Японы электроникийн үйлдвэрлэл хүнд байдалтай байна

Япон улсын электрон бараа үйлдвэрлэгч Панасоник компаний алдагдлын хэмжээ энэ оны 3 сар хүртэлх нэг жилийн хугацаанд хүлээгдэж буй гүйцэтгэлээр 780 тэрбум иен (10.2 тэрбум доллар)-д хүрэх төлөвтэй байгаа тухай мэдэгдлээ. Энэ нь тус улсын үйлдвэрлэлийн салбарын түүхэнд тохиолдож буй алдагдлын хамгийн өндөр үзүүлэлт юм. Эрчим хүчний хэмнэлттэй бүтээгдэхүүнд улсаас олгодог хөнгөлөлтийн хугацаа дууссан, телевизийн тоон системд шилжсэнээр дотоодод худалдаалж буй телевизорын борлуулалт буурсанаас гадна гадаад нөхцөл байдлын нөлөөгөөр их хэмжээний алдагдалд ороход хүрчээ.

Сони компани мөн хугацаанд 220 тэрбум иений алдагдалд орох төлөвтэй байгаа бол Шарп компаний хувьд алдагдлын хэмжээ сүүлийн 3 улирлын нийлбэр дүнгээр 290 тэрбум иенд хүрээд байна. Сони компанийн зөвхөн телевизорын үйлдвэрлэлийг авч үзвэл сүүлийн 8 жил дараалан алдагдалтай ажиллаж байгаа юм.

Харин Хитачи сүүлийн 3 улирлын дүнгээр 85.2 тэрбум иений ашигтай ажиллаж ашгийн хэмжээгээр электрон бараа үйлдвэрлэгч компаниуд дундаа тэргүүлж байна. Гэвч 3 жилийн өмнө тус компани мөн л үйлдвэрлэлийн салбарын түүхэнд хамгийн өндөр хэмжээний буюу 787 тэрбум алдагдал хүлээж байсан юм. Тухайн үед ашиг багатай плазма дэлгэц болон LCD телевизорын үйлдвэрлэлээ зогсоож цахилгаан станц, төмөр зам зэрэг дэд бүтцийн салбарт түлхүү хөрөнгө оруулах болсон юм. Тошиба компани 65 тэрбум иений ашигтай ажилласан боловч ашгийн хэмжээ өмнөх оныхоос 70%-иар буурсан байна.

Сүүлийн жилүүдэд дэлхийн телевизорын зах зээлийн үнийн өрсөлдөөн ширүүсч зах зээлд Өмнөд Солонгос, Хятад улсын үйлдвэрлэгчдийн эзлэх хувь нэмэгдэж байна. Одоогийн байдлаар телевизорын нийт зах зээлийн 36.2%-ийг Өмнөд солонгос, 34.4%-ийг Япон, 19.4%-ийг Хятад улс тус тус эзлэж байгаа юм. Сүүлийн үед доллартой харьцах иений ханш тогтмол өндөр байгаа, Тайланд улс дахь салбар үйлдвэрүүд үерт автсан зэрэг гадаад нөхцөл байдлаас шалтгаалан Японы электрон бараа үйлдвэрлэгчдийн ашиг орлого буурч, их хэмжээний алдагдалд орж байна.

Панасоник компани нарны батерей зэрэг байгаль орчинд ээлтэй технологийн үйлдвэрлэлээ нэмэгдүүлэх замаар энэ ондоо багтаан алдагдлаас гарахаар төлөвлөж байгаа бол Шарп компани телевизорын үйлдвэрлэлийн хэмжээг бууруулж, ухаалаг утсанд зориулсан жижиг оврын дэлгэцийн үйлдвэрлэлийг нэмэгдүүлэхээр төлөвлөжээ. Харин Сони компани Олимпустай хамтран эмнэлгийн тоног төхөөрөмжийн үйлдвэрлэлд ихээхэн хэмжээний хөрөнгө оруулалт хийхээр төлөвлөжээ.

Япон улсын электрон бараа үйлдвэрлэгч компаниудын үйлдвэрлэл болон ашгийн дийлэнх хувийг телевизорын үйлдвэрлэл бүрдүүлсээр ирж, телевизор тэдгээр компаниудын нүүр царай болсон бүтээгдэхүүнд тооцогдож байв. Гэвч энэ байдал дэлхийн эдийн засгийн хямрал болон бусад шалтгааны улмаас үндсээрээ өөрчлөгдөж байна.


, ,

3 сэтгэгдэл:

Энд нэг юм ажигласан нь Panasonic-ын бараа бусад брэндээсээ арай үнэтэй байдаг юм байна. Steven Jobs нас барахаасаа өмнө надад нэг телевизорын санаа байна гэж хэлсэн юм гэсэн. Арай Apple шинэ үеийн тв гаргачих юм биш байгаа даа. Тэгвэл ч Японы компаниудын тв худалдаа бараг зогсох байхаа.

Cаарал хариулав... 2/5/12, 8:19 PM

Өмнөх мэдээнд "бид төхөөрөмжийн удирдлагын арга хэрэгсэлд эргэлт хийх интерфейсийг бүтээсэн" гэдэг нь шинэ телевизорын технологийн тухай Жообсын хэлсэн үгийн хувирсан хэлбэр бололтой юм. Жапануудын хувьд зөвхөн телевизороор зогсохгүй үйлдвэрлэлийн бараг бүхий л салбар маш хүнд байдалд байна. 1 доллар 76 иений ханштайгаар 6 сараас илүү хугацаагаар үргэлжлэх тохиолдолд гадагшаа нүүхээс өөр аргагүй болно гэж жижиг, дунд үйлдвэрлэл эрхлэгчдийн тал хувь нь санал асуулгаар хариулсан байдаг. Гэтэл энэ ханш бараг нэг жил үргэлжилж байна. Төв банкнаас 2 ч удаа интервенц хийгээд нэмэр байдаггүй, одоо дахиад хийх тухай яригдаж байх шиг ...

хариулах...

Smart tv deer uildverlegchid ali ert ajillaad 2-3 jil bolson baih. Dotroo dual core cpu-tei, hard disktei barag smartphone-ii ihenh ajillagaag buh app-iig oruultsan. Samsungiin huvilbar n TV deereesee ugaalgiin mashin galzuuhnii buh tsahilgaan heregselee wifi-aar hyanah tiim yum oirnoos garahgeed baina daa. Smart tv bas alsiin udirdlaggui hunii am ba huruunii zangaagaar tv-gee udirdana kinect maygiin optikoor.

хариулах...

Сэтгэгдэл үлдээх