдвэрлэснээр нэгтгэн угсрах тохиолдолд эд ангиудын зохицол болон хэмжээсийн хувьд хоорондоо яв цав таарч ашиглалтын хугацаа урт, аливаа гэмтэл доголдол багатай, өндөр чанартай бүтээгдэхүүн үйлдвэрлэх нөхцөл болдог байна. Өдөр ирэх тусам овор хэмжээ жижгэрч нэгж талбайд суурилуулах эд ангиудын тоо ихсэж байгаа электрон төхөөрөмжүүдийн эх хавтанг нүхлэх лазерийн машинууд гэхэд л 30-40 микрон хэмжээтэй нүх цоолох чадвартай болсон байна.

Xөгжингүй гадаад улс орнуудтай адил өндөр чанартай бүтээгдэхүүн үйлдвэрлэж тэдэнтэй өрсөлдөхөө байг гэхэд адил төрлийн технологи эзэмшихэд анхны алхам болж байгаа нь дээрх бүтээгдэхүүний онцлог юм. Өндөр нарийвчлал бүхий ПУМ-ууд нь үнэ өртөг харьцангуй өндөр боловч түүнийг ашиглах, ажиллуулахад тийм ч их хэцүү биш байдаг. Цаашид уул уурхай болон бусад эх үүсвэрүүдээс олох орлогын хэмжээ нэмэгдэж машин, тоног төхөөрөмжийн үйлдвэрлэл бий болж, монголчууд өөрсдийн гараар олон олон шинэ бүтээгдэхүүнүүд үйлдвэрлэнэ гэдэгт итгэлтэй байдаг юм.

Харьцангуйн онолыг амьдрал дээр дахин батлажээ

Шат буюу уулан дээр байгаа хүн автомашинаар хурдалж яваа хүнээс илүү хурдан хөгширдөг хэмээх Эйнштэйний 1907 онд нээсэн харьцангуйн ерөнхий онолын хялбар томъёоллыг бид мэднэ. Эрдэмтэд өмнө нь одоогоор бүтээгдээд байгаа хамгийн өндөр нарийвчлал бүхий атомын цагийг пуужинд байрлуулан сансарт нисгэж, түүний заалтыг дэлхийд байрлаx атомын цагтай харьцуулан таталцлын хүчний сулралт нь цаг хугацааг удаашруулдагийг батласан юм.

Харин энэ удаад Колорода мужийн "National Institute of Standards and Technology (NIST)"-ийн физикчид Эйнштэйний харьцангуйн онолыг бодит амьдралын хүрээнд хэр зэрэг нөлөөлдөг болохыг туршилтаар тогтоожээ. Туршилтад мөн адил атомын цаг ашигласан бөгөөд уг цаг нь 3.7 тэрбум жилд 1-хэн секундийн алдаа үзүүлэх өндөр нарийвчлалтай юм. Туршилтаар шатны хэдэн алхамын дээр болон доор зогсож байгаа хүний насны зөрөөг тооцож гаргаснаар шатны дээд талд зогсож байгаа хүн илүү хурдан хөгширнө гэдгийг тогтоожээ. Гэхдээ энэ зөрүү нь маш өчүүхэн бөгөөд хүмүүс шатан дээр 79 жил амьдарсан гэж тооцвол хөгшрөлтийн зөрүү нь секундийг 90 тэрбум хуваасны нэг хугацаагаар хэмжигдэх ажээ.


эх үүсвэр; redOrbit

12 тэмдэгт бүхий нууц үг хамгийн найдвартай

12-оос цөөн тэмдэгт бүхий нүүц үг таны мэдээллийн нууцыг бүрэн хамгаалж чадахгүй хэмээн мэргэжилтнүүд нотлож байна. Georgia-ийн Технологийн Судалгааны Хүрээлэн (Georgia Tech Research Institute-GTRI)-д боловсруулсан "encryption cracking software"-ийн шинэ хувилбарт тулгуурлан гүйцэтгэсэн судалгааны үр дүнд хамгийн найдвартай нууц үг нь 12 тэмдэгтээс доошгүй урттай үсэг, тоо, бусад тэмдэглэгээнүүдийг дурын байдлаар дараалуулсан байх шаардлагатай гэнэ. GTRI-ийн ахлах судлаач Joshua Davis-ийн хэлж байгаагаар одоогоор өргөн ашиглагддаг 8 тэмдэгтээс бүрдсэн нууц үгийг 1 минутын дотор л тайлах боломжтой юм.

Хакерууд нууц үг тайлахын тулд автоматаар тасралтгүй ажиллах чадвар бүхий арилжааны зориулалттай код тайлах программууд болон супер компьютерүүдийг ашигладаг байна. Код тайлаx программ нь үндсэн 2 үйлдэл гүйцэтгэх чадвартай байдаг ажээ. Эхнийх нь толь бичгийн хэлбэр болон хүмүүс нууц үгэндээ түгээмэл хэрэглэдэг хэллэгүүд болох 12345 гэх мэт энгийн хувилбарыг тайлдаг бол 2 дахь үйлдэл буюу "муйхар арга" нь 8 тэмдэгтийн дараалсан бүх боломжит хувилбаруудыг зөв нууц үгийг олон хүртэл нэгбүрчлэн шалгадаг байна. "Муйхар арга" нь асар их цаг хугацаа шаарддаг боловч өнөөдрийн байдлаар компютерийн хүчин чадал хангалттай нэмэгдэж ийм төрлийн үйлдэл гүйцэтгэхэд саадгүй болжээ.

Харин 12 тэмдэгт бүхий нууц үгийг "мухайр арга"-аар тайлах боломжгүй байдаг учир нууц үгийг тэмдэгтийн ийм урттайгаар сонгож авах нь найдвартай ажээ. Гэхдээ ийм нууц үг таны мэдээллийг хангалттай удаан хамгаалж чадахгүй бололтой. Учир нь компьютерийн хүчин чадал болон хакеруудын ур чадвар өдөр ирэх тусам өсөн нэмэгдэж байгаа өнөө үед 12 тэмдэгт бүхий нууц үгийг тайлах нь зөвхөн цаг хугацааны л асуудал гэнэ. Мөн тун удахгүй зарим онцгой төрлийн вирусууд таны компьютерийн гарнаас ямар ч урттай, ямар ч хэцүү нууц үгийг хялбархан илрүүлэх чадалтай болох ажээ. Хэрэв таны компьютер гарны товчлуурын даралтыг тэмдэглэж авах чадвартай trojan вирусээр халдварлагдвал ямар ч авралгүй гэнэ.

Joshua Davis-ийн хэлсэнээр мэдээллийн аюулгүй байдлыг хангах буюу нууц үгний хамгаалалтын үйл ажиллагааг, компьютерийн мэргэжилтнүүд болон хакерүүдийн хоорондох муур хулганын хөөцөлдөөнтэй зүйрлэж болно гэж хэлсэн байна. Европийн зарим банкнууд аюулгүй байдлыг найдвартай хангах үүднээс нэг удаагийн нууц үг үүсгэх төхөөрөмжийг хэрэглээнд нэвтрүүлж эхэлсэн байна. Зөвхөн нэг удаа хэрэглэх зориулалт бүхий нууц үгнүүдийн багц нь "муйхар арга"-аар тайлахаас сэргийлж чаддаг ажээ. Гэхдээ энэ аргын нууцад хакерууд нэвтрэх нь мөн адил цаг хугацааны л асуудал гэнэ шүү. Дашрамд дурдахад бидэнд ер нь мэдээллийн нууцаа цаашид хамгаалах найдвартай арга олдох болов уу.

эх үүсвэр; TechNewsDaily

Лити ионы батерейн хүчин чадал хоёр дахин нэмэгдэнэ

Amprius компани одоогоор өргөн хэрэглэгдэж буй ижил төрлийн батерейнүүдээс 2 дахин их хүчин чадалтай, нано бүтэц бүхий цахиурын электродыг агуулах лити-ионы батерей бүтээсэн тухай зарлалаа. Энэ шинэ батерей нь бидний өдөр тутам хэрэглэдэг цэнэглэгч батерей бүхий зөөврийн төхөөрөмжүүдийн бүрэн цэнэглэсэн тохиолдолд тасралтгүй ажиллах хугацааг 40 хувиар нэмэгдүүлэх боломжийг олгож байна. Шинэ батерейг 2012 оны эхээр зарим төрлийн бүтээгдэхүүнүүдэд хэрэглэж эхлэхээр төлөвлөж байгаа боловч яг ямар бүтээгдэхүүнд гэдэг нь одоогоор тодорхойгүй байгаа юм. Мөн тус компани шинэ электродын технологийг цахилгаан автомашины батерейд нэвтрүүлэхээр хэд хэдэн үйлдвэрлэгч компаниудтай хамтран ажиллаж байгаа тухай дурдсан байна.

Электронууд нь цахилгааны гадаад хэлхээгээр урсах үед литийн ионууд батерейн катодоос анод руу шилжих замаар батерей цэнэглэгддэг. Батерейг ашиглах үед дээрх процесс эсрэг чиглэлд явагддаг байна. Анодод хуримтлагдах литийн хэмжээ ихсэх тусам батерей илүү их хэмжээний энергийг агуулах бөгөөд цэнэгээ алдах хугацаа уртасдаг ажээ. Сүүлийн 30-аад жилийн туршид үйлдвэрлэгдэж буй лити ионд нүүрстөрөгчийн анод ашигласаар ирсэн. Ямар нэгэн шинэ төрлийн материал ашиглалгүйгээр зөвхөн технологийн сайжруулалт хийгдсэний үр дүнд ийм төрлийн батерейн хүчин чадал жилд дөнгөж 7 хувиар нэмэгдэж байна. Цахиур нь нүүрстөрөгчийн анодтой харьцуулахад онолын хувьд 10 дахин их хэмжээний ионыг агуулах чадалтай боловч бодит байдалд ийм хүчин чадал бүхий анод үйлдвэрлэх боломж одоогоор хязгаарлагдмал байгаа юм.

Их хэмжээний литийн ионыг хүлээн авах болон илгээх үед цахиурын материал хэв гажилтад орж хагаралт үүсдэг байна. 2007 онд Стэнфордийн их сургуулийн проффессор Yi Cui механикийн ийм төрлийн хүндрэлээс зайлсхийх зорилгоор нано бүтэц бүхий цахиурын ялтасыг лабораторын нөхцөлд бий болгож байсан юм. Харин Amprius компанийхан 18 сарын өмнөөс судлаж, бүтээсэн цахиурын анод нь түүний судалгаанд түшиглэсэн байна. Цахиурын нано-утас бүхий анод нь уян хатан боловч механикийн хувьд хангалттай бат бэх болж чаджээ. Одоогоор шинэ төрлийн батерейг 250 удаа дахин цэнэглэж туршсан бол цахилгаан автомашинд ашиглагддаг батерейг 3000 удаа дахин цэнэглэж турших шаардлагатай байдаг байна.

Дашрамд дурдахад цахилгаан автомашин түгэн дэлгэрэхэд тулгарч буй гол саад бэрхшээл нь лити ионы батерейн энерги хадгалах хүчин чадал харьцангуй бага, овор жин ихтэй байгаа явдал юм. Иймд одоогоор үйлдвэрлэгдэж байгаа цахилгаан автомашинууд жижиг оврын, ихэвчлэн 4-өөс олон тооны хүн болон хангалттай хэмжээний ачаа тээвэрлэж боломжгүй байна. Мөн нэг удаагийн цэнэглэлтээр 160км-ээс илүү зай туулах боломжгүй байгаа юм. Зарим төрлийн цахилгаан автомашины батерейн жин л гэхэд 200 кг-д хүрдэг. Дээрх шинэ технологи амьдралд нэвтрэх тохиолдолд цахилгаан автомашины үндсэн дутагдалуудыг арилгаж, их хэмжээгээр түгэн дэлгэрэх боломж бүрдэх юм. Зөвхөн цахилгаан автомашинаар ч зогсохгүй бүхий төрлийн зөөврийн төхөөрөмжүүдийг цэнэгээс хамаарах зарим хүндрэлүүдийг арилгаж, ашиглахад улам хялбар болгох юм.


Эх үүсвэр; Technology Review

Sony Bloggie

Сони компани Bloggie хэмээх шинэ төрлийн халаасны видео камер бүтээсэн байна. Уг камер нь F2.8 өргөн өнцөгийн, автомат фокустай, 4X дижитал зүүм бүхий тогтмол үзүүлэлтүүдтэй юм. 3 инчийн даралтат дэлгэцтэйгээс гадна 1080p хүртэлх хэмжээний өндөр нягтрал бүхий 12.8 мегапиксел дүрслэл үүсгэх чадвартай ажээ. 52 x 107 x 15.2 мм буюу ердийн гар утастай адил хэмжээний уг камер нь Exmoor CMOS дүрсний мэдрэгчээр тоноглогдсон бөгөөд 4 Гб багтаамжтай нь 200, 8 Гб багтаамжтай нь 180 орчим доллараар тус тус худалдаалагдаж байна.







эх үүсвэр; gizmag

Youtube-ийн баячууд

Вэб-2 технологи олон хүнд төлөвлөсөн болон санамсаргүй байдлаар багагүй хэмжээний орлого олох боломжийг олгож байгаа билээ. Одоогийн байдлаар youtube сайтад гэхэд л долоо хоног тутамд 60 мянган видео бичлэг ачаалагдаж, нийт бичлэгийн хэмжээ минут тутамд 12 цагаар уртасч байна. Энэ хэмжээгээр олон шинэ "од" төрөн гарч бичлэгүүдийг нь үзсэн тоо хэдэн зуун саяд хүрдэг. Судалгааны TubeMogul компани тус сайтаас өнгөрсөн жил хамгийн их орлого олсон хүмүүсийн жагсаалтыг гаргасан байна. Видео бичлэгүүдийн хамт дижитал сурталчилгааны материалуудыг сая сая хүнд хүргэсний төлбөрт жилийн дүнгээр 100 мянгаас дээш долларын орлого олсон хүмүүс уг жагсаалтын эхний 10-т багтсан байна.

Мөн эдгээр 10 хүний 9 нь хошин шогийн богино хэмжээний зохиомжууд бүтээдэг хүмүүс ажээ. Калифорнийн иргэн 22 настай Shane Dawson богино хэмжээний хошин шогийн тоглолтуудаараа өнгөрөгч 12 сарын хугацаанд 200 мянган долларын орлого олж жагсаалтын эхэнд орсон байна. Ингээд жагсаалтыг сонирхоно уу.

1. Shane Dawson. Хошин шогийн жүжигчин. Орлого; $315,000. Бичлэгийг нь үзсэн тоо; 431,787,450

2.Ядаргаатай амтат жүрж. Орлого; $288,000. Бичлэгийг нь үзсэн тоо; 349,753,047

3. Philip DeFranco, улс төрийн сэдвээр блог бичигч. Орлого; $181,000. Бичлэгийг нь үзсэн тоо; 248,735,032

4. Ryan Higa. Хошин шогийн жүжигчин. Орлого; $151,000. Бичлэгийг нь үзсэн тоо; 206,979,909

5. Lukas Cruikshank, "Уур хилэнгийн менежментийн асуудал" зохиомж бүтээгч. Орлого; $146,000. Бичлэгийг нь үзсэн тоо; 200,656,150

6. Shay Carl. Хошин шогийн зохиомж бүтээгч. Орлого; $140,000. Бичлэгийг нь үзсэн тоо; 192,309,247

7. Mediocre Films. Богино хэмжээний хошигнол бүтээгч. Орлого; $116,000. Бичлэгийг нь үзсэн тоо; 159,030,703

8. Хошин шогийн жүжигчин хос. Орлого; $113,000. Бичлэгийг нь үзсэн тоо; 154,936,876

9. Турк залуу нэрээр чөлөөт болон улс төрийн ярилцлага хийгч. Орлого; $112,000. Бичлэгийг нь үзсэн тоо; 153,807,362

10. Natalie Tran. Хошин шогийн жүжигчин. Орлого; $101,000. Бичлэгийг нь үзсэн тоо; 138,871,829

Сонирхуулахад шүдний эмчид очсоны дараа, мэдээ алдуулах тарианы үйлчлэл гараагүй байхад хийгдсэн David хэмээх хүүгийн хөгжилтэй бичлэг дээрх жагсаалтад ороогүй боловч нийт 150 мянган долларын орлого олсон байна. Харин Чарли миний хурууг хазчихлаа бичлэг 200 сая удаа нээгдсэн боловч дөнгөж хэдхэн арван мянган доллараар үнэлэгджээ. Бас араб, эмэгтэй, зомби гэх мэтчилэн хувилбарууд нь гарсан байна.


эх үүсвэр; mailonline